អភិបាលខេត្តតាកែវ ច្រានចោលការលើកឡើងថា មានការបង្ខិតបង្គោលព្រំដែន នៅច្រកទ្វាអន្តរជាតិព្រំដែនភ្នំដិន

តាកែវ៖ ថ្លែងនៅក្នុងពិធីសំណេះសំណាលជាមួយមន្រ្តីរាជការមន្ទីរកសិកម្មរុក្ខាប្រមាញ់ និងនេសាទ ខេត្តតាកែវ នៅថ្ងៃទី១៣ ខែកញ្ញា ឆ្នាំ២០២៤នេះ ឯកឧត្តម វ៉ី សំណាង អភិបាលខេត្តតាកែវ បានធ្វើការច្រានចោលទាំងស្រុងចំពោះការចោទប្រកាន់របស់ក្រុមប្រឆាំងថា មានការបង្ខិតបង្គោលព្រំដែនលេខ២៧៥ ចំនួន១៧០០ ម៉ែត្រ នៅច្រកទ្វាអន្តរជាតិភ្នំដិន ស្ថិតនៅក្នុងស្រុកគីរីវង់ ខេត្តតាកែវ ។

ឯកឧត្តមអភិបាលខេត្តតាកែវ បានលើកឡើងបន្ថែមថា ការចោទប្រកាន់នេះ គឺជារឿង​មិន​ពិតនោះទេ។ ស្ថានភាពបង្គោលព្រំដែនលេខ២៧៥ នៅច្រកទ្វាអន្តរជាតិជាតិភ្នំដិន នៅគឺនៅដដែរ គ្មានការដក ឬបង្ខិតបង្គោលដូចការចោទប្រកាន់ របស់ក្រុមប្រឆាំងនោះទេ។

ឯកឧត្តម វ៉ី សំណាង បានថ្លែងបន្តថា បន្ទាប់ពីមានការចោទប្រកាន់​របស់​ក្រុមប្រឆាំងថា​មាន​ការ​បង្ខិតបង្គោលព្រំដែននៅច្រកទ្វាអន្តរជាតិភ្នំដិន ​មានក្រុមអង្គការ​សង្គមស៊ីវិល ក្រុមយុវជន និង​ក្រុមជំនួយការរបស់ថ្នាក់ដឹកនាំបានចុះទៅដល់ទីតាំងបង្គោលព្រំដែនលេខ២៧៥ ហើយបាន​ជួប​ជាមួយអាជ្ញាធរ និងសមត្ថកិច្ចដែលឈរជើង​នៅច្រកទ្វាព្រំដែន​អន្តរជាតិភ្នំដិន​ និង​បានឃើញ​ដោយផ្ទាល់​បង្គោលព្រំដែនគឺមិនមានការបង្ខិតបង្គោលអ្វីទាំងអស់។

ឯកឧត្តមអភិបាលខេត្តតាកែវ ក៏​បាន​ផ្ដាំផ្ញើ​ដល់​ក្រុម​ប្រឆាំង​ដែល​នៅ​តែ​មិនជឿថា​ ​មិន​មាន​ការ​បង្ខិត​បង្គោលព្រំដែន​នៅច្រកទ្វាអន្តរជាតិភ្នំដិន ​សូម​ទាក់ទង​មក​អាជ្ញាធរខេត្ត​ ហើយអាជ្ញាធរ និង​ជូនពួកគាត់ចុះទៅពិនិត្យមើលដល់ទីតាំងបង្គោលលេខ២៧៥ នៅច្រកទ្វាព្រំដែន ដោយ​ការ​ធ្វើដំណើរ និងការហូបចុកអាជ្ញាធរខេត្តតាកែវ ជា​អ្នក​រ៉ាប់រង​ថ្លៃ​ចំណាយទាំងអស់៕