សិស្សនិស្សិតវិទ្យាស្ថាន NPIC ចំនួន១០០នាក់ ទទួលការបណ្តុះបណ្តាល​វិជ្ជាជីវៈ​មុនចុះ​កម្មសិក្សា​តាមបណ្តាក្រុមហ៊ុន

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងឯកឧត្តម KIM Jin-Pyo (គីម ជីនផ្យូ) ប្រធានស្ថាប័នសិក្សាផ្នែកនវានុវត្តន៍សាកល និងជា​អតីត​ប្រធាន​រដ្ឋសភា​ជាតិ​នៃ​សាធារណរដ្ឋកូរ៉េ បានអញ្ជើញជាអធិបតីក្នុងពិធីបើក «វគ្គបណ្តុះបណ្តាលវិជ្ជាជីវៈ និងបណ្តុះ​បណ្តាល​មុន​ចុះកម្មសិក្សាដល់សិស្សនិស្សិត នៃវិទ្យាស្ថានជាតិពហុបច្ចេកទេសកម្ពុជា» NPIC នៅថ្ងៃទី១៤ តុលា ឆ្នាំ២០២៤។

យោងតាមក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា នៅក្នុង​កម្ម​វិធី​នា​ឱកាស​នោះ ឯកឧត្តមរដ្ឋមន្រ្តី បានមានប្រសាសន៍ថា វគ្គបណ្តុះបណ្តាលមុនចុះកម្មសិក្សានាពេលនេះ ពិត​ជាឆ្លើយតបទាន់ពេលវេលាទៅនឹងគោលនយោបាយដ៏មានសារៈសំខាន់របស់រាជរដ្ឋាភិបាល និង​ផែនការយុទ្ធសាស្រ្តរបស់ក្រសួង ក្នុងការធ្វើបរិវត្តកម្មការបណ្តុះបណ្តាលជំនាញបច្ចេកទេស ក្នុង​គោលដៅចម្បងជំរុញកែប្រែរចនាសម្ព័ន្ធ​ឧស្សាហកម្ម​នៅ​កម្ពុជា​ពី​ឧស្សាហកម្ម​អតិពលកម្ម​ឈាន​ទៅ​ឧស្សាហកម្មផ្អែកលើជំនាញ។ ជាពិសេសនោះ គឺជាការអនុវត្តតាមអភិក្រមរបស់ សម្តេច​នាយករដ្ឋមន្រ្តី ហ៊ុន ម៉ាណែត គឺសិស្សត្រូវរៀន “ឲ្យចប់ ឲ្យចេះ ឲ្យមានការងារ”។

ឯកឧត្តមរដ្ឋមន្ត្រី បង្ហាញជំនឿយ៉ាងមុតមាំថា សមិទ្ធផលនៃកិច្ចសហការ រវាងក្រុមហ៊ុន ហ៊ីយុន​ដាយ ខេមកូម៉ូធ័រ និងវិទ្យាស្ថានជាតិពហុបច្ចេកទេសកម្ពុជា ក្នុង​ការ​បណ្តុះ​បណ្តាល​បច្ចេក​ទេស​យាន​យន្ត​កន្លងមក រួមនិងវគ្គបណ្តុះបណ្តាលមុនចុះកម្មសិក្សានេះ នឹងដើរតួនា​ទី​ជា​ចលករ​ដ៏​សំខាន់​ក្នុង​ការផ្សារភ្ជាប់សមត្ថភាពការងារទៅនឹងការវិវត្តបច្ចេកទេស​យានយន្ត​ឲ្យ​កាន់​តែ​មាន​សក្តា​នុពល និងភាពប្រកួតប្រជែងនៅក្នុងទីផ្សារពលកម្មទាំងក្នុងស្រុក និងលើឆាកអន្តរជាតិ។ ឯកឧត្តម ក៏បានលើកទឹកចិត្តបង្កើនកិច្ចសហការបន្ថែមទៀត ក្នុងការរៀបចំ​ឲ្យ​មាន​វគ្គ​បណ្តុះ​បណ្តាល​មុន​ចុះកម្មសិក្សាសម្រាប់សិស្សនិស្សិតតាមគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈរបស់ក្រសួង ក៏ដូចជាផ្តល់ឱកាសហាត់ការ ចុះកម្មសិក្សា និងឱកាសការងារជូ​ន​ដល់​សិស្ស​និ​ស្សិត ក្រោយពេលបញ្ចប់ការសិក្សាផងដែរ។

បន្ថែមពីនេះ ឯកឧត្តមរដ្ឋមន្ត្រី បានផ្តាំផ្ញើដល់សិស្សនិស្សិតទាំង ១០០នាក់ ដែលត្រូវ​ចូល​រួម​ក្នុង​វគ្គ​បណ្តុះ​បណ្តាលនាពេលនេះ ត្រូវប្រកាន់នូវភាពម៉ឺងម៉ាត់ មោះមុតក្នុងពេលហាត់ការ និងចុះ​កម្ម​សិក្សា ដើម្បីបង្ហាញពីស្នាដៃរបស់ខ្លួន និងខិតខំ​ប្រឹង​ប្រែង​យ៉ាង​ណាឲ្យទទួល​បាន​ចំណាប់​អារម្មណ៍ និងការវាយតម្លៃល្អពីក្រុមហ៊ុន និងអាចទទួលបានការងារធ្វើក្រោយពេល​បញ្ចប់​កម្ម​សិក្សា​៕ អត្ថបទ៖ ឈិត បូរ៉ាវី