សម្តេចធិបតី បញ្ជាឱ្យផ្អាកបញ្ជូននិស្សិតទៅធ្វើកម្មសិក្សានៅប្រទេសដែលមានការប្រឈម ដោយសង្គ្រាម

សម្តេចធិបតី នាយឧត្តមសេនីយ៍ផ្កាយមាស៤ ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បាន​ដាក់បទបញ្ជាឱ្យបណ្តាអង្គភាព ក្រសួង ស្ថាប័ននានា របស់រាជរដ្ឋាភិបាល ផ្អាកការបញ្ជូននិស្សិត​ទៅធ្វើកម្ម​សិក្សានៅ​ប្រទេស ដែលមាន​ការប្រឈម​ដោយសង្គ្រាមជាពិសេសនៅប្រទេសអ៊ីស្រាអែល។

សម្តេចធិបតីនាយឧត្តមសេនីយ៍ផ្កាយមាស៤ ​បានដាក់បទបញ្ជាបែបនេះ ខណៈអញ្ជើញជាអធិបតី​ក្នុងពិ​ធីអប​អរ​សាទរ​ខួប​អនុស្សាវរីយ៍លើកទី៣០ថ្ងៃបង្កើតកងពលតូចលេខ៧០ កងទ័ពជើង គោក(១៥ តុលា ១៩៩៤-១៥ តុលា ២០២៤)នៅបញ្ជាការដ្ឋានកងពលតូចលេខ៧០ នាព្រឹកថ្ងៃទី១៥តុលានេះ ​​ ។

សម្តេច បានមានប្រសាសន៍ថា ក្រោយពី១ឆ្នាំ នៃស្ថានការណ៍ដែលកំពុងតែកើនឡើងថែម​ទៀតនៅ​ប្រទេស​ដែល​កំពុងប្រឈមនូវស្ថានភាពគ្រោះថ្នាក់ដោយសារសង្គ្រាមនោះ បើទោះបីយើងមិនមាន យន្ត​ហោះ ដើម្បី​ដឹកនិស្សិត​របស់​​យើងចេញមក ប៉ុន្តែការយកចិត្តទុកដាក់របស់រាជរដ្ឋាភិបាល​ជាមួយនិស្សិត និងប្រជាពលរដ្ឋ​យើងែល​រស់​នៅ​ក្នុង​តំបន់​សង្គ្រាមនោះ មិនចោលទេ ហើយសូមផ្តាំព័ត៌មាននេះជូនទៅឪពុក ម្តាយ មាតា បិតា ថា រាជរដ្ឋាភិបាលបើ​ទោះ​បី​នៅ​ប្រទេសយើងមានសន្តិភាព​ យើងក៏មិនបានភ្លេចប្រជាពលរដ្ឋយើង ​ដែលបានរស់នៅ និងរងប្រឈម​នៅ​តំបន់​ដែល​មាន​គ្រោះ​ថ្នាក់ដោយសារសង្គ្រាមនៅប្រទេសអ៊ីស្រាអែលនោះឡើយ។

សម្តេចធិបតី ក៏បានបន្តថា សម្រាប់កងទ័ពមួកខៀវរបស់យើងនៅទីនោះ ដែលមាន១៨៤នាក់​ នៃកងអនុសេនាធំ វិស្វកម្ម និងពហុជំនាញ វត្តមានមានមុខជាក់ស្តែង១៧៧នាក់ ដោយសារ៧នាក់ទៀតអ្នកខ្លះច្បាប់ និងអ្នកខ្លះ​ជាប់​បេសកកម្មផ្សេង​ដឹកនាំ​ដោយវរៈសេនីយ៍ឯក សោម នាងហ៊ី ជាស្ត្រី​ ជានាយទាហាននារីម្នាក់ ដែលមាន​ភាព​អង់​អាចក្លាហាន និងភាពម្ចាស់ការ សម្តេចបានទាក់ទងទូរស័ព្ទជាមួយជាប់ជាប្រចាំ​ បន្ថែមលើអ្វី​ដែល​ឯកឧត្តម ទៀ សីហា ​និងឯកឧត្តម សុខ ចិន្តាសោភា ដើម្បីតាមដាន ដើម្បីឱ្យពួកគាត់ប្រុងប្រយ័ត្ន៕អត្ថបទ មុត​ សុទ្ធ