សិស្សទើបប្រឡងបាក់ឌុបជាច្រើនចាប់ផ្ដើមរៀនបំប៉នត្រៀមប្រឡងចូលសាកលវិទ្យាល័យល្បីៗ

សិស្សទើបបញ្ចប់ការប្រឡងបាក់ឌុបជាច្រើន មានទាំងអ្នកនៅរាជធានីភ្នំពេញ ក៏ដូចជា​សិស្ស​មក​ពី​តាម​បណ្ដាខេត្តចាប់ផ្ដើមនាំគ្នាមករៀនបំប៉នថែម នៅសាលាជ័យថាវី ក្នុងគោលដៅ​ត្រៀម​ចូល​សិក្សា​តាម​បណ្ដាសាកលវិទ្យាល័យល្បីៗ។ ការរៀនត្រៀមនេះជាក់ស្ដែងគឺចាប់ផ្ដើមមុនការប្រកាសលទ្ធផលបាក់ឌុប ជាប់ឬធ្លាក់។ ទិដ្ឋភាព​នេះ​ប​ង្ហាញថាសិស្សដែលមកសិក្សាត្រៀម សុទ្ធតែមា​នភាព​ជឿជាក់​លើ​លទ្ធផល​បាក់ឌុប​រួច​ទៅ​ហើយ​។

វត្តមានសិស្សជាច្រើនដែលទើបប្រឡងបាក់ឌុបចប់កាលពីពេលថ្មីៗនេះ កំពុងបន្ត​សកម្មភាព​សិក្សា​យ៉ាង​សកម្មដើម្បីត្រៀមប្រឡងចូលនៅតាមបណ្ដាសាកលវិទ្យាល័យល្បីៗ។ សិស្ស​ខ្លះ​បាន​ចាប់​ផ្ដើម​សិក្សាទៅហើយ រីឯសិស្សខ្លះទៀតទើបធ្វើដំណើរមកពីតាមបណ្ដាខេត្ត ដើម្បីចុះ​ឈ្មោះ​សិក្សា​បំប៉ន​នៅសាលាជ័យថាវី។ ជាទិដ្ឋភាពសម្រាប់ថ្ងៃនេះ សិស្សជាច្រើនកំពុងសិក្សា ដើម្បី​ត្រៀម​​សម្រាប់ការប្រឡងចូល វិទ្យាស្ថានជាតិបច្ចេកវិទ្យា ហៅកាត់ថា សាលាតិចណូ រីឯសិស្ស​ជា​ច្រើន​ផ្សេង​ទៀត ក៏បានមកចុះឈ្មោះដើម្បីសិក្សាត្រៀមប្រឡងចូល សាកលវិទ្យាល័យ​វិទ្យាសាស្ត្រ​សុខាភិបាល​ផងដែរ។

សម្រាប់សិស្សដែលបានចុះឈ្មោះសិក្សាត្រៀមនៅថ្ងៃនេះ លើកឡើងថាពួកគេត្រូវសិក្សាត្រៀមលើ ៣មុខវិជ្ជា សម្រាប់ការប្រឡងចូលសាកលវិទ្យាល័យវិទ្យាសាស្ត្រសុខាភិបាល។ ការសិក្សានឹងចាប់​ផ្ដើម​ពី​ថ្ងៃទី ២១ ខែតុលាខាងមុខ ដែលរៀនលើមុខវិជ្ជា គណិត ជីវៈ និងគីមី។

ការមកចុះ​ឈ្មោះសិក្សាបំប៉នថែមនៅថ្ងៃនេះ សម្រាប់សិស្សមកពីតាមបណ្ដាខេត្ត គឺមានអាណា​ព្យាបាល​ជូន​មកដោយផ្ទាល់ផងដែរ។ ជាក់ស្ដែងពួកគាត់ខ្លះ បានមកដល់ភ្នំពេញ កាលពីម្សិលខ្លះ រីឯអ្នកខ្លះទៀត ងើបជិះម៉ូតូជាមួយកូន ពីខេត្តព្រៃវែង នៅម៉ោង៥ព្រឹកនាថ្ងៃនេះតែម្ដង។ អាណាព្យា​បាលពួកគាត់បង្ហាញក្ដីសប្បាយរីករាយដែលកូនខំប្រឹងប្រែងរៀនសូត្រ។

គួរបញ្ជាក់ថា ការសិក្សាបំប៉ន ដើម្បីត្រៀមប្រឡងចូលតាមបណ្ដាសាកលវិទ្យាល័យល្បីៗនេះ គឺ​ចាប់​ផ្ដើម​តាំងពីមុនប្រកាសលទ្ធផលបាក់ឌុបទៅទៀត។ សិស្សដែលមកសិក្សាត្រៀមទាំងនេះ គឺ​សុទ្ធតែសិស្សដែលភាពជឿជាក់លើលទ្ធផលប្រឡង។ ក្រសួងអប់រំ យុវជន និងកីឡា នឹង​ប្រកាស​លទ្ធផល​បាក់ឌុប នៅថ្ងៃទី ៣០ ខែតុលា សម្រាប់រាជធានីភ្នំពេញ និងខេត្តកណ្ដាល។ រីឯ​បណ្ដា​ខេត្ត​ដទៃ​ទៀត នឹងធ្វើការប្រកាសលទ្ធផល នៅថ្ងៃទី ៣១ ខែតុលា៕ អត្ថបទ៖ គឹម ហុក