ទេយ្យទាន និងថវិការសរុបជិត១ម៉ឺនដុល្លារ ត្រូវផ្តល់ជូនកាកបាទក្រហមខណ្ឌបឹងកេងកង សម្រាប់យកទៅធ្វើទានសប្បុរសបន្ត

ភ្នំពេញ ៖ ដើម្បីចូលរួមចំណែកក្នុងកិច្ចការងារមនុស្សធម៌ក្នុងសង្គមជាតិ សម្តេចព្រះចៅអធិការវត្តលង្កាព្រះកុសុមារាម បានឧបត្ថម្ភទេយ្យទាន ទេយ្យវត្ថុ និងថវិកា សរុបជាទឹកប្រាក់ជិត១ម៉ឺនដុល្លារ ជូនដល់អាជ្ញាធរខណ្ឌ សម្រាប់ការយកទៅប្រើប្រាស់ជាទានសប្បុរសបន្ត ចែកជូនដល់ប្រជាពលរដ្ឋ ជាជនក្រីក្រ , ជនខ្វះខាតគ្មានទីជម្រក , ទុរគត៌ជន , ចាស់ជរាគ្មានទីពឹង និងប្រជាពលរដ្ឋរងគ្រោះដោយគ្រោះធម្មជាតិជាដើម ។

ពិធីប្រគល់-ទទួល ទេយ្យទាន ទេយ្យវត្ថុ និង ថវិកានេះ ធ្វើឡើងនៅវេលារសៀលថ្ងៃទី១៦ ខែតុលា ឆ្នាំ២០២៤នេះ នៅវត្តលង្កាព្រះកុសុមារាម ក្រោមវត្តមានដឹកនាំទទួលដោយឯកឧត្តមសុខ សម្បត្តិ អភិបាលខណ្ឌបឹងកេងកង និងព្រះអធិបតិភាពប្រគល់ដោយសម្តេច ព្រះធម្មលិខិតបណ្ឌិត សៅ ចន្ទថុល្ល ព្រះចៅអធិការវត្តលង្កាព្រះកុសុមារាម ព្រមទាំងព្រះសង្ឃទាំងអស់នៅក្នុងវត្ត ។

លោកសុខ សម្បត្តិ អភិបាលខណ្ឌបឹងកេងកង បានថ្លែងអំណអរគុណដល់ទឹកប្រទ័យរបស់សម្តេចចៅអធិការវត្ត ដែលជានិច្ចកាលតែងតែចូលរួមចំណែកកិច្ចការងារមនុស្សធម៍ជួយឧបត្ថម្ភទេយ្យទាន ទេយ្យវត្ថុ និងថវិកា ដល់អាជ្ញាធរខណ្ឌជាបន្តបន្ទាប់រហូតមក ។

ជំនួយ្តល់ឱ្យនៅពេលនេះ លោកអភិបាលខណ្ឌ សន្យាថានិងយកទៅប្រើប្រាស់ឱ្យចំទិសដៅ ពោលគឺត្រៀមបែងចែកជូនដល់ប្រជាពលរដ្ឋដែលមានជីវភាពខ្វះខាត ដោយផ្ទាល់ ដោយមិនប្រកាន់និន្នាការនយោបាយ ជាតិសាសន៍ ឬសាសនាអ្វីឡើយ ពោលគឺអនុវត្តឱ្យបានត្រឹមត្រូវតាមគោលការណែនាំរបស់កាកបាទប្រហមកម្ពុជា ដែលមានសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ជាប្រធានដឹកនាំប្រកបដោយកត្តិបណ្ឌិតវៀងវៃ ហើយក៏ជាមាតាចិត្តធម៌របស់កម្ពុជា ដែលសម្តេចមានទឹកចិត្តសប្បុរសខ្ពស់ តែងគិតគូរពីសុខទុក្ខប្រជាជនក្នុងប្រទេសជាតិទាំងមូល គ្រប់កាលះទេសះ ។

សូមបញ្ជាក់ថា ទេយ្យទាន ទេយ្យវត្ថុ និងថវិការដែលកាកបាទក្រហមកម្ពុជាខណ្ឌបឹងកេងកងទទួលបាន រួមមាន ៖ អង្ករ ១តោន  ទឹកក្រូច ៥០កេស , មីម៉ាម៉ា ៥កេសធំ , តែ ១១កេសធំ , ទឹកសុទ្ធ ៥០កេស , ទឹកដោះគោ ៧កេសធំ , ស្ករស ១០កេសធំ , សម្ភារៈផ្ទះបាយ ៣៧ឈុត បច្ច័យចំនួន ៤,០០០,០០០រៀល ដោយសរុបសម្ភារៈទាំងអស់ខាងលើ ជាបច្ច័យចំនួន ៣២,៤៧៦,០០០រៀល ៕ លីហេង