សម្ដេចតេជោ សង្ឃឹមថា សមាគមជនជាតិខ្មែររស់នៅប្រទេសជប៉ុននឹងអាចរក្សាបាននិរន្តរភាព និងពង្រីកសាមគ្គីនៅក្នុងសហគមខ្មែររស់នៅប្រទេសជប៉ុន

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា មានក្ដីសង្ឃឹមថា សមាគមជនជាតិខ្មែររស់នៅប្រទេសជប៉ុន ដឹកនាំដោយលោក ហៃ វណ្ណា នឹងអាចរក្សាបាននិរន្តរភាព និងពង្រីកសាមគ្គីនៅក្នុងសហគមខ្មែររស់នៅប្រទេសជប៉ុន។

សម្ដេចតេជោ ហ៊ុន សែន បានបង្ហាញក្ដីសង្ឃឹមបែបនេះ ក្នុងឱកាស អនុញ្ញាតឱ្យក្រុមការងារសមាគមជនជាតិខ្មែររស់នៅប្រទេសជប៉ុន ដឹកនាំដោយ លោក ហៃ វណ្ណា ចូលជួបសម្តែងការគួរសមនៅវិមានសាមគ្គីភាពនៃព្រឹទ្ធសភាជាតិ រាជធានីភ្នំពេញ នៅព្រឹកថ្ងៃទី៦ ខែមេសា ឆ្នាំ២០២៦នេះ។

ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួបនេះថា ជាកិច្ចចាប់ផ្ដើម សម្ដេចតេជោ បានសម្ដែងនូវការស្វាគមន៍ និងអបអរសាទរចំពោះលោក ហៃ វណ្ណា និងសហការី ដែលបង្កើតនូវសមាគមនេះឡើងក្នុងគោលដៅ ដើម្បីពង្រឹងនូវចំណងសាមគ្គីភាពរបស់ប្រជាជនខ្មែរដែលរស់នៅប្រទេសជប៉ុន។

នៅក្នុងឱកាសនោះ លោក ហៃ វណ្ណា បានសម្ដែងនូវការអរគុណជា អនេកប្បការចំពោះសម្ដេចតេជោ ដែលបានអនុញ្ញាតឱ្យរូបលោក និងសហការីបានជួបសម្ដែងការគួរសម និងរាយការណ៍នៅក្នុងឱកាសនេះ។

ក្នុងឱកាសនោះ លោក ហៃ វណ្ណា បានរាយការណ៍អំពីវឌ្ឍនភាពរបស់សមាគមជនជាតិខ្មែររស់នៅប្រទេសជប៉ុន និងសកម្មភាពការងារមួយចំនួនដែលសមាគមនេះសម្រេចបាននាពេលកន្លងមក ជាពិសេសគឺគោលដៅរបស់សមាគម ក្នុងការពង្រឹងនូវចំណងសាមគ្គីភាពរវាងខ្មែរ និងខ្មែររស់នៅប្រទេសជប៉ុន និងការជួយជ្រោមជ្រែងទៅលើផ្នែកផ្សេងៗទៀតរបស់សហគមន៍ខ្មែរដែលកំពុងរស់នៅប្រទេសជប៉ុននោះ។

សម្ដេចតេជោ ក៏បានសម្ដែងនូវការពេញចិត្តចំពោះវឌ្ឍនភាពរបស់សមាគម ហើយសម្ដេចក៏បានសង្គត់ធ្ងន់ចំពោះការបង្កើតសមាគមនេះ ដោយសម្ដេចបញ្ជាក់ថា ការបង្កើតគឺជារឿងមួយលំបាកហើយ ក៏ប៉ុន្ដែរឿងសំខាន់មួយទៀតនោះ គឺការរក្សាឱ្យបាននូវនិរន្តរភាពនៃសមាគមនេះ។

សម្ដេចតេជោ សង្ឃឹមថា សមាគមជនជាតិខ្មែររស់នៅប្រទេសជប៉ុន ដែលដឹកនាំដោយលោក ហៃ វណ្ណា នឹងអាចរក្សាបាននូវនិរន្តរភាព ហើយអាចពង្រីកនូវការសាមគ្គីនៅក្នុងសហគមខ្មែររស់នៅប្រទេសជប៉ុន៕