អូស្ត្រាលីបង្ហាញនូវការប្តេជ្ញា ជំរុញបង្កើនកិច្ចសហប្រតិបត្តិការលើវិស័យពាណិជ្ជកម្ម និងវិនិយោគ

ឯកឧត្តមឯកអគ្គរដ្ឋទូតអូស្ត្រាលី បានបង្ហាញនូវសុទិដ្ឋិនិយម និងការតាំងចិត្តខ្ពស់ ក្នុងការ​បង្កើន​កិច្ច​សហ​ប្រតិបត្តិការ លើវិស័យ ពាណិជ្ជកម្ម ការវិនិយោគ នឹងរំពឹងថា នៅពេលខាងមុខ ក្រុមហ៊ុន​មក​ពី​អូស្ត្រាលី នឹងអាចចូលរួមចំណែកក្នុងគម្រោងសាងសង់ហេដ្ឋា-រចនាសម្ព័ន្ធ​នៅ​កម្ពុជា​ផង​ដែរ​។

ឯកឧត្តម Derek Yip ឯកអគ្គរដ្ឋទូតអូស្ត្រាលី ប្រចាំព្រះរាជាណាចក្រកម្ពុជា នៅ​ក្នុង​ជំនួប​ពិភាក្សា​ការងារ​ជាមួយ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សា​អភិវឌ្ឍន៍​កម្ពុជា​នៅថ្ងៃទី ១៧ ខែ តុលា ឆ្នាំ ២០២៤ នេះ ឯកឧត្តម បានបង្ហាញអំពីមោទនភាព ដែល​ប្រទេស​​អូស្រ្តាលី តាមរយៈកម្មវិធីភាពជាដៃគូកម្ពុជា-អូស្រ្តាលី សម្រាប់ការអភិវឌ្ឍសេដ្ឋកិច្ចប្រកប ដោយ​ភាពធន់ (CAPRED) ដោយបានចូលរួមចំណែកយ៉ាងសម្មជាមួយកម្ពុជា ក្នុងវេទិ​ការា​ជ​រដ្ឋាភិបាល​ និង​ផ្នែកឯកជន, បន្ថែមពី នេះ ឯកឧត្តមបានបង្ហាញនូវសុទិដ្ឋិនិយម និងការ​តាំង​ចិត្ត​ខ្ពស់​ ក្នុងការបង្កើនកិច្ចសហប្រតិបត្តិការ លើវិស័យពាណិជ្ជកម្ម ការវិនិយោគ និងបន្ត​ចូល​រួមធ្វើឱ្យ​បរិយាកាស​វិនិយោគនៅប្រទេសកម្ពុជាកាន់តែមានភាពល្អប្រសើរ។

ក្រៅពីគោលការណ៍ខាងលើ, ឯកឧត្តមឯកអគ្គរដ្ឋទូត ក៏បាន​បង្ហាញ​ពី​ចំណាប់​អារម្ម​ណ៍​លើ​ផែ​ន​ការ ​និងគម្រោងអភិវឌ្ឍន៍ ហេដ្ឋារចនាសម្ព័ន្ធនានារបស់កម្ពុជា ព្រមទាំងរំពឹងថា ក្រុមហ៊ុន​របស់​ប្រទេស​អូស្ត្រាលី នឹងអាចចូលរួមចំណែកសាងសង់ក្នុងគម្រោង ណាមួយនាពេល​ខាង​មុខ​ផង​ដែរ​។

ជាឆ្លើយតប, ឯកឧត្តមឧបនាយករដ្ឋមន្ត្រី បានជម្រាបជូនអំពីកាលានុវត្តភាពវិនិយោគនៅកម្ពុជា ដែល​មានកម្លាំងពលកម្មវ័យ ក្មេង ហើយការបណ្តាក់ទុនវិនិយោគនៅកម្ពុជាទៀតសោត មិនមែន​បម្រើ​តែ​ទីផ្សារប្រជាជនចំនួន ១៧ លាននាក់ប៉ុណ្ណោះទេ ប៉ុន្តែបម្រើ ឱ្យទីផ្សារនៃមហា​អនុ​តំបន់​ទន្លេ​មេគង្គ ដែលមានប្រជាជនរហូតដល់ទៅ ៣៣០ លាននាក់ ។

ឯកឧត្តម ស៊ុន ចាន់ថុល បានជម្រាបជូនបន្ថែម អំពីការដាក់​ឱ្យ​ប្រើប្រាស់​សាក​ល្បង​នូវ​ប្រព័​ន្ធគ្រ​ប់​គ្រង​គម្រោង​វិនិយោគកម្ពុជា (cdcIPM) ដែលនឹងផ្តល់ភាព​ងាយ​ស្រួល​ដល់​វិនិយោគិន​ក្នុង​ការ​ដាក់​ពាក្យ​ស្នើ​សុំវិនិយោគ និងបានលើកឡើងអំពីផែនការ នៃដំណើរ ទស្សនកិច្ចជំរុញ និង​ទាក់​ទាញ​វិនិយោគ នៅតាមបណ្តាប្រទេសមួយចំនួនបន្ថែមទៀត នៅមុនដំណាច់ឆ្នាំ២០២៤នេះ ដើម្បី​ផ្តល់ព័ត៌មានអំពីសក្តានុពលរបស់កម្ពុជា ទៅកាន់វិនិយោគិនអន្តរជាតិបានកាន់តែទូលាយ។ ចំណែកទាក់ទិនហេដ្ឋារចនាសម្ព័ន្ធគាំទ្រ ឯកឧត្តមឧបនាយករដ្ឋមន្ត្រី បានជម្រាប​បន្ថែម​ជូន​ឯកឧត្តម​ឯកអគ្គរដ្ឋទូត អំពីផែនការអភិវឌ្ឍន៍មួយចំនួន របស់រាជរដ្ឋាភិបាលកម្ពុជា មានជាអាទិ៍ ផែនការ​មេគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារ​កម្ម​កម្ពុជា​ឆ្នាំ​២០២៣-២០៣៣ ដែលបើក ឱកាសជូន​វិនិយោគិន​ពី​គ្រប់​បណ្ដា​ប្រទេស​អាច​ពិនិត្យ​លទ្ធភាព​បណ្ដាក់​ទុន​វិនិយោគ៕ អត្ថបទ៖ សុន រ៉ាឌី