សម្ដេចធិបតី ហ៊ុន ម៉ាណែត ព្រមានចាត់វិធានការច្បាប់ចំពោះអ្នកក្លែងឯកសារកាត់ឆ្វៀលដីរដ្ឋ

ក្នុងឱកាស អញ្ជើញជាអធិបតី ពិធីអបអរសាទរខួបអនុស្សាវរីយ៣០ឆ្នាំ នៃថ្ងៃបង្កើតកងពលតូចលេខ៧០ (១៥ តុលា ១៩៩៤-១៥ តុលា ២០២៤) នាព្រឹកថ្ងៃទី១៥ ខែតុលា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានព្រមានថា អ្នកដែលក្លែងឯកសារកាត់ឆ្វៀលដីរដ្ឋនឹងត្រូវប្រឈមជាមួយផ្លូវច្បាប់។

សម្ដេចធិបតីនាយករដ្ឋមន្រ្ដី មានប្រសាសន៍ថា ចាប់តាំងពីសម្ដេចឡើងកាន់តំណែងជានាយករដ្ឋមន្រ្ដី សម្ដេចមិនងាយសម្រេចឱ្យធ្វើការកាត់ឆ្វៀលដីរបស់រដ្ឋឱ្យបុគ្គលណាមួយនោះទេ ខណៈបច្ចុប្បន្នសម្ដេចកំពុងបញ្ជាឱ្យរដ្ឋមន្រ្ដីក្រសួងរៀបចំដែនដី នគររូបនីយកម្ម និងសំណង់ចុះពិនិត្យវាស់វែងជាក់ស្ដែងករណីមានការស្នើសុំកាត់ឆ្វៀលដីរបស់រដ្ឋ។

ក្នុងឱកាសនោះសម្ដេចធិបតីនាយករដ្ឋមន្រ្ដី ក៏បន្តណែនាំដល់មន្រ្ដីរាជការ និងកងកម្លាំងទាំងអស់កុំឱ្យមានជាប់ពាក់ព័ន្ធនឹងករណីរំលោភបពានដីរដ្ឋ បើមិនដូច្នេះទេនឹងប្រឈមមុខចំពោះផ្លូវច្បាប់។

សម្ដេចក៏បានបញ្ជាឱ្យកងទ័ព និងកងកម្លាំងត្រូវចូលរួមយុទ្ធប្រឆាំងការកាប់ទន្រ្ទាន រុករានធនធានធម្មជាតិ ដីរដ្ឋ ខណៈបច្ចុប្បន្នប្រទេសកម្ពុជាមានសន្ដិភាព កងទ័ព និងកងកម្លាំងទាំងអស់មិនមានតម្រូវការទៅធ្វើសង្គ្រាមទេ ប៉ុន្ដែមានភារកិច្ចចូលរួមថែរក្សាធនធានធម្មជាតិរបស់រដ្ឋឱ្យបានគង់វង្ស។

សូមជម្រាបថា ទាក់ទងនឹងករណីកាត់ឆ្វៀលដីរដ្ឋនេះ កាលពីអាណត្តិមុន ក្រោមការដឹកនាំដោយ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី បញ្ជាឱ្យកាត់ឆ្វៀលដីជូនពលរដ្ឋ រស់ជាក់ស្ដែងនៅក្នុងតំបន់អភិរក្ស និងតំបន់ការពារធម្មជាតិផ្សេងៗរបស់រដ្ឋ។ រហូតមកដល់អាណត្តិទី៧នេះ សម្ដេចធិបតី នាយករដ្ឋមន្រ្ដីបន្តអនុវត្តគោនយោបាយកាត់ឆ្វៀលដី រដ្ឋជូនប្រជាពលរដ្ឋដែលខ្វះដីជាក់ស្ដែង ប៉ុន្ដែសម្ដេចធិបតីក៏បានដាក់បទបញ្ជាដាច់ណាត់ ចាត់វិធានការចំពោះបុគ្គល ឬមន្រ្ដីរាជការណា ដែលពាក់ព័ន្ធទៅនឹងការរំលោភទន្រ្ទានដីរដ្ឋផងដែរ៕

អត្ថបទ៖ វ៉ន ដារ៉ា