សមត្ថកិច្ច កោតសរសើរចំពោះប្រជានេសាទដែលយល់ដឹង ស្ម័គ្រចិត្តចូលរួមថែរក្សាធនធានសមុទ្រកម្រ

កែប៖ នៅថ្ងៃទី១១ ខែកញ្ញានេះ នាយនាវី មេបញ្ជាការស្នាក់ការសង្កេតការណ៍សន្តិសុខកោះពោធិ៍ នៃទី បញ្ជាការជួរមុខអគ្គលេខាធិការដ្ឋាននៃគណៈកម្មការជាតិសន្តិសុខលម្ហសមុទ្រ បានប្រាប់ឱ្យដឹងថា ប្រជានេសាទ បានយល់ដឹងស្ម័គ្រចិត្តចូលរួមអភិរក្សធនធានសមុទ្រកម្រ ដោយបានប្រគល់អណ្ដើកសមុទ្រ (ល្មិច) ដែលពួកគេនេសាទបានជូនមកស្នាក់ការជាបន្តបន្ទាប់ ចាប់ពីចុងខែសីហា រហូតមកដល់ថ្ងៃទី១០ ខែកញ្ញា ឆ្នាំ២0២៤ សរុបចំនួន០៣ក្បាល ។

កាលពីម្សិលមិញ ប្រជានេសាទ ឈ្មោះ ឆុយ ណុប ភេទប្រុស អាយុ៣២ឆ្នាំ មុខរបរនេសាទ នៅភូមិកែប សង្កាត់កែប ក្រុង-ខេត្តកែប បានយកសត្វអណ្ដើកសមុទ្រ (ល្មិច) មួយក្បាលទៀត មកប្រគល់ឱ្យស្នាក់ការសង្កេតការណ៍សន្តិសុខកោះពោធិ៍ សរុបចំនួន០៣ក្បាល ដើម្បីរៀបចំលែងវាឱ្យទៅនៅក្នុងសមុទ្រធម្មជាតិវិញ ។

មន្ត្រីជំនាញអធិការដ្ឋានរដ្ឋបាលជលផលសមុទ្រ បានបញ្ជាក់ថា ការប្រគល់អណ្ដើកសមុទ្រ (ល្មិច) ឱ្យសមត្ថកិច្ច គឺជាសកម្មភាពគំរូល្អ និងជាការបណ្ដុះស្មារតីចូលរួមក្នុងការងារ​អភិរក្សធនធាន​ធម្មជាតិ សមុទ្រសម្រាប់សង្គមជាតិ ។

សត្វអណ្ដើកសមុទ្រ មានចំនួន៥ប្រភេទ គឺ១. ក្រាស់ (Hawksbill Turtle) ២. ល្មិច (Green Turtle) ៣. ល្មិចក្បាលធំ (Loggerhead Turtle) ៤. ល្មិចប្រផេះ (Olive Ridley Turtle) និង៥. ល្មិច ព្រុយបី (Leatherback Turtle) ។ ប្រភេទក្រាស់ ទីកន្លែងរស់នៅរបស់វា គឺតំបន់ផ្កាថ្ម រីឯល្មិច គឺតំបន់ស្មៅ សមុទ្រ ។ នៅព្រះរាជាណាចក្រកម្ពុជា ពួកវា គឺជាប្រភេទសត្វសមុទ្រកម្រ ដែលស្ថិត​នៅក្នុង​បញ្ជីកំពុងរង គ្រោះថ្នាក់ (រងការបំផ្លាញ) ដូចនេះ ការងារអភិរក្ស គឺត្រូវមានការចូលរួម​ពី​សាធារណជនគ្រប់មជ្ឈដ្ឋាន ​គ្រប់ស្ថាប័នទាំងអស់ សម្រាប់បង្កបង្កើតធនធានធម្មជាតិ​ឱ្យបានសម្បូរបែបឡើងវិញ ៕ អត្ថបទ៖ គង់ ប៊ុនថា