អ៊ីស្រាអែល បាញ់ស្រោចលើជំរំតង់ពលរដ្ឋហ្កាហ្សាសម្លាប់មនុស្សជាច្រើន ខណៈការវាយឆ្មក់លើភាគខាងជើងកាន់តែខ្លាំង

ជនភៀសខ្លួនប៉ាឡេស្ទីនបានជួបហេតុការណ៍ដ៏រន្ធត់ដោយសារភ្លើងឆេះជំរំតង់របស់ពួកគេនៅព្រឹកថ្ងៃចន្ទ ១៤តុលាសប្ដាហ៍នេះ បន្ទាប់ពីការវាយប្រហារតាមអាកាសរបស់អ៊ីស្រាអែលចំមន្ទីរពេទ្យ អាល់ អាកសា (Al Aqsa) នៅកណ្តាលដែនដីហ្កាហ្សា។

ក្រុមគ្រូពេទ្យបានរាយការណ៍ថា មនុស្ស២៧នាក់បានស្លាប់ និងរាប់សិបនាក់ផ្សេងទៀតបានរងរបួស ខណៈពលរដ្ឋនិយាយថាគ្មានសុវត្ថិភាពទេ មិនថាជាមន្ទីរពេទ្យ សាលារៀន ឬកន្លែងណាក៏ដោយក្នុងតំបន់ហ្កាហ្សានេះ។ពួកគេមនិយាយថា ជិត៥ថ្ងៃមកនេះ អ៊ីស្រាអែល បានវាយប្រហារលើសាលារៀន ហើយថ្ងៃនេះពួកគេវាយប្រហារស្រោចលើជំរំតង់ជនភៀសខ្លួន ដូចឃើញស្រាប់ហើយ តើយើងអាចធ្វើយ៉ាងណា?

ចំណែកយោធាអ៊ីស្រាអែលបាននិយាយថា ខ្លួនបានវាយប្រហារក្រុមសកម្មប្រយុទ្ធដែលធ្វើប្រតិបត្តិការពីមជ្ឈម្ឌលបញ្ជាការមួយនៅក្នុងបរិវេណនោះ។ អ៊ីស្រាអែលបានចោទក្រុមហាម៉ាសថាបានប្រើគ្រឿងបរិក្ខារស៊ីវិលក្នុងគោលបំណងយោធា ដែលហាម៉ាសបដិសេធ។ការវាយប្រហារនេះបានកើតឡើង ខណៈកងកម្លាំងអ៊ីស្រាអែល បានពង្រីកការវាយឆ្មក់របស់ពួកគេចូលទៅក្នុងតំបន់ហ្កាហ្សាភាគខាងជើង។ក្រុមអ្នកស្រុកបាននិយាយថា យោធាបានទម្លាក់គ្រាប់បែកកាត់ផ្ដាច់តំបន់ជាច្រើននៅចុងភាគខាងជើងនៃតំបន់រងការឡោមព័ទ្ធនេះ រួមទាំងជំរំ ចាបាលីយ៉ា (Jabalia) ដែលជាជំរំជនភៀសខ្លួនជាប្រវត្តិសាស្ត្រដ៏ធំបំផុតរបស់ដែនដីហ្កាហ្សាផងដែរ។

យោធាអ៊ីស្រាអែលបាននិយាយមុននេះថា ខ្លួនបានបញ្ជាឱ្យមានការជម្លៀសនៅក្នុងតំបន់មួយចំនួន រួមទាំងមន្ទីរពេទ្យ Kamal Adwan ផងដែរ។

ក្រុមហាម៉ាសបាននិយាយថា ការទម្លាក់គ្រាប់បែករបស់អ៊ីស្រាអែលទៅលើផ្ទះជនស៊ីវិល និងជម្រកសម្រាប់ជនភៀសខ្លួនក្នុងបំណងបង្ខំអ្នកស្រុកឱ្យចាកចេញពីតំបន់ហ្កាហ្សាម្តងហើយម្ដងទៀត ដែលអ៊ីស្រាអែលបដិសេធ៕