យុវជនអ្នកបន្តវេន៖ ការបំពេញកាតព្វកិច្ចយោធារបស់យុវជនគឺពង្រឹងស្មារតីជាតិនិយម

ភ្នំពេញ ៖ លោក រិន សុភ័ក្ត្រ ប្រធានសមាគមយុវជនអ្នកបន្តវេនបានថ្លែងថា ការបើកវគ្គហ្វឹកហ្វឺនយោធិនកាតព្វកិច្ចយោធា ជំនាន់ទី១ ឆ្នាំ២០២៦ គឺជាព្រឹត្តិការណ៍ប្រវត្តិសាស្ត្រនៃការបំពេញកាតព្វកិច្ចយោធារបស់យុវជនក្នុងការពង្រឹងនិងពង្រីកស្មារតីជាតិនិយមដើម្បីការពារដែនអធិបតេយ្យភាពរបស់ខ្លួន និងពង្រឹងកាយសម្បទាសុខភាពរបស់យុវជន ជាពិសេសក្នុងគលបំណងបម្រើនៅផលប្រយោជន៍ជាតិទាំងមូល។

ប្រធានសមាគមយុវជនអ្នកបន្តវេនបានបញ្ជាក់ថា ៖ “ស្របពេលដែលទិវាឯករាជក្យជាតិ ”នេះបង្ហាញពីឆន្ទៈនិងស្មារតីរបស់ថ្នាក់ដឹកនាំ និងជម្រុញលើកទឹកចិត្តទៅដល់យុវជនជំនាន់ថ្មីដើម្បីឲ្យអាចមានលទ្ធភាពពេញលេញជាមួយកិច្ចការការពារអធិបតេយ្យភាពក្នុងអំឡុងពេលដែលកម្ពុជាកំពុងមានវិវាទព្រំដែនជាមួយប្រទេសជិតខាង។

សូមជម្រាបថា វគ្គហ្វឹកហ្វឺនយោធិនកាតព្វកិច្ចយោធា ជំនាន់ទី១ ត្រូវបានប្រកាសជាផ្លូវការនៅថ្ងៃទី៩ ខែវិច្ឆិកា ឆ្នាំ២០២៦ ពោលគឺចំថ្ងៃបុណ្យឯករាជ្យជាតិ និងខួបកំណើតកងយោធពលខេមរភូមិន្ទផងដែរ។ នេះជាព្រឹត្តិការណ៍ប្រវត្តិសាស្ត្រក្នុងវិស័យការពារជាតិ តាមរយៈការអនុវត្តច្បាប់ស្តីពីកាតព្វកិច្ចយោធា ក្នុងគោលបំណងពង្រឹងសមត្ថភាពកងយោធពលខេមរភូមិន្ទ ក្នុងការការពារអធិបតេយ្យភាព បូរណភាពទឹកដី និងសន្តិសុខជាតិ ព្រមទាំងកសាងធនធានយុវជនឱ្យមានកាយសម្បទារឹងមាំ វិន័យ ស្មារតីជាតិទទួលខុសត្រូវ និងជំនាញវិជ្ជាជីវៈ ដើម្បីក្លាយជាមូលធនមនុស្សប្រកបដោយសមត្ថភពិតប្រាកដ និងមានតម្លៃសម្រាប់សង្គមជាតិ។

គួរបញ្ជាក់ថា ក្នុងដំណាក់កាលដំបូងនេះ ក្រសួងការពារជាតិទទួលបានពាក្យស្ម័គ្រចិត្តសរុបចំនួន ១៤.៦៤៦នាក់ ក្នុងនោះមានស្ត្រី ២.៤១៧នាក់។ រាជរដ្ឋាភិបាលបានអនុញ្ញាតឱ្យក្រសួងការពារជាតិជ្រើសរើសយុវជនចំនួន ១០.០០០នាក់ សម្រាប់ឆ្នាំ២០២៦ ដោយបែងចែកជាពីរវគ្គ។ សម្រាប់វគ្គដំបូង យុវជនចំនួន ៥.០០០នាក់ ត្រូវបានជ្រើសរើស និងហ្វឹកហ្វឺននៅតាមសាលាហ្វឹកហ្វឺនទាំង៨ របស់ក្រសួងការពារជាតិរយៈពេល៣ខែ មុននឹងបញ្ជូនទៅបំពេញការងារជាក់ស្តែងនៅតាមកងឯកភាពនានា៕ អត្ថបទ៖ វង្ស សុភាព