[UPDATE] មនុស្សជិត១០០ នាក់នៅតែបាត់ខ្លួនក្រោយព្យុះសង្ឃរាហេលេន ខណៈអ្នកស្លាប់ពីព្យុះធំៗ២នៅអាមេរិកឡើងជាង២៥០នាក់

អភិបាលរដ្ឋ North Carolina លោក Roy Cooper កាលពីថ្ងៃអង្គារសប្ដាហ៍នេះ បានបញ្ជាក់ថា មនុស្សចំនួន ៩២នាក់ មកពីរដ្ឋ North Carolina នៅតែបាត់ខ្លួនជិតបីសប្តាហ៍ បន្ទាប់ពីព្យុះសង្ឃរាហេលេន (Hurricane Helene) ជាព្យុះដ៏ធ្ងន់ធ្ងរបំផុត បានវាយប្រហារសហរដ្ឋអាមេរិក ចាប់តាំងពីព្យុះ Katrina ក្នុងឆ្នាំ ២០០៥ ។ ព្យុះហេលេននេះ បានវាយប្រហារភាគអាគ្នេយ៍ ឆក់យកជីវិត មនុស្សរាប់រយនាក់ និងបន្សល់ទុកមនុស្សជិត១០០នាក់បន្តបាត់ខ្លួននៅទូទាំងតំបន់នេះ។

ចំនួនអ្នកស្លាប់ដោយសារព្យុះហេលេន បានកើនឡើងជាង ២៣០ នាក់ មុនការមកដល់របស់ព្យុះដ៏មហន្តរាយមួយទៀតគឺ មីលតុន (Milton) ដែលបានឆក់យកជីវិតមនុស្សយ៉ាងហោចណាស់ ២៣ នាក់ នៅក្នុងរដ្ឋ Florida។

នៅក្នុងសន្និសីទសារព័ត៌មានមួយជាមួយទីភ្នាក់ងារគ្រប់គ្រងគ្រោះអាសន្នសហព័ន្ធ (FEMA) លោក Cooper បាននិយាយថា ឆ្មាំជាតិកំពុងបន្តកិច្ចខិតខំប្រឹងប្រែងស្វែងរក និងជួយសង្គ្រោះរបស់ខ្លួន។

លោកបន្តថា ក្រោយខ្យល់ព្យុះភ្លាមៗ មានមនុស្សជាច្រើនបានទូរស័ព្ទផ្ដល់ដំណឹងពីស្ថានភាពមិត្តភ័ក្ដិ ឬក្រុមគ្រួសារដែលពួកគេមិនអាចទាក់ទងបាន។

លោក Cooper បាននិយាយថា ព្យុះនេះបាននាំមកនូវភ្លៀងធ្លាក់ខ្លាំងក្នុងប្រវត្តិសាស្ត្រ និងការបំផ្លិចបំផ្លាញតំបន់ដ៏ស្រស់ស្អាតបំផុតមួយនៃរដ្ឋរបស់យើង ។ការស្តារឡើងវិញនូវផ្លូវ និងហេដ្ឋារចនាសម្ព័ន្ធនានានឹងមានរយៈពេលយូរ ហើយយើងនឹងនៅជាមួយភាគខាងលិចនៃរដ្ឋ North Carolina គ្រប់ពេលវេលា។

គួររម្លឹកថាព្យុះសង្ឃរា ហេលេន បានវាយប្រហាររដ្ឋ Florida កាលពីចុងខែកញ្ញា មិនយូរប៉ុន្មានមុនការមកដល់នៃព្យុះមីលតុន៕