ប្រភពទៅកាន់សារព័ត៌មានRT៖ អ៊ីរ៉ង់នឹងសងសឹករាល់ការវាយប្រហាររបស់អ៊ីស្រាអែលលើវិស័យថាមពល

ប្រភពមួយក្នុងទីក្រុងបតេអេរ៉ង់(Tehran)ប្រទេសអ៊ីរ៉ង់ ដែលដឹងបញ្ហានេះបានប្រាប់សារព័ត៌មាន RT កាលពីថ្ងៃព្រហស្បតិ៍សប្ដាហ៍នេះថា ប្រទេសអ៊ីរ៉ង់ បានត្រៀមខ្លួនយ៉ាងពេញលេញដើម្បីការពារខ្លួន និងសងសឹកប្រឆាំងរាល់ការវាយប្រហារដ៏ខ្លាំងក្លាណាមួយដោយអ៊ីស្រាអែល រួមទាំង   ទីតាំងប្រេង និងនុយក្លេអ៊ែររបស់ខ្លួន។

ប្រភពដដែលបានពន្យល់ថា ការសងសឹកប្រឆាំងការវាយប្រហារដ៏ខ្លាំងក្លា នឹងមានលក្ខណៈសមាមាត្រ ផ្អែកលើបទដ្ឋានក្នុងស្រុក និងអន្តរជាតិ។ ជាឧទាហរណ៍ ប្រសិនបើអ៊ីស្រាអែលដាក់គោលដៅលើហេដ្ឋារចនាសម្ព័ន្ធប្រេងរបស់អ៊ីរ៉ង់ ទីក្រុងតេអេរ៉ង់ នឹងឆ្លើយតបការវាយប្រហារលើរោងចក្រចម្រាញ់ប្រេងសំខាន់ៗចំនួនបីនៅក្នុងប្រទេសនោះវិញ។

ប្រភពខាងលើនេះបានបន្ថែមថា ការវាយប្រហារលើហេដ្ឋារចនាសម្ព័ន្ធផ្សេងទៀត ដូចជារោងចក្រថាមពល ឬទីតាំងនុយក្លេអ៊ែរ នឹងជំរុញឱ្យមានការវាយប្រហារសងសឹកគ្នាទៅវិញៅមក។

បុគ្គលនោះបានប្រាប់សារព័ត៌មាន RT ដោយពុំបានបញ្ជាក់លម្អិតថា ក្នុងករណីមានជនស៊ីវិលណាម្នាក់រងគ្រោះថ្នាក់ក្នុងការវាយប្រហារដ៏ខ្លាំងក្លា ឬតំបន់ជនស៊ីវិលត្រូវបានគេកំណត់គោលដៅ នោះ   ទីក្រុងតេអេរ៉ង់ នឹងត្រូវបានជំរុញឱ្យពិនិត្យឡើងវិញនូវគោលការណ៍នុយក្លេអ៊ែររបស់ខ្លួន។

គួររម្លឹកថា អ៊ីរ៉ង់បានទម្លាក់គ្រាប់បែកលើអ៊ីស្រាអែលដោយបាញ់មីស៊ីលកាលពីថ្ងៃអង្គារសប្តាហ៍មុន វាយប្រហារលើមូលដ្ឋានយោធាជាច្រើន ជាអ្វីដែលទីក្រុងតេអេរ៉ង់បាននិយាយថាជាការឆ្លើយតបទៅនឹងការសម្លាប់មេដឹកនាំក្រុមហាម៉ាស និងក្រុមហេសបូឡានាពេលថ្មីៗនេះពីសំណាក់អ៊ីស្រាអែល។ អ៊ីស្រាអែលបានប្តេជ្ញាថានឹងបើកការវាយប្រហារដ៏ខ្លាំងក្លាបំផុតជាការសងសឹក៕