រដ្ឋមន្ត្រីក្រសួងផែនការ ចុះជួបសំណេះសំណាល និងសាកសួរសុខទុក្ខថ្នាក់ដឹកនាំ និងមន្រ្តីរាជការ នៃមន្ទីរផែនការខេត្តព្រះវិហារ

នៅរសៀលថ្ងៃទី១០ ខែកញ្ញា ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានអញ្ជើញចុះជួបសំណេះសំណាល និងសាកសួរសុខទុក្ខដល់ថ្នាក់ដឹកនាំ និងមន្ត្រីរាជាការ នៃមន្ទីរផែនការខេត្តព្រះវិហារ ដោយមានការអញ្ជើញចូលរួមពីសំណាក់​ លោក វ៉ាត ប៉ារ៉ានីន អភិបាលរងខេត្ត​ ប្រតិភូអមដំណេីរ​ ថ្នាក់ដឹកនាំ និងមន្ត្រីរាជការ នៃមន្ទីរផែនការខេត្តព្រះវិហារជាច្រើនរូប។

លោកស្រី ស៊ាន សុគីន ប្រធានមន្ទីរផែនការខេត្ត បានលើកឡើងអំពីស្ថានភាព​ភូមិសាស្ត្រ ប្រជាសាស្ត្រ និងសក្តានុពលខេត្ត និងជម្រាបជូនអំពីតួនាទី ភារកិច្ច រចនាសម្ព័ន្ធដឹកនាំ និងស្ថានភាពមន្ត្រីរាជការមន្ទីរផែនការ ​ពិសេសសមិទ្ធផលការងារដែល សម្រេចបានរយៈពេល ១៥ខែ ​ដែលលោកស្រីទទួលតំណែងជាប្រធានមន្ទីរផែនការ​ រួម​និងបញ្ហាប្រឈម និងសំណូមពរ​ដែលជាតម្រូវការចាំបាច់ក្នុងការបំពេញការងារ។

នាឱកាសនោះ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ​ បានថ្លែងកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែង របស់លោកស្រីប្រធានមន្ទីរ ថ្នាក់ដឹកនាំ និងមន្ត្រីរាជការ នៃមន្ទីរផែនការខេត្ត និង លើកទឹកចិត្តដល់ការកសាង និងអភិវឌ្ឍន៍​សមត្ថភាព​មន្ត្រីរាជការឱ្យកាន់​តែមានប្រសិទ្ធភាព គុណភាព និងឯកភាពផ្ទៃក្នុង។

ឯកឧត្តមរដ្ឋមន្ត្រី បានគូសបញ្ជាក់ថា ដើម្បីភាពជាក់លាក់នៃការរៀបចំគោលនយោបាយ គឺមាន​តែទិន្នន័យនោះទេ ដែលជាសូចនាករមួយ បញ្ជាក់អំពីលទ្ធផល និងទិសដៅ ពិតប្រាកដ​ ក្នុងនោះ​ទិន្នន័យ កើតចេញអំពីប្រភព ០២សំខាន់ៗគឺ៖ ០១.ទិន្នន័យមកពីការជំរឿន និង ០២.ទិន្នន័យរដ្ឋបាល។

ឯកឧត្តមបញ្ជាក់ទៀតថា ទិន្នន័យជំរឿនដែលមានតាមច្បាប់ស្ថិតិមាន ០៣សំខាន់ៗគឺ៖ ០១.ជំរឿនប្រជាជន ០២.ជំរឿនសេដ្ឋកិច្ច និង០៣.ជំរឿនកសិកម្ម ដែលមានរយៈពេល ១០ឆ្នាំម្តង។ ហើយទិន្នន័យរដ្ឋបាល ជាប្រភពធំសម្រាប់រៀបចំគោលនយោបាយ ស្របតាមអនុសាសន៍​របស់​សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រី​នៃព្រះរាជាណា​ចក្រ​កម្ពុជា “គោល​នយោបាយ ពឹងផ្អែកលើទិន្នន័យ”។ ដូច្នេះហើយ​មន្ទីរផែនការខេត្ត ត្រូវបំពេញមុខងារជាសេនាធិការ ជូនក្រសួងផែនការ លើបេសកកម្មដឹកនាំអនុវត្ត​សម្របសម្រួល ​និងគ្រប់គ្រងលើសកម្មភាពការងារ វិស័យ​ផែនការ ស្ថិតិប្រជាជន និងអភិវឌ្ឍន៍ ដើម្បីជំរុញការអភិវឌ្ឍសេដ្ឋកិច្ច សង្គមកិច្ច ដោយធានា​គុណភាព និងប្រសិទ្ធភាពនៅថ្នាក់ក្រោមជាតិ ។ ដោយមើលឃើញ អំពីសារៈសំខាន់ នៃការធ្វើអង្កេត និងជំរឿន ​ព្រមទាំងការគិតគូររបស់រាជរដ្ឋាភិបាល ​ចំពោះការធ្វើទំនើបកម្មស្ថិតិជាតិ ដែល​ក្នុងនោះក្រសួងផែនការ មានគោលដៅប្រែក្លាយការប្រមូលទិន្នន័យដោយប្រើកម្រង សំណួរលើ​ក្រដាស ទៅជាការប្រើប្រាស់ឧបករណ៍ថេបប្លេតជំនួសវិញ ដើម្បីបង្កលក្ខណៈងាយ ស្រួលដល់​មន្ត្រីប្រមូលទិន្នន័យ ក្នុងការចុះធ្វើអង្កេតជំរឿន ចន្លោះជំរឿន៕