បាក់ទំនប់អាងទឹកស្អាតរបស់ក្រុមហ៊ុន ANCO Water Supply នៅឃុំភ្ញីមាស ស្រុកគិរីសាគរ

កោះកុង ៖ កម្លាំងទឹកហូរពីជ្រលងលើភ្នំបានបុកផ្តាច់បាក់ទំនប់អាងទឹករបស់ក្រុមហ៊ុន ANCO Water Supply ភូមិកៀនក្រឡាញ់ នៅឃុំភ្ញីមាស ស្រុកគិរីសាគរ ខេត្តកោះកុង។

យោងតាមផេកបណ្តាញសង្គមហ្វេសប៊ុកផ្លូវការរបស់មន្ទីរធនធានទឹក និងឧត្តុនិយមខេត្តកោះកុង បានឲ្យរសៀលថ្ងៃទី១៨ ខែកញ្ញា ឆ្នាំ២០២៤ថា ការបាក់ទំនប់អាងទឹកនេះ កាលពីវេលាម៉ោង១០ព្រឹកមិញ ដែលបណ្តាលឲ្យជន់លិចផ្ទះបងប្អូនប្រជាពលរដ្ឋចំនួន៣ខ្នង ក្នុងភូមិកៀនក្រឡាញ់ និងលិចចូលសាលារៀនពាមកាយ ក្នុងឃុំភ្ញឺមាស១ខ្នង ព្រមទាំងផលដំណាំមួយចំនួន ស្ថិតក្នុងឃុំភ្ញីមាស និងភូមិព្រែកស្មាច់ ភូមិពាមកាយ ស្ថិតក្នុងឃុំកោះស្តេច ស្រុកគីរីសាគរ។

ដោយឡែកលោក ចេង មុនីរិទ្ឋ អភិបាលស្រុកគិរីសាគរ ក៏បង្ហាញដែរថា មិនមានពលរដ្ឋណាម្នាក់គ្រោះថ្នាក់ដោយសារតែការលិចធ្លាយទំនប់អាងទឹករបស់ក្រុមហ៊ុន ANCO Water Supplyនេះនោះទេ គ្រាន់តែវាលិចធ្លាយទំបន់តិចបន្តិចបន្តួចប៉ុណ្ណោះ ហើយបរិមាណវាហូរទៅតាមតែខ្សែទឹកចាស់មិនបង្កគ្រោះថ្នាក់ដល់ពលរដ្ឋធ្ងន់ធ្ងរនោះឡើយ។

ប៉ុន្តែអាជ្ញាធរ និងមន្រ្តីសមត្ថកិច្ចជំនាញពាក់ព័ន្ឋ បានកំពុងតាមដានយ៉ាងយកចិត្តទុកដាក់បំផុតពីស្ថានភាពនៃកម្ពស់ទឹកភ្លៀងហក់ឡើងនេះ ដោយត្រៀមជម្លៀសប្រជាពលរដ្ឋទៅទីទួលសុវត្ថិភាពអោយបានទាន់ពេលវេលា។

ទន្ទឹមនឹងការបាក់ទំនប់អាងទឹកនេះដែរ គេសង្កេតឃើញថា បរិមាណទឹកភ្លៀងបង្អុលជាច្រើនធ្លាក់នៅលើកោះស្តេច ហើយអាជ្ញាធរចុះត្រួតពិនិត្យមើលតាមប្រឡាយទឹកតាមខ្នងរបស់មុខផ្ទះរបស់ពលរដ្ឋដែលមានសំរាមកកស្ទះមាត់លូ និងផ្សព្វផ្សាយពីការប្រុងប្រយ័ត្នខ្ពស់ពីធាតុអាកាសអំឡុងពេលនេះ៕ អត្ថបទៈ ឈឹម មករា