[UPDATE] មនុស្ស ៦នាក់បានស្លាប់ក្នុងប្រទេសគុយបា ក្រោយការវាយប្រហារពីព្យុះអូស្ការ ខណៈការដាច់ចរន្តអគ្គិសនីនៅតែបន្ត

លោកប្រធានាធិបតីគុយបា មីហ្គូអេល ដៀស ខាណេល (Miguel Diaz-Canel) បាននិយាយកាលពីថ្ងៃចន្ទដើមសប្ដាហ៍នេះថា ចំនួនអ្នកស្លាប់ដោយសារព្យុះត្រូពិចអូស្ការ(Oscar) បានកើនឡើងដល់យ៉ាងហោចណាស់ ៦ នាក់ហើយ។

មេដឹកនាំរូបនេះបានប្រាប់ប្រព័ន្ធផ្សព្វផ្សាយរដ្ឋាភិបាលថាព្យុះអូស្ការ បានវាយប្រហារតំបន់ភាគខាងកើតរបស់គុយបា ហើយការខូចខាតភាគច្រើនត្រូវបានរាយការណ៍នៅក្នុងខេត្ត ក្វាន់តាណាម៉ូ (Guantanamo) ខណៈទីក្រុង សាន់ អង់តូនីញ៉ូ (San Antonio) និងទីក្រុង អ៊ីមីយ៉ាស( Imias) បានកត់ត្រាកម្រិតទឹកជំនន់ជាប្រវត្តិសាស្ត្រ។

យោងតាមរបាយការណ៍ចុងក្រោយរបស់វិទ្យាស្ថានឧតុនិយម ព្យុះអូស្ការ នៅតែបន្តចុះខ្សោយឥទ្ធិពលបន្ទាប់ពីបំណាក់ដីនៅក្នុងខេត្តនេះ កាលពីថ្ងៃអាទិត្យ២០ តុលា ដែលជាព្យុះសង្ឃរាប្រភេទទី ១ ហើយបន្ទាប់មកបានអន់ថយកម្លាំងក្លាយទៅជាព្យុះត្រូពិច។

ក្នុងពេលជាមួយគ្នានោះ កម្មករបានរាយការណ៍កាលពីថ្ងៃចន្ទ ២១ តុលា ថា ការដាច់បណ្ដាញថាមពលអគ្គិសនីនៅក្នុងរដ្ឋធានីរបស់ប្រទេសនេះ កំពុងជះផលអវិជ្ជមានដល់ឧស្សាហកម្មទេសចរណ៍របស់ខ្លួន។ ។

មន្ត្រីបាននិយាយកាលពីដំបូងថា ថាមពលនឹងត្រូវបានស្ដារឡើងវិញនៅថ្ងៃចន្ទ ឬថ្ងៃអង្គារ ២២ តុលា តែគេមិនទាន់ច្បាស់ថាតើផលរំខានចុងក្រោយបំផុតនេះ នឹងពន្យារការខិតខំរបស់រដ្ឋាភិបាលដល់កម្រិតណានោះទេ៕