អគារសិក្សា១ខ្នងធ្វើអំពីឈើប្រក់​ស័ង្កសី សាងសង់តាំងពីឆ្នាំ១៩៩៣ ត្រូវបានជួសជុលឡើងវិញ និងការស្ថាបនារោងអាហារ សម្រាប់សិស្សានុសិស្ស

នៅថ្ងៃទី១៦ ខែតុលា ឆ្នាំ២០២៤ ម្សិលមិញ ឯកឧត្ដម គីម រិទ្ធី អភិបាលខេត្តព្រះវិហារ អញ្ជើញចូលរួមក្នុងសកម្មភាពជួសជុលអគារសិក្សា១ខ្នងមាន ៣បន្ទប់ ធ្វើអំពីឈើប្រក់ស័ង្កសី និងរោងអាហារសម្រាប់សិស្សានុសិស្សនេះ ស្ថិតក្នុងបរិវេណសាលាបឋមសិក្សាថ្មល់បំបែក ស្ថិតក្នុងភូមិថ្នល់បំបែក ឃុំថ្មី ស្រុកគូលែន ខេត្តព្រះវិហារ។

សកម្មភាពនេះ ត្រូវបានចូលរួមយ៉ាងសកម្មពីសំណាក់សហគមន៍មូលដ្ឋាន អាជ្ញាធរឃុំស្រុក និងបានសហការពីសំណាក់ក្រុមការងារស.ស.យ​.ក.ថ្នាក់ ខេត្ត ថ្នាក់ស្រុក នាយកសាលា លោកគ្រូ អ្នកគ្រូ មេឃុំ មេប៉ុស្តិ៍ និងកងប្រជាការពារនៅក្នុងមូលដ្ឋាន។ លទ្ធផលនៃការជួសជុល និងសាងសង់​សម្រេចបានប្រមាណ ៩០ភាគរយហើយ ដែលបច្ចុប្បន្នកំពុងដំណើរការចាក់សាបនៅ រោងអាហារ​សម្រាប់សិស្សានុសិស្ស។

តាមការពិនិត្យជាក់ស្ដែង ដំបូលស័ង្កសីមានសភាពចាស់អាចប្រឈម នឹងការលេចធ្លុះធ្លាយ​នៅពេលមិនយូរប៉ុន្មានខាងមុខ ដោយការស្វែងយល់ពីភាពលំបាករបស់ិស្ស លោក ចាប កុយ ប្រធានមន្ទីរធនធានទឹក និងឧតុនិយមខេត្ត បានធ្វើការផ្លាស់ប្តូរដំបូលដោយប្រក់ស័ង្កសីថ្មី និងប្រភេទស័ង្កសីដែល ល្អមានគុណភាពខ្ពស់ ហើយការជួសជុលអគារសិក្សានេះ នឹងជំរុញឲ្យបានរួចចប់សព្វគ្រប់មុនពេលមុនបវេសនកាលឆ្នាំសិក្សា ២០ ២៤-២០២៥ខាងមុខនេះ។

មានប្រសាសន៍ផ្ដាំផ្ញើ ឯកឧត្ដម គីម រិទ្ធី អភិបាលខេត្ត បានផ្តល់ថវិកាចំនួនជាង ៧លានរៀល បង្ក្រប់​លើការ​ចំណាយអស់ប្រមាណជាង ១៣លានរៀល ​ដើម្បីជួយជ្រោមជ្រែងក្នុងដំណើរការ​ជួសជុល​ដែលកំពុងតែមានបញ្ហាខ្វះខាត។ ឯកឧត្ដម ក៏បានជំរុញឲ្យសាលាបន្តធ្វើការដាំផ្កាស្ថាបនា​សួនឲ្យមាន​សោភ័ណភាព និងក្លាយជាសាលាគំរូហើយ នៅពេលបើកបវេសនកាលខាងមុខនេះ ឯកឧត្ដមនឹងមកចូលរួមក្នុងដំណើរការបើកបវេសនកាលផងដែរ៕