នាយឧត្តមសេនីយ៍ មាស សាវ៉ន ជួបសំណេះសំណាលនិងបើកប្រាក់ឧបត្ថម្ភគោលនយោបាយជូនយោធិនពិការជាង៥០០នាក់

ភ្នំពេញ ៖ នាយឧត្តមសេនីយ៍ មាស សាវ៉ន អគ្គនាយក អគ្គនាយកដ្ឋានយោធសេវា និងជាអនុប្រធានអចិន្ត្រៃយ៍គណៈកម្មការដោះស្រាយគោលនយោបាយ យោធិនប្រភេទ២ និងសោធននិវត្តន៍ ក្រសួងការពារជាតិ នៅថ្ងៃទី១៣ ខែកញ្ញា ឆ្នាំ២០២៤នេះ បានអញ្ជើញជួបសំណេះសំណាល និងបើកប្រាក់ឧបត្ថម្ភគោលនយោបាយជូនយោធិនពិការ គ្រួសារយោធិនពលី និងសោធននិវត្តន៏ មកពីកងឯកភាព ចំណុះឲ្យក្រសួងការពារជាតិ អគ្គបញ្ជាការដ្ឋាន បញ្ជាការដ្ឋានកងទ័ពជើងគោក សរុបចំនួ៥៤៩ នាក់។

ថ្លែងនៅក្នុងពិធីនេះ នាយឧត្តមសេនីយ៍ មាស សាវ៉ន បានលើកឡើងថា ថ្នាក់រាជរដ្ឋាភិបាលក៏ដូចជាថ្នាក់ដឹកនាំនៃក្រសួងការពារជាតិ បានយកចិត្តទុកដាក់ ចំពោះនាយទាហានជាន់ខ្ពស់ ដែលត្រូវចូលនិវត្តន៍ និងគ្រួសារយោធិនពលីទាំងអស់ ដែលមានវត្តមាននៅទីនេះ រួមជាមួយ មោទនភាព និងមនោសញ្ចេតនា ស្រឡាញ់រាប់អាន ហើយការប្រារព្ធពិធីសំណេះសំណាលនៅពេលនេះ គឺពិតជាមានអត្ថន័យយ៉ាងជ្រាលជ្រៅ និងកិត្តិយសខ្ពង់ខ្ពស់បំផុត ដែលជាគុណបំណាច់របស់យោធិនគ្រប់រូប ក្នុងការចូលរួមបំពេញតួនាទី ភារកិច្ចបម្រើជាតិមាតុភូមិ ធ្វើពលិកម្មយ៉ាងធំធេង ទាំងក្នុងការរំដោះប្រទេសជាតិ សង្គ្រោះប្រជាជន ចូលរួមទប់ស្កាត់ការវិលត្រឡប់នូវរបបប្រល័យពូជសាសន៍ប៉ុលពត ពិសេសចូលរួមក្នុងចលនាបង្រួបបង្រួមជាតិ តាមរយៈកម្មវិធីនយោបាយឈ្នះឈ្នះ នាំមកនូវសុខសន្តិភាពពេញលេញ. ប្រទេសជាតិមានការអភិវឌ្ឍន៍រីកចម្រើនលើគ្រប់វិស័យ ប្រកបដោយកិត្យានុភាពជាបន្តបន្ទាប់រហូតដល់សព្វថ្ងៃនេះ។

ជាមួយគ្នានោះដែរនាយឧត្តមសេនីយ៍ ក៏បានធ្វើការកោតសសើរ និងវាយតម្លៃខ្ពស់ រាល់សមិទ្ធផលការងារទាំងអស់នេះ ស្ដែងឲ្យឃើញនៅកិច្ចខិតខំប្រឹងប្រែងប្រកបដោយពលិកម្ម និងការប្តេជ្ញាចិត្ត ខ្ពស់ របស់ថ្នាក់ដឹកនាំនៃក្រសួងការពារជាតិ គ្រប់លំដាប់ថ្នាក់ ស្របតាមអនុសាសន៍ និងយុទ្ធសាស្ត្របច្ចកោណរបស់ប្រមុខរាជរដ្ឋាភិបាល ដែលដឹកនាំដោយ សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការកែទម្រង់ និងលើកកម្ពស់ជីវភាពរបស់យោធិនក្រោយពេលផ្ដាច់ចេញពីក្របខណ្ឌនៃកងយោធពលខេមរភូមិន្ទនេះទៅ ឲ្យមានភាពរីកចម្រើន ល្អប្រសើរបន្ថែមទៀត៕

អត្ថបទ បាន ចក់