រដ្ឋមន្ត្រីក្រសួងសុខាភិបាល អញ្ជើញបើកសន្និសីទវេជ្ជសាស្ត្រទារក និងកុមារ លើកទី៦

ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញជាអធិបតី​បើកសន្និសីទ​វេជ្ជសាស្ត្រទារក និងកុមារ លើកទី៦ ក្រោមប្រធានបទ «វិនិយោគដើម្បីបង្កើនសមត្ថភាព និង​គុណ​ភាពនៃការថែទាំ ព្យាបាលទារក-កុមារ» នៅព្រឹកថ្ងៃទី១៨ ខែតុលា ឆ្នាំ២០២៤នេះ។

ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានថ្លែងថា សកម្មភាពនេះ បាន​បង្ហាញ​ថាមនី្ទរពេទ្យកុមារជាតិ បានលើកកម្ពស់យកចិត្តទុកដាក់ទៅលើគុណភាព ប្រសិទ្ធភាព សុវតិ្ថភាព និងកិច្ចសហការជាមួយសហភាតរ ការរក្សាចំណងសាមគ្គីភាព។ ឯកឧត្តម រដ្ឋមន្រី្ត ក៏ថ្លែង​អំណរគុណដល់អង្គការ កូហ្វី កូរ៉េ ដែលបានឧបត្ថម្ភគាំទ្រចំពោះវិស័យសុខាភិបាល ចាប់​តាំង​ពីឆ្នាំ២០១១ ហើយនៅតែជាដៃគូកិច្ចសហប្រតិបតិ្តការដ៏សំខាន់មួយនៅក្នុងកិច្ចការនេះ និង​សូម​អំពាវនាវឲ្យមានការចូលរួមពីដៃគូផ្សេងៗទៀត រួមទាំងវិស័យឯកជនផងដែរ ដើម្បី​ចូលរួម​ចំណែក​ក្នុងការលើកកម្ពស់គុណភាពសេវាសុខាភិបាល ជាពិសេសកម្មិធីសុខភាពមាតា ទារក និង​កុមារ ព្រោះកម្មវិធីនេះ គឺជាបង្គោលចលករមួយ ដែលកំណត់ពីការសម្រេច និងគ្រប​ដណ្តប់​សុខភាព​ជាសកល។

ឯកឧត្តមសាស្រ្តាចារ្យបានលើកទឹកចិត្តដល់មន្រី្តសុខាភិបាលគ្រប់លំដាប់ថ្នាក់ ត្រូវយក​ចិត្តទុក​ដាក់​ខ្ពស់​ក្នុងការពង្រឹងទាំងសមត្ថភាព ក្រមសីលធម៌វិជ្ជាជីវៈ ក្នុងការបម្រើសេវាថែទាំ​សុខភាព​២៤ម៉ោង លើ២៤ម៉ោង ជារៀងរាល់ថ្ងៃ ទាន់ពេលវេលា ឆាប់រហ័ស ដើម្បីសេចកី្តពេញចិត្ត និង​ទំនុក​ចិត្តរបស់ប្រជាពលរដ្ឋយើង និងដើម្បីឲ្យស័ក្តិសម និងពាក្យថា «គ្រូពេទ្យជាកងទ័ពអាវ ស និងបំពេញភារកិច្ច របស់ទេវតា»។

លោក សុង យ៉ុងហ្គឹន នាយកអង្គការ កូហ្វី (KOFIH) កូរ៉េ ប្រចាំនៅកម្ពុជា លើកឡើងថា អង្គការ កូហ្វី កំពុងធ្វើការនៅក្នុងខេត្តបាត់ដំបង ប៉ៃលិន ពោធិ៍សាត់ ដើម្បីលើកកម្ពស់​នៃសេវា​ថែទាំ​សុខភាព​មាតា និងទារក ក្នុងរយៈពេលជាង១០មកហើយ។ ផ្អែកលើបទពិសោធន៍នេះ យើង​បាន​សិក្សារៀនសូត្រថា យុទ្ធវិធីសមាហរណកម្ម នៃការកសាងសមត្ថភាព​ក្នុងការលើក​កម្ពស់​បរិយាកាស​សេវាក្នុងការពង្រឹងរចនាសម្ព័ន្ធអភិបាលកិច្ច គឺមានប្រសិទ្ធភាពយ៉ាងខ្លាំង​ក្នុងការ​ពង្រឹង​គុណភាពនៃសេវាថែទាំសុខភាព។ ដូច្នេះយើងបានពិភាក្សាជាមួយក្រសួងសុខាភិបាល ដើម្បី​ប្រកាន់យកនូវយុទ្ធវិធីនេះ សម្រាប់កម្មវិធីថែទាំជាសារវន្តទារកទើបនឹងកើត និងអនុវត្តកម្មវិធីនេះឲ្យកាន់តែមានប្រសិទ្ធភាព នៅតាមបណ្តាខេត្តនានាក្នុងព្រះរាជាណាចក្រ​កម្ពុជា៕ អត្ថបទ រដ្ឋា