សម្ដេចធិបតីណែនាំកីឡាករកីឡាការិនីចូលរួមបំផុសគុនខ្មែរ និងចងក្រងគុនខ្មែរទុកជាឯកសារ

ភ្នំពេញ ៖ ក្នុងឱកាសសកម្មភាពក្រៅផ្លូវការជួបជាមួយកីឡាករ កីឡាករិនីគុនខ្មែរ នារសៀលថ្ងទី១៦ ខែតុលា ឆ្នាំ ២០២៤នេះ សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានណែនាំដល់កីឡាករកីឡាការិនីចូលរួមបំផុសគុនខ្មែរឱ្យបានទូលំទូលាយ ចែករំលែកគុនខ្មែរជាមួយគ្នា និងរួមគ្នាចងក្រងគុនខ្មែរទុកជាឯកសារ។ ក្នុងគោលដៅ ចងក្រង ផ្សព្វផ្សាយ និងដាក់ឱ្យអនុវត្តលើវិស័យគុនខ្មែរ។

​ក្នុងឱកាសនោះសម្ដេចធិបតី នាយករដ្ឋមន្រ្ដី នៅថ្ងៃទី១៨ ខែតុលា ឆ្នាំ ២០២៤នេះ កម្ពុជានឹងបើក ព្រឹត្តិការណ៍កីឡាយុទ្ធគុនចម្រុះខ្មែរបុរាណ «ពានរង្វាន់សម្ដេចបវរធិបតី»។ សម្ដេចធិបតីមានប្រសាសន៍ថា ព្រឹត្តិការណ៍កីឡាយុទ្ធគុនចម្រុះខ្មែរបុរាណលើកនេះ ជាការប្រកួតចម្រុះ ដោយមានការប្រកួតគុនខ្មែរចម្រុះចំនួន ៧ ប្រភេទយកមកប្រកួតជាមួយគ្នា។ សម្ដេចធីបតីបញ្ជាក់ថា គំនិតផ្ដួចផ្ដើមនៃការបង្កើតព្រឹត្តិការណ៍កីឡាយុទ្ធគុនចម្រុះខ្មែរបុរាណនេះ សម្ដេចបានគិតគូរឡើងរយៈពេល ៥-៦ ឆ្នាំមកហើយ ក្នុងគោលដៅធ្វើឡើងផ្សព្វផ្សាយពីគុនខ្មែរ។

ក្នុងឱកាសនោះសម្ដេចធិបតី ក៏បានថ្លែងអំរគុណដល់ក្រុមការងារ ដែលបានខិតខំរៀបចំ ព្រឹត្តិការណ៍កីឡាយុទ្ធគុនចម្រុះខ្មែរបុរាណនេះឡើងរហូតទទួលបានជោគជ័យ និងឈានទៅបើកជាផ្លូវការនៅថ្ងៃទី១៨ ខែតុលាខាងមុខនេះ។ ជាមួយគ្នានេះ សម្ដេចធិបតីក៏បានទទួលយកយោបល់ពីក្រុមកីឡាករ និងគ្រូកីឡា ក្នុងការពិនិត្យឡើងវិញចំពោះកីឡាចំបាប់របស់ខ្មែរ ជាពិសេសពិនិត្យលើប្រភេទកីឡាដែលនៅសេសសល់តាមបណ្ដាវត្តអារាមមួយចំនួនដើម្បីធ្វើការស្ដារឡើងវិញ។

សូមជម្រាបថា ព្រឹត្តិការណ៍កីឡាយុទ្ធគុនចម្រុះខ្មែរបុរាណ «ពានរង្វាន់សម្ដេចបវរធិបតី» នឹងត្រូវរៀបចំរៀងរាល់ឆ្នាំ ក្រោមគំនិតផ្ដួចផ្ដើមដ៏ខ្ពង់ខ្ពស់ និងប្រកបដោយចក្ខុវិស័យវែងឆ្ងាយរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ដែលរៀបចំឡើងក្រោមស្មារតី អភិរក្សដើម្បីអភិវឌ្ឍន៍ អភិវឌ្ឍដើម្បីអភិរក្ស “មរតកយុទ្ធគុនខ្មែរបុរាណ”។ សម្រាប់ពិធីបិទការប្រកួតលើកទី១ នាថ្ងៃទី២០ ខែតុលាខាងមុខ នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នៅវិមានពហុកីឡដ្ឋានជាតិអូឡាំពិក៕

អត្ថបទ៖ វ៉ន ដារ៉ា