រដ្ឋផ្តល់អាហារូបករណ៍សិក្សាជំនាញ TVET ចំនួនជាង ៦មុឺនកន្លែង សម្រាប់ឆ្នាំ២០២៥

មន្រ្តីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ឲ្យដឹតថា សម្រាប់ឆ្នាំ​សិក្សា​ថ្មី​២០២៥​ខាងមុខ រាជរដ្ឋាភិបាលកម្ពុជាបានផ្តល់អាហារូបការណ៍ផ្នែកកម្មវិធីបណ្តុះបណ្តាលបច្ចេកទេស និង​វិជ្ជាជីវៈ (TVET) ចំនួន ៦៧,៣០០កន្លែង ក្នុងក្របខណ្ឌនៃកម្មវិធីបណ្តុះបណ្តាលជំនាញ TVET ដែលត្រូវបានរាជរដ្ឋាភិបាលដាក់ឱ្យអនុវត្តកម្មវិធីបណ្តុះបណ្តាលជំនាញវិជ្ជាជីវៈ និង​បច្ចេកទេស កាលពីខែវិច្ឆិកា ឆ្នាំ២០២៣កន្លងទៅ។

នៅក្នុងបណ្តាញសង្គម នៅព្រឹកថ្ងៃទី១៨ តុលា ឆ្នាំ២០២៤នេះ ឯកឧត្តម កត្តា អ៊ន រដ្ឋលេខា​ធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា អាហា​រូបករណ៍​ចែក​ចេញជាពីរប្រភេទ ទី១៖ កម្មវិធីបណ្តុះបណ្តាលរយៈពេលវែងដែលមានប្រភេទ សញ្ញា​​បត្រ​ជាន់ខ្ពស់បច្ចេកទេស, សញ្ញាបត្របច្ចេកទេស និងវិជ្ជាជីវៈ៣, សញ្ញាបត្របច្ចេកទេស និង​វិជ្ជាជីវៈ២, សញ្ញាបត្របច្ចេកទេស និងវិជ្ជាជីវៈ១។ និងទី២៖ អាហា​រូបករណ៍​ក្នុង​កម្ម​វិធី​បណ្តុះ​បណ្តាល​រយៈពេលខ្លី ដែលជាប្រភេទ​អាហារូបករណ៍​មូលនិ​ធិ​ជាតិ​ណ្តុះ​បណ្តាល​ដើម្បី​កាត់​បន្ថយ​ភាព​ក្រីក្រ។

ឯកឧត្តមបានលើកឡើងថា វិស័យអប់រំបណ្តុះបណ្តាលវិជ្ជាជីវៈ និងបច្ចេកទេស បាននិងកំពុង​ចូល​រួម​យ៉ាង​សកម្មលើការផលិតមូលធនមនុស្ស និងអភិវឌ្ឍកម្លាំងពលកម្មឱ្យមានជំនាញ ចំណេះដឹង សមត្ថភាព ការប្រកួតប្រជែងខ្ពស់ មានភាពធន់ បត់បែន អាចឆ្លើយ​តប​តាម​តម្រូវ​ការ​នៃ​ការ​វិវត្ត​យ៉ាង​ឆាប់​រហ័សនៃមូលដ្ឋានសេដ្ឋកិច្ច ឧស្សាហកម្ម និងបច្ចេកវិទ្យាឌីជីថល ស្របតាមគោល​នយោបាយ​របស់​រាជរដ្ឋាភិបាល ដោយធានាថា «ពលរដ្ឋម្នាក់​មាន​ជំនាញ​មួយ​យ៉ាង​តិច​ប្រចាំ​ជីវិ​ត​» និងអនុវត្តតាមអភិក្រមរបស់ សម្ដេចធិបតី ហ៊ុន ម៉ាណែត គឺ “រៀនឱ្យចប់ រៀនឱ្យចេះ ឱ្យ​មាន​ការងារ​ធ្វើ”​។

ឯកឧត្តម កត្តា អ៊ន បានអំពាវនាវដល់យុវជនដែលមិនទាន់បានចុះឈ្មោះចូលរៀនជំនាញវិជ្ជាជីវៈ និង​បច្ចេកទេស សូមរួសរាន់មកចុះឈ្មោះចូលរៀនជំនាញវិជ្ជាជីវៈ នៅ​វិទ្យាស្ថាន​ដែល​នៅ​ក្បែរ​មូល​ដ្ឋាន​របស់ខ្លួន។ យុវជនដែលមកពីគ្រួសារក្រីក្រ និងគ្រួសារងាយរងហានិភ័យ នៅតែទទួល​ការ​រៀន​ជំនាញដោ​យឥតគិតថ្លៃ និងថែមទាំងទទួលបានប្រាក់ឧបត្ថម្ភដដែល។

គិតត្រឹមដើមខែតុលា ឆ្នាំ២០២៤ ក្រសួងការងារ និងបណ្តុះបណ្តាលវិជ្ជាជីវៈ ទទួល​បាន​យុវជន​ចុះ​ឈ្មោះចូ​លសិក្សាជំនាញសរុបចំនួនជាង ៨ម៉ឺននាក់។ ក្នុងចំណោមសិស្ស​ដែល​បាន​ចុះ​ឈ្មោះ​ចូ​ល​រៀន​ជំនាញសរុប ក្នុងនោះសិស្សបានបញ្ចប់ការសិក្សាមានចំនួនជាង ១ម៉ឺននាក់។ យុវជន​សិក្សា​ជំនាញរបស់រាជរដ្ឋាភិបាលទាំងនោះបានទទួលការងារធ្វើសមរម្យ, មួយចំនួន​ចេញ​ប្រកប​មុខរបរ​ផ្ទាល់​ខ្លួន និងខ្លះទៀតកំពុង​ចុះ​កម្ម​សិក្សា​នៅ​តាម​ក្រុម​ហ៊ុន​ឯកជន​នានា​ក្រោម​កិច្ច​សម្រប​សម្រួល​របស់ក្រសួងការងារ និងបណ្តុះបណ្តាលវិជ្ជាជីវៈ៕ អត្ថបទ ឈិត បូរ៉ាវី