បេក្ខជនប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៥-២០២៦ ក្នុងខេត្តកំពង់ឆ្នាំង បាននាំគ្នាមកពិនិត្យឈ្មោះនៅតាមមណ្ឌលប្រឡងរៀងៗខ្លួន

កំពង់ឆ្នាំង ៖ បេក្ខជនប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៥-២០២៦ នៅថ្ងៃទី០៩ ខែសីហា ឆ្នាំ២០២៦នេះ បាននាំគ្នាមកពិនិត្យឈ្មោះនៅតាមមណ្ឌលរៀងៗខ្លួន ខ្លះក៏បានរកកន្លែងស្នាក់នៅបណ្តោះអាសន្នក្នុងពេលប្រឡងផងដែរ។

សូមបញ្ជាក់ថា : ការប្រឡងសញ្ញាបត្រមធ្យមសិក្សាទុតិយភូមិចំណេះទូទៅស្វៃរិន បំពេញវិជ្ជា សម័យប្រឡងថ្ងៃទី១០-១១ ខែសីហា ឆ្នាំ២០២៦ នៅខេត្តកំពង់ឆ្នាំងបានចែកចេញជា៨មណ្ឌល គឺនៅក្រុងកំពង់ឆ្នាំង៤មណ្ឌល និងស្រុករលាប្អៀរ៤មណ្ឌល។ ដោយឡែកយុវជន សសយក ខេត្តកំពង់ឆ្នាំងបានសហការជាមួយអាជ្ញាធរខេត្តក្រុងស្រុក មន្ទីរអប់រំ និងកងកម្លាំងចូលរួមរក្សាសន្តិសុខ សណ្តាប់ធ្នាប់របៀបរៀបរយខាងក្រៅមណ្ឌល និងរៀបចំទីតាំងផ្ញើកង់ម៉ូតូ ចែកទឹកបរិសុទ្ធ ភេសជ្ជ:ជូនបេក្ខជនដោយឥតគិតថ្លៃនៅតាមមណ្ឌលប្រឡងទាំង៨។

នៅថ្ងៃទី០៨-០៩ ខែសីហា ឆ្នាំ២០២៦នេះដែរ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានចុះពិនិត្យមើលតាមមណ្ឌលប្រឡងពាក់ព័ន្ធនឹងអនាម័យ និងបរិស្ថានតាមមណ្ឌលទាំង៨ និងកន្លែងស្នាក់នៅរបស់បេក្ខជនមកពីតាមស្រុក និងអំពាវនាវអោយក្មួយៗជាបេក្ខជនត្រូវយកចិត្តទុកដាក់ពីសុខភាព៕ កាំង ហុងវាស្នា