ចិន ចោទនាវានេសាទជប៉ុន ថាបានចូលក្នុងដែនទឹករបស់ខ្លួនដោយខុសច្បាប់

ឆ្មាំល្បាតឆ្នេររបស់ប្រទេសចិន បាននិយាយថា នាវានេសាទជប៉ុនមួយគ្រឿង “បានចូលដោយខុសច្បាប់” ទៅក្នុងដែនទឹករបស់ចិន នៅជុំវិញកោះ តាវយូ (Diaoyu) កាលពីថ្ងៃទី១៥-១៦ ខែតុលា ហើយត្រូវបានព្រមានឱ្យចាកចេញ។ អ្នកនាំពាក្យឆ្មាំល្បាតឆ្នេរ បាននិយាយនៅក្នុងសេចក្តីថ្លែងការណ៍មួយថា “យើងជំរុញឱ្យភាគីជប៉ុន បញ្ឈប់ជាបន្ទាន់នូវរាល់សកម្មភាពខុសច្បាប់នៅក្នុងដែនទឹកទាំងនេះ”។

ឆ្មាំល្បាតឆ្នេរបន្ថែមថា ខ្លួននឹងបន្តអនុវត្តការការពារសិទ្ធិដែនសមុទ្រ និងសកម្មភាពអនុវត្តច្បាប់នៅក្នុងដែនទឹកដែលស្ថិតនៅក្រោមយុត្តាធិការរបស់ខ្លួន។ ប្រទេសជប៉ុន បានច្រានចោលការអះអាងសិទ្ធិរបស់ចិន ចំពោះប្រជុំកោះនេះ ហើយក្នុងរយៈពេលប៉ុន្មានខែកន្លងមកនេះ ប្រទេសទាំងពីរមានការប្រឈមមុខដាក់គ្នាជាច្រើននៅក្នុងដែនទឹក។

កាលពីខែមិថុនា ជប៉ុនបានធ្វើការតវ៉ាប្រឆាំងនឹងទី្រុងប៉េកាំង បន្ទាប់ពីខ្លួនបាននិយាយថា នាវាចិន ដែលហាក់ដូចជាផ្ទុកកាណុងបាញ់ទឹក បានចូលដែនទឹករបស់ខ្លួនក្នុងសមុទ្រចិនខាងកើត ជុំវិញប្រជុំកោះជម្លោះនោះ ដែលទីក្រុងតូក្យូហៅថា សិនកាគុ (Senkaku) និងទីក្រុងប៉េកាំង ហៅថា តាវយូ (Diaoyu)។

ប៉ុន្មានសប្តាហ៍ក្រោយមក ជប៉ុនបានតវ៉ាមួយផ្សេងទៀត បន្ទាប់ពីនាវាស្ទាបស្ទង់ដែនទឹករបស់ចិនមួយគ្រឿងបានចូលដែនទឹករបស់ជប៉ុន។ ការកើនឡើងនៃសកម្មភាពយោធារបស់ចិន នៅជិតប្រទេសជប៉ុន និងជុំវិញកោះតៃវ៉ាន់ ក្នុងប៉ុន្មានឆ្នាំថ្មីៗនេះ ក៏បានបង្កឱ្យមានក្ដីបារម្ភយ៉ាងខ្លាំងនៅក្នុងទីក្រុងតូក្យូ៕