សម្តេចធិបតី អំពាវនាវឱ្យកងប្រដាប់អាវុធរួមថែរក្សាសន្តិភាព និងទប់ស្កាត់អ្នកដែលចង់បំផ្លាញសន្តិភាព

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានធ្វើការអំពាវនាវយ៉ាង​ទទូច​ដល់​កងកម្លាំង​ប្រដាប់អាវុធទាំងអស់​ រួមទាំងប្រជាពលរដ្ឋខ្មែរផងដែរ ត្រូវរួមគ្នាជាធ្លុងមួយ​ដើម្បី​បន្តថែរក្សាការពារសុខ សន្តិភាព​ ដែលថ្នាក់ដឹកនាំជំនាន់មុនរកបានមកដោយលំបាក ហើយត្រូវទប់ស្កាត់​ឱ្យខាងតែបានចំពោះជន ជ្រុលនិយមណា ដែលមានចេតនាចង់បំផ្លិចបំផ្លាញ​សុខសន្តិភាពដែលកំពុងមានសព្វថ្ងៃនេះ ។

ក្នុងឱកាសអញ្ជើញចូលរួមជាអធិបតីភាពនៃខួបអនុស្សាវរីយ៍លើកទី៣០ឆ្នាំ នៃការបង្កើតកងពលតូច លេខ៧០ នៅព្រឹកថ្ងៃទី១៥ ខែតុលា នេះ នេះ សម្តេចធិបតី ហ៊ុន ម៉ាណែត នាយករដ្ឋមន្រ្តី បានថ្លែង​បញ្ជាក់ជា ថ្មីថា សន្តិភាព គឺជាកត្តាដែលមិនអាចខ្វះបានសម្រាប់ជំរុញការរីកចម្រើន​របស់​ប្រជាជាតិមួយ ហើយកងទ័ព គឺ ជាតួអង្គដ៏សំខាន់បំផុតក្នុងការថែរក្សាទឹក ដី និងថែរក្សាការពារនូវសុខសន្តិភាពនេះ ។

ជាមួយគ្នានោះដែរ សម្តេចធិបតី នាយករដ្ឋនៃកម្ពុជាក៏បានប្រកាសជាថ្មីម្តងទៀតផងដែរថា មហិច្ឆតា ធំបំផុតរបស់រាជរដ្ឋាភិបាលកម្ពុជានីតិកាលទី៧នេះ ​គឺប្តេជ្ញាការពារឲ្យបាន​ដាច់ខាត​នៃការប៉ុនប៉ង​ណាមួយ​ ដែលបង្កើតភ្លើងសង្រ្គាម ដែលនាំឲ្យប្រទេសជាតិមានខ្ទេចខ្ទាំ។ យ៉ាងណាក៏ដោយសម្តេចធិបតី ​នាយករដ្ឋមន្រ្តីនៃកម្ពុជា ក៏បានថ្លែងអំណរគុណចំពោះកងកម្លាំង​ប្រដាប់​អាវុធទាំងអស់​ដែលបានរួម​សហការគ្នា​ទប់ស្កាត់​បានទាន់ពេល​វេលាចំពោះក្រុមជ្រុលនិយម​មួយ​ក្តាប់តូច ដែលមានចេតនាបះបោរចង់​ផ្តួល​រំលំរាជរដ្ឋាភិបាលស្របច្បាប់ ​ក្នុងថ្ងៃទី ១៨សីហា កន្លងទៅនេះក្រោមការ​ញុះញង់​អុចអាល​របស់​ពួក​អគតិមួយក្តាប់​តូចនៅក្រៅស្រុកផងដែរ ៕អត្ថបទ៖ បាន ចក់