សម្តេចធិបតី ណែនាំពិនិត្យលើការដាក់យោធិនចូលនិវត្ត ដោយមិនត្រូវគិតតែពីអាយុនោះទេ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានណែនាំឱ្យពិនិត្យលើការដាក់យោធិនចូលនិវត្ត ដោយមិនត្រូវគិតតែពីអាយុនោះទេ ពោលគឺបានផ្ដល់គោលការណ៍ ដល់ក្រសួងការពារជាតិ ត្រូវពិនិត្យ មើលចំពោះយោធិនចូលនិវត្តន៍ប្រភេទ២ ដែលមានជំនាញ ត្រូវរក្សាទុកសិន ។

សម្ដេចធិបតី ហ៊ុន ម៉ាណែត នាយករដ្ឋមន្ត្រី ក្នុងឱកាសអញ្ជើញជាអធិបតី នៃពិធីអបអរសាទរខួបអនុ ស្សាវរីយ៍ ៣០ឆ្នាំ នៃថ្ងៃបង្កើតកងពលតូចលេខ៧០ នៅព្រឹកថ្ងៃទី១៥ ខែតុលា នេះ បាន ផ្ដល់គោលការណ៍ដល់ ក្រសួងការពារជាតិឱ្យយកចិត្តទុកដាក់ទៅលើនាយទាហាន នាយទាហានរង និងពលទាហានប្រភេទ២ ដែល មានជំនាញ នៅមានសុខភាពល្អ ត្រូវរក្សាទុកសិន ដើម្បីបំពេញចន្លោះ ទ័ពជំនាញ ដើម្បីបន្ស៊ាំបណ្ដុះបណ្ដាល អ្នកបន្តវេនដូចជាជំនាញរថក្រោះ កាំភ្លើងធំ វិស្វកម្ម និងជំនាញផ្សេងៗទៀត ។

សម្ដេចធិបតី ហ៊ុន ម៉ាណែត ក៏បានបញ្ជាក់ថា យោធិនដែលដល់អាយុហើយនៅក្មេង នៅមាន កម្លាំងមាំ មួន នៅមានឆន្ទៈ ជាពិសេសបានបន្ស៊ាំ ជំនាញរួចស្រេចទៅហើយ ពួកគេមិនអាច បោះបង់ការងារជំនាញរបស់គេេ ខណៈពេលដែលមិនទាន់អាចជ្រើសរើសកងទ័ពថ្មីបានដែរនោះ ៕អត្ថបទ៖ នីតា