អភិបាលខណ្ឌឬស្សីកែវ បន្តយកចិត្តទុកដាក់ពីបញ្ហាសណ្ដាប់ធ្នាប់ តាមដងផ្លូវសាធារណ:ក្នុងមូលដ្ឋាន

ភ្នំពេញ៖ ដោយមានការយកចិត្តទុកដាក់ពីរដ្ឋបាលខណ្ឌប្ញស្សីកែវ អំពីបញ្ហាសណ្ដាប់ធ្នាប់សាធារណៈ បរិស្ថានអនាម័យ តាមដងផ្លូវសាធារណ: ដែលមានដីមិនរៀបរយ ដូច្នេះបានឈូសឆាយឲ្យមានរបៀបរៀបរយ បង្កភាពងាយស្រួលដល់ពលរដ្ឋអ្នកធ្វើដំណើរ។

ជាក់ស្ដែងនៅថ្ងៃព្រហស្បតិ៍ ទី ១៧ ខែតុលា ឆ្នាំ ២០២៤ នេះ លោក ជិន ប៊ុនធឿន អភិបាលខណ្ឌឫស្សីកែវ បានដឹកនាំកម្លាំងគណៈបញ្ជាការឯកភាពរដ្ឋបាលខណ្ឌ ប្រើប្រាស់អេស្ការវ៉ាទ័រឈូសឆាយដីសម្អាតផ្លូវតាមបណ្តោយជាតិលេខ៥ ដើម្បីបង្កលក្ខណៈងាយស្រួលដល់បងប្អូនប្រជាពលរដ្ឋធ្វើដំណើរ និងបង្កើនសោភ័ណភាពតាមដងផ្លូវ ។

នាឱកាសនោះ លោកអភិបាលខណ្ឌ ក៏បានចុះពិនិត្យទីតាំងដីមួយកន្លែងដែលសង់របងស័ង្កសីខ្វះការប្រុងប្រយ័ត្ន ដែលអាចបង្កគ្រោះថ្នាក់ដល់អ្នកដំណើរ ពេលមានខ្យល់កន្ត្រាក់ខ្លាំង។ លោកអភិបាលខណ្ឌ បានណែនាំដល់ម្ចាស់ទីតាំងត្រូវសង់របងឲ្យបានរឹងមាំល្អ ធានាសុវត្ថិភាព ជៀសវាងមានបញ្ហាពេលមានគ្រោះថ្នាក់ជាយថាហេតុដល់អ្នកធ្វើដំណើរតាមដងផ្លូវ។

សូមបញ្ជាក់ផងដែរបញ្ហាសណ្ដាប់ធ្នាប់នេះដែរ ឯកឧត្តម ឃួង ស្រេង អភិបាលរាជធានីភ្នំពេញ តែងតែក្រើនរំលឹកដល់អាជ្ញាធរតាមមូលដ្ឋានទាំង១៤ខណ្ឌក្នុងរាជធានីភ្នំពេញ បន្តយកចិត្តទុកដាក់ជាប់ជាប្រចាំ ដើម្បីរំដោះចិញ្ជើមផ្លូវសាធារណះ ដែលពលរដ្ឋមួយចំនួនតែងតែយកចិញ្ជើមផ្លូវបំរើផលប្រយោជន៍ផ្ទាល់ខ្លួន មិនគិតពីផលប៉ះពាល់ជាពិសេសបង្កការកក់ស្ទះចរាចរណ៍ និងបាត់បង់សណ្ដាប់ធ្នាប់ ជាដើម៕

អត្ថបទ៖ កុម្ភះ