ក្រសួងកសិកម្ម និង ADB ជួបពិភាក្សាគ្នាលើគម្រោងការលើកកម្ពស់សុវត្ថិភាពផ្នែកកសិកម្ម

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីរសៀលថ្ងៃទី១២ កញ្ញា ឆ្នាំ២០២៤ បានទទួលជួប​សម្តែង​ការ​គួរសម​ជាមួយ​ក្រុម​បេសកកម្ម​វាយ​តម្លៃ​ពាក់​កណ្តាល​អាណត្តិ នៃធនាគារអភិវឌ្ឍន៍អាស៊ី សម្រាប់គម្រោងប្រកួតប្រជែងខ្សែច្រវាក់តម្លៃ និង​លើក​កម្ពស់​សុវត្ថិភាពកសិកម្ម នៅទីស្តីការក្រសួង។

នៅក្រោយចប់ជំនួបការងារនេះ ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្នុង​ជំនួប​នេះ ឯកឧត្តមរដ្ឋមន្ត្រី បានស្វាគមន៍ចំពោះការវាយតម្លៃការងារគម្រោង និង​បន្ត​ធ្វើ​ការ​សហការ​ជិត​ស្និទ្ធ​ជាមួយ​គ្នា ដើម្បីចូលរួមជួយវិ​ស័យកសិកម្ម​កម្ពុជា​ស្រប​តាម​គោល​នយោ​បាយ​នៃ​រា​ជ​រដ្ឋាភិបាល​កម្ពុជា នីតិកាលទី៧ ជាពិសេសចូលរួមជំរុញសហគមន៍កសិកម្មទំនើប។

ឯកឧត្តមរដ្ឋមន្ត្រី បានគូសបញ្ជាក់ថា គម្រោងអាច​ពិនិត្យ​លទ្ធភាព​បន្ថែម​ក្នុង​ការ​គាំ​ទ្រ​ដល់​មន្ទីរ​ពិសោធន៍ជាតិ ដែលមានសមត្ថភាពត្រួតពិនិត្យគុណភាពផលិតកសិកម្ម និងចំណីអាហារ ដើម្បី​ធានា​សុវត្ថិភាពផលិតផលសម្រាប់អ្នកប្រើប្រាស់។ ឯកឧត្តម បានលើកឡើងពី​កសិផល​សក្ដានុពល​របស់កម្ពុជា ដូចជា ស្វាយចន្ទី ដំឡូងមី និងស្វាយស្រស់ ដែលគម្រោង​អាច​ពិចារណា​ជួយ​គាំទ្រ​អភិវឌ្ឍ និងពង្រឹងខ្សែច្រវាក់តម្លៃ ចាប់ពីការដាំដុះ កែច្នៃ រហូតដល់ទីផ្សារ និងនាំចេញ ធ្វើ​យ៉ាង​ណាឱ្យកសិករ និងសហគមន៍កសិកម្មទំនើប ទទួលបានផលចំនេញ និងតម្លៃ​បន្ថែម​ខ្ពស់​។

បើតាម ឯកឧត្តមរដ្ឋមន្ត្រី កម្ចីជាមួយអត្រាការប្រាក់ទាប ក៏ជាតម្រូវការសំខាន់សម្រាប់កសិករ និង​សហគមន៍កសិកម្មទំនើប ដើម្បីជួយឱ្យពួកគាត់អាចពង្រឹងផលិតកម្មឱ្យកាន់តែមានប្រសិទ្ធភាព និង​អាចទិញផលិតផលកសិកម្មបានទាន់ពេលវេលាសម្រាប់ស្តុកទុកនិងកែច្នៃ ជាជាង​លក់​ផលិត​ផល​កសិកម្មភ្លាមៗ ដែលនាំឱ្យបាត់បង់តម្លៃបន្ថែម។

ក្រសួងកសិកម្ម បានបញ្ជាក់បន្ថែមថា តាមរយៈជំនួបនេះ ភាគីទាំងសងខាង បានលើក​ឡើង​អំពី​ការ​បន្ត​កិច្ចសហការបន្ថែមទៀត ដោយនឹងពិនិត្យតាម​ដាន​រួម​គ្នាក្នុ​ង​ការ​អនុវត្ត​គម្រោង​ឱ្យ​មាន​ប្រសិទ្ធ​ភាព និងមាននិរន្តរភាព ដែលអាចផ្តល់ប្រយោជន៍ដល់កសិករពិតប្រាកដ៕ អត្ថបទ ឈិត បូរ៉ាវី