លោកស្រី ជួប ស៉ីយ៉ន ត្រូវប្រកាលទទួលស្គាល់ជាប្រធានក្រុមប្រឹក្សា និងជាចៅសង្កាត់ព្រែកប្រាថ្មី

​ភ្នំពេញ ៖ លោកស្រី ជួប ស៉ីយ៉ន ត្រូវប្រកាលទទួលស្គាល់ជាប្រធានក្រុមប្រឹក្សា និងជាចៅសង្កាត់ព្រែកប្រាថ្មី ជំនួសលោក ងិន ធីរ៉ូ អតីតចៅសង្កាត់ ដែលបានទទួលមរណៈភាពដោយជរាពាធ កាលពីពេលកន្លង ។

ពិធីប្រកាសទទួលស្គាល់នេះ ធ្វើឡើងនារសៀលថ្ងៃទី១៨ ខែតុលា ឆ្នាំ២០២៤នេះ ក្រោមវត្តមានប្រកាសដោយលោកចេង មុនីរ៉ាអភិបាល នៃគណៈអភិបាលខណ្ឌច្បារអំពៅ ដោយមានការចូលរួមពីគណះអភិបាលរង លោក-លោកស្រីជាចៅសង្កាត់ទាំង៨ និង ប្រជាពលរដ្ឋក្នុងមូលដ្ឋានប្រមាណជិតបីរយនាក់ទៀតផងដែរ ។

ក្នុងឱកាសនោះ លោកចេង មុនីរ៉ា អភិបាលខណ្ឌច្បារអំពៅ បានណែនាំ និងផ្តល់អនុសាសន៍ការងារសម្ខាន់ៗមួយចំនួនធំដល់លោកស្រីជាចៅសង្កាត់ថ្មី ដើម្បីយកទៅបំពេញឱ្យបានល្អប្រសើរបំផុត ក្នុងបុព្វហេតុបម្រើប្រជាពលរដ្ឋប្រកបដោយគុណភាព ក្នុងនាមជាអាជ្ញាធរមូលដ្ឋាន ក៏ដូចជាបុព្វហេតុបម្រើប្រទេសជាតិ ។

ចំណុចស្នូលសម្ខាន់ៗ ដែលលោកអភិបាលខណ្ឌណែនាំរួមមាន ៖ ការអនុវត្តគោលនយោបាយភូមិឃុំមានសុវត្ថិភាពឱ្យបានខ្លាំង , ការយកចិត្តទុកដក់ខ្ពស់លើការផ្តល់សេវាសាធារណះឱ្យបានល្អជូនពលរដ្ឋក្នុងដែនគ្រប់គ្រងរបស់ខ្លួន តាមរយះយន្តការច្រកចេញចូលតែមួយ , ពង្រឹងកិច្ចការងារដោះស្រាយវិវាទដីធ្លី និងជម្លោះដទៃផ្សេងៗទៀត ឱ្យមានជាផលវិជ្ជមានល្អបំផុតសម្រាប់ពលរដ្ឋជាម្ចាស់វិវាទទាំងសងគ្នា ពោលគឺគោលនយោបាយឈ្នះៗទាំងអស់គ្នា រួមជាមួយកិច្ចការងារចម្បងមួយចំនួនដទៃទៀតផងដែរ ៕ លីហេង