រដ្ឋមន្ត្រីការបរទេសកម្ពុជាជួបជាមួយអគ្គលេខាធិការ OIF ដើម្បីត្រៀមរៀបចំកិច្ចប្រជុំកំពូលហ្វ្រង់កូហ្វូនីលើកទី២០

ភ្នំពេញ៖ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ ជួបពិភាក្សាការងារជាមួយលោកជំទាវ Louise Mushikiwabo អគ្គលេខាធិការអង្គការអន្តរជាតិហ្វ្រង់កូហ្វូនី (OIF) ដើម្បីត្រៀមរៀបចំកិច្ចប្រជុំកំពូលហ្វ្រង់កូហ្វូនីលើកទី២០ នៅព្រឹកថ្ងៃទី១០ ខែវិច្ឆិកា ឆ្នាំ២០២៦ នៅទីស្តីការក្រសួង។

រដ្ឋមន្ត្រីក្រសួងការបរទេសបានបញ្ជាក់ថា ៖ “ការពិតទៅយើងបានជួបគ្នាច្រើនលើកច្រើនសារហើយ នឹងបានធ្វើការពិភាក្សាក្នុងគ្រប់កម្រិតទាំងអស់ គឺយើងបានធ្វើការងារនឹងជាប់ជិត២ឆ្នាំហើយ។ កិច្ចប្រជុំនេះដើម្បីជជែកគ្នាអំពីការងារដែលយើងរំពឹងថានឹងទទួលបាននៅក្នុងពេលប្រជុំហ្វ្រង់កូហ្វូនីលើកទី២០ ខាងមុខនេះ ពាក់ព័ន្ធទៅនឹងខ្លឹមសារ ឯកសារដែលត្រូវអនុម័ត ឯកសារដែលត្រូវសម្រេច។ ហើយក៏ដូចជាភាពលម្អិតពាក់ព័ន្ធទៅនិងដំណើរការទាំងមូលនៃកិច្ចប្រជុំរបស់ហ្វ្រង់កូហ្វូនី ដោយមានកិច្ចប្រជុំថ្នាក់រដ្ឋមន្ត្រីនៅថ្ងៃទី១៤ ខែវិច្ឆិកា ឆ្នាំ២០២៦។ មានកិច្ចប្រជុំថ្នាក់កំពូលនៅថ្ងៃទី១៥-១៦ ខែវិច្ឆិកា ឆ្នាំ២០២៦។ ហើយយើងក៏បានជជែកគ្នាអំពីកម្មវិធីទាំងឡាយដែលមាននៅក្នុងកិច្ចប្រជុំនេះ។ យើងក៏បានពិភាក្សាគ្នានិងឯកភាពគ្នា អង្គការហ្វ្រង់កូហ្វូនីនឹងកម្ពុជាដែលនឹងក្លាយទៅជាប្រធានរបស់កិច្ចប្រជុំកំពូលសម្រាប់២ឆ្នាំខាងមុខទៀត គឺត្រូវតែពិភាក្សាគ្នានិងត្រូវរ៉ូវគ្នាថាដំណើរការវាត្រូវធ្វើយ៉ាងម៉េច ហើយឲ្យឯកភាពគ្នាជាមុន”។

សូមជម្រាបថា លោកជំទាវ Louise Mushikiwabo អគ្គលេខាធិការអង្គការអន្តរជាតិហ្វ្រង់កូហ្វូនី (OIF) បានអញ្ជើញមកដល់ព្រះរាជាណាចក្រកម្ពុជា កាលពីថ្ងៃទី៤ ខែវិច្ឆិកា ឆ្នាំ២០២៦ គឺដើម្បីរួមគ្នាជាមួយកម្ពុជាត្រៀមរៀបចំកិច្ចប្រជុំកំពូលហ្វ្រង់កូហ្វូនីលើកទី២០ ដែលគ្រោងនឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា ឆ្នាំ២០២៦។

តាមកម្មវិធីនៅថ្ងៃទី១៤ ខែវិច្ឆិកា ឆ្នាំ២០២៦ ពិធីបើកសន្និសីទថ្នាក់រដ្ឋមន្ត្រីលើកទី៤៨ ក្រោមអធិបតីភាពឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ។ នៅថ្ងៃទី១៥ ខែវិច្ឆិកា ឆ្នាំ២០២៦ ព្រះរាជពិធីបើកកិច្ចប្រជុំកំពូលហ្វ្រង់កូហ្វូនីលើកទី២០ ប្រព្រឹត្តទៅក្រោមព្រះរាជអធិបតីភាពដ៏ខ្ពង់ខ្ពស់បំផុតព្រះករុណាព្រះបាទសម្តេចព្រះ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងពិធីលៀងសាយភោជន៍ក្រោមនឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា។ នៅថ្ងៃទី១៦ ខែវិច្ឆិកា ពិធីបិទកិច្ចប្រជុំកំពូលក្រោមអធិបតីភាពដ៏ខ្ពង់ខ្ពស់ឯកឧត្តម អេម៉ានុយអែល ម៉ាក្រុង ប្រធានាធិបតី នៃសាធារណរដ្ឋបារាំង។ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាអញ្ជើញជាអធិបតីភាពដ៏ខ្ពង់ខ្ពស់ពិធីបើកពិពណ៌ហ្វ្រង់កូតិចនៅថ្ងៃទី១៥ ខែវិច្ឆិកា ឆ្នាំ២០២៦ នៅមជ្ឈមណ្ឌលសន្និបាតនិងពិពណ៌កោះពេជ្រ។ ពិធីបើកវីឡាហ្វ្រង់ហ្វូកូនីនឹងប្រព្រឹត្តទៅនៅថ្ងៃទី១៤ ខែវិច្ឆិកា ឆ្នាំ២០២៦ ក្រោមអធិបតីភាពលោកជំទាវបណ្ឌិត ពេជ ចន្ទមុន្នី និងលោកជំទាវអគ្គលេខាធិការដ្ឋានហ្វ្រង់ហ្វូកូនី៕ អត្ថបទ : វង្ស សុភាព