​កម្ពុជា-ឡាវ បើកកិច្ចប្រជុំពិនិត្យលើការងារធានាសន្តិសុខតាមបណ្តោយព្រំដែននៃប្រទេសទាំងពីរ

កម្ពុជាកំពុងទទួលធ្វើជាម្ចាស់ផ្ទះរៀបចំជំនួបប្រជុំពិភាក្សាគ្នាដោយផ្ទាល់ ជាលើកទី៤ របស់គណៈកម្មការកិច្ចសហប្រតិបត្តិការ រក្សាសន្តិសុខ របៀបរៀបរយតាម បណ្តោយព្រំដែនកម្ពុជា-ឡាវ ឡាវ-កម្ពុជា លើកទី៤ ដែលកិច្ចប្រជុំនេះត្រូវបានរៀបចំឡើងនៅក្រុងស្ទឹងត្រែង ខេត្តស្ទឹងត្រែង ព្រះរាជាណាចក្រកម្ពុជា នៅរសៀលថ្ងៃទី១៨ ខែឧសភា ឆ្នាំ២០២៦។

ភាគីកម្ពុជាដឹកនាំដោយឯកឧត្តម នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ និងជាប្រធានគណៈកម្មការ កិច្ចសហប្រតិបត្តិការ រក្សាសន្តិសុខ របៀបរៀបរយតាមបណ្តោយព្រំដែនកម្ពុជា-ឡាវ ឡាវ-កម្ពុជា។ ចំណែកភាគីឡាវដឹកនាំដោយឯកឧត្តម ឧត្តមសេនីយ៍ទោ វ៉ាន់ថង ប៊ុតតាក់វង្ស អនុប្រធានអគ្គសេនាធិការកងទ័ពប្រជាជនឡាវ និងជាប្រធានគណៈកម្មការ កិច្ចសហប្រតិបត្តិការរក្សាសន្តិសុខរបៀបរៀបរយតាមបណ្តោយព្រំដែនឡាវ-កម្ពុជា កម្ពុជា-ឡាវ ។

នាយឧត្តមសេនីយ៍ ឥត សារ៉ាត់ បានឲ្យ BTV ដឹងថា ប្រជុំពិភាក្សារបស់គណកម្មការនេះ ត្រូវបានរៀបចំឡើងជារៀងរាល់ឆ្នាំជាលក្ខណ:ប្តូរវេន។ កិច្ចប្រជុំនាល្ងាចនេះ ប្រព្រឹត្តទៅដោយអនុវត្តតាមខ្លឹមសារកំណត់ហេតុកិច្ចប្រជុំលើកទី៣ នៃគណៈកម្មការកិច្ចសហប្រតិបត្តិការរក្សាសន្តិសុខ របៀបរៀបរយតាមបណ្តោយព្រំដែនឡាវ-កម្ពុជា កម្ពុជា-ឡាវ ដែលបានរៀបចំឡើងនៅក្រុងប៉ាកសេ ខេត្តចំប៉ាសាក់ សាធារណរដ្ឋប្រជាធិតេយ្យ ប្រជាមានិតឡាវ កាលពីថ្ងៃទី១៩ ខែឧសភា ឆ្នាំ២០២៥ កន្លងមក ។ ម្យ៉ាងថែមទៀត ជំនួបពិភាក្សានេះក៍បានប្រព្រឹត្តទៅក្រោមទំនាក់ទំនង និងកិច្ចសហប្រតិបត្តិការដ៏ល្អប្រសើរ រវាងប្រទេសទាំងពីរលើគ្រប់វិស័យ ស្របពេលដែលឆ្នាំនេះគឺជាខួបលើកទី៧០ នៃការបង្កើតទំនាក់ទំនងការទូតរវាងប្រទេសទាំងពីរ។

ក្នុងរយៈពេលមួយឆ្នាំកន្លងមកនេះ កងទ័ពនៃប្រទេសទាំងពីរបានបន្តយកចិត្តទុកដាក់ពង្រឹងកិច្ចសហប្រតិបត្តិការ និងសម្របសម្រួលការងារជាមួយគ្នាយ៉ាងជិតស្និទ្ធ ក្រោមស្មារតីមិត្តភាព សាមគ្គីភាព ការយោគយល់គ្នាទៅវិញទៅមក និងការគោរពគ្នាទៅវិញទៅមក ដោយឈរលើគោលការណ៍ដោះស្រាយបញ្ហាដោយសន្តិវិធី និងជៀសវាងនូវសកម្មភាពដែលអាចប៉ះពាល់ដល់បរិយាកាសសន្តិភាព និងស្ថិរភាពតាមបណ្តោយព្រំដែន។

កិច្ចសហការដ៏ល្អប្រសើរនេះបានរួមចំណែកយ៉ាងសំខាន់ក្នុងការរក្សាសន្តិសុខ សណ្តាប់ធ្នាប់ និងការពង្រឹងទំនាក់ទំនងជាប្រពៃណីរវាងកងទ័ព និងប្រជាជននៃប្រទេសទាំងពីរ។

ទន្ទឹមនឹងលទ្ធផលវិជ្ជមានដែលសម្រេចបាន ស្ថានភាពតាមបណ្តោយព្រំដែននៅតែអាចមានបញ្ហាប្រឈមមួយចំនួន ដែលទាមទារឱ្យភាគីទាំងពីរបន្តយកចិត្តទុកដាក់ និងពង្រឹងកិច្ចសហការឱ្យកាន់តែមានប្រសិទ្ធភាពថែមទៀត៕ អត្ថបទ៖ វង្ស សុភាព