ឯកឧត្តមរដ្ឋមន្ត្រី ហួត ហាក់៖ ក្រុងកំពង់ចាម និងខេត្តកំពង់ចាម សម្រេចបានជោគជ័យថ្មី​មួយទៀត​នៅក្នុងវិស័យទេសចរណ៍ ដោយបានក្លាយជាជ័យលាភី “ទីក្រុងទេសចរណ៍គ្មានផ្សែងបារី”

នាព្រឹកថ្ងៃពុធ ទី១៦ ខែតុលា ឆ្នាំ២០២៤ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បាន​អញ្ជើញ​ជាអធិបតីក្នុងពិធីប្រកាសជាផ្លូវការទីក្រុងកំពង់ចាមជាទីក្រុងទេសចរណ៍គ្មានផ្សែងបារី ដោយ​ពិធីនេះមានការអញ្ជើញចូលរួមពី ឯកឧត្តម អ៊ុន ចាន់ដា អភិបាលនៃ​គណៈអភិបាល​ខេត្ត​កំពង់ចាម, លោកស្រីតំណាងអង្គការសុខភាពពិភពលោកប្រចាំកម្ពុជា, លោកប្រធាន​អង្គការ​ចលនា​ដើម្បី​សុខភាពកម្ពុជាក្នុងនាមសម្ព័ន្ធត្រួតពិនិត្យថ្នាំជក់អាស៊ីអាគ្នេយ៍, ឯកឧត្តម លោកជំទាវ លោក លោកស្រីទាំងអស់ មកពីក្រសួង ស្ថាប័នពាក់ព័ន្ធ មន្ទីរជំនាញ ព្រមទាំងរដ្ឋបាលខេត្ត ក្រុង ស្រុក ឃុំ សង្កាត់ គ្រប់ជាន់ថ្នាក់ ចំនួន ៥២៣នាក់ នៅខេត្តកំពង់ចាម។

ឆ្លៀតឱកាសនេះ ដើម្បីធានានិរន្តរភាពជាទីក្រុងទេសចរណ៍គ្មានផ្សែងបារី ឯកឧត្តមរដ្ឋមន្ត្រី បាន​ផ្តល់​អនុសាសន៍ដល់រដ្ឋបាលក្រុងកំពង់ចាម ត្រូវបន្តអនុវត្ត​ជា​ប្រចាំ​នូវ​គោលការណ៍​បរិស្ថាន​គ្មាន​ផ្សែង​បារី​ក្នុងវិស័យទេសចរណ៍ឱ្យស័ក្តិសម ជាជ័យលាភី «ទីក្រុងទេសចរណ៍គ្មានផ្សែងបារី»។

ជា​មួយគ្នានេះដែរ ឯកឧត្តមរដ្ឋមន្រ្តីបានស្នើ ឯកឧត្តមអភិបាលនៃគណៈអភិបាលខេត្តកំពង់ចាម លោកអ​ភិបាលនៃគណៈអភិបាលក្រុង/ស្រុក សហការជាមួយមន្ទីរទេសចរណ៍ខេត្តកំពង់ចាម ពិនិត្យ​លទ្ធភាព លើកផ្លាកតាំងបង្ហាញតំបន់រមណីយដ្ឋានទេសចរណ៍នៅក្នុងខេត្ត និងនៅ​តាម​បណ្តា​ស្រុក​នានា ឱ្យបានផុលផុស ដើម្បីផ្តល់ព័ត៌មាន និងទាក់ទាញភ្ញៀវទេសចរជាតិ និង​អន្តរជាតិ​ចូលមកកម្សាន្ត និងសូមចូលរួមទាំងអស់គ្នាជាមួយក្រសួងទេសចរណ៍ ក្នុងយុទ្ធនាការ៖ ១) ម្នាក់ៗ ជាអ្នកផ្សព្វផ្សាយទេសចរណ៍កម្ពុជា ម្នាក់!, ២) ទេសចរណ៍ដើម្បីទាំងអស់គ្នា ទាំង​អស់​គ្នា​ដើម្បីទេសចរណ៍!