ក្រុមអ្នកវិភាគនៅកម្ពុជា៖ ការចោទពីភាពបរាជ័យលើការអនុវត្តកិច្ចព្រមព្រៀងទីក្រុងប៉ារីស​របស់​ក្រុមជ្រុលនិយម គឺខុសពីការពិត និងគ្រាន់តែជារបៀបវារៈនយោបាយតែប៉ុណ្ណោះ

ក្រោយពីទទួលនូវបរាជ័យដ៏សែនអាម៉ាស់ជាច្រើនដងក្នុងការធ្វើបាតុកម្មនៅប្រទេសជប៉ុន កូរ៉េខាងត្បូង និងអាមេរិក ក្រោម​លេស​ញុះញង់​ស្តីពី​បញ្ហា​កិច្ច​សហ​ប្រតិបត្តិការ​តំបន់​ត្រីកោណ​អភិវឌ្ឍន៍​កម្ពុជា-ឡាវ-វៀតណាម (CLV-DTA) ឥឡូវនេះ ក្រុមនយោបាយប្រឆាំងជ្រុលនិយម បាន​បង្វែរទិសដៅដោយយកកិច្ចព្រមព្រៀងសន្តិភាពទីក្រុង​ប៉ារីស​មក​ធ្វើ​ជា​ប្រធាន​បទ​ដើម្បី​បង្ក​ជា​ការ​ភ័ន្ត​ច្រឡំ និងដកការទុកចិត្ត​របស់​ប្រជាជន​ខ្មែរ​លើ​រដ្ឋាភិបាលដែ​ល​អ្នក​វិភាគ​នៅ​កម្ពុជា​មើល​ឃើញ​ថា ជាការខុសពីការពិត និងគ្រាន់តែជារបៀបវារៈនយោបាយតែប៉ុណ្ណោះ។

លោកបណ្ឌិត យង់ ពៅ អ្នកជំនាញភូមិសាស្ត្រនយោបាយ នៃរាជបណ្ឌិត្យសភាកម្ពុជា បាន​លើក​ឡើង​ថា ការចោទប្រកាន់របស់ក្រុមប្រឆាំងគឺជាការលាបពណ៌ និងដើម្បី​ផល​ចំណេញ​នយោបាយ​របស់​ខ្លួន។

លោកបណ្ឌិត មានប្រសាសន៍ថា “ខ្ញុំមិនយល់​ដូច​ទស្សនៈ​ប្រឆាំង​ដែល​និយាយ​ថា​កម្ពុជា​បរាជ័យ​ក្នុង​ការអនុវត្តកិច្ចព្រមព្រៀងទីក្រុងប៉ារីសទេ គាត់និយាយដោយលំអៀងទៅលើនយោបាយ ដោយ​មាន​របៀបវារៈនយោបាយ”។

លោកបានបន្ថែមថា “កម្ពុជាអនុវត្តកិច្ចព្រមព្រៀងនេះបានជោគជ័យ ដែល​ជោគ​ជ័យ​ទី​១​គឺ​ជោគ​ជ័យ​ជា​ប្រជាជាតិសកល ដោយអង្គការ​សហ​ប្រជាជាតិ​មិន​ដែល​ស្វែង​រក​សន្តិភាព​បាន​ជោគ​ជ័យ​ដូច​នៅ​កម្ពុជាទេ”។

លោកបណ្ឌិតបានបន្តថា កម្ពុជាទទួលបានជោគជ័យនាំទៅដល់ការរៀបចំការបោះឆ្នោត ការរៀប​ចំ​រាជ​រដ្ឋាភិបាល ការតាក់តែងធម្មនុញ្ញរហូតដល់ការអនុវត្ត និងការ​ថែរ​ក្សា​សុខ​សន្តិភាព​ជូន​ប្រទេស​ជាតិ ដោយនយោបាយឈ្នះៗរបស់សម្តេចតេជោ ហ៊ុន សែន។ បន្ថែមពីនោះ លោក​បណ្ឌិត​បាន​គូសបញ្ជាក់ថា កម្ពុជាបានចូលរួមក្នុងឆាកអន្តរជាតិ ទាំងកិច្ចការតំបន់ កិច្ចការសកល កិច្ចការ​អង្គការសហប្រជាជាតិ និងចូលរួមក្នុងការថែរក្សាសន្តិភាពពិភពលោក ដូចជាការ​ចូល​រួម​នៅ​ក្នុង​វេទិកាអាស៊ានជាដើម។

ជាមួយគ្នានេះ លោក ថុង ម៉េងដាវីត អ្នកវិភាគភូមិសាស្ត្រនយោបាយ ថាការចោ​ទ​ប្រកាន់​រប​ស់​ក្រុម​នយោបាយជ្រុលនិយមទាំងនោះគឺខុសស្រឡះពីការពិតជាក់ស្តែង ហើយជា​ការ​បញ្ជា​របស់​បរទេស​ដែល​ជាមេកើយតែប៉ុណ្ណោះ។

លោក បានលើកឡើងថា “ការចោទប្រកាន់នេះ គឺផ្ទុយស្រឡះពីតថភាពពិតនៃដំណើរការអភិវឌ្ឍ និង​ការរីកចម្រើនរបស់កម្ពុជានៅគ្រប់វិស័យទាំងនយោបាយ សេដ្ឋកិច្ច និងការបរទេស”។

លោកបានបន្ថែមថា “ការចោទប្រកាន់របស់ក្រុមប្រឆាំងនៅក្រៅប្រទេស និងទណ្ឌិត សម រង្ស៊ី បាន​បង្ហាញយ៉ាងច្បាស់ពីគោលនយោបាយបរទេសនិយម និងគិតតែប្រយោជន៍ផ្ទាល់ខ្លួន និង​បក្ស​ពួក​”។

លើសពីនេះទៅទៀត អ្នកវិភាគភូមិសាស្ត្រនយោបាយរូបនេះបានគូសបញ្ជាក់ថា ការ​យក​រឿង​កិច្ច​ព្រមព្រៀងទីក្រុងប៉ារីស រឿង CLV-DTA និងបញ្ហាព្រំដែនជាដើម សុទ្ធសឹងតែជាចេតនា និង​ការ​បង្គាប់​បញ្ជា​ពីបរទេសដែលជាចៅហ្វាយរបស់ក្រុមប្រឆាំង បើទោះបីជាបញ្ហាទាំងនោះ រដ្ឋាភិបាល​កម្ពុជា​បាន​ធ្វើការបកស្រាយត្រឹមត្រូវក៏ដោយ ។

ទន្ទឹមនឹងនេះ លោកបណ្ឌិត ឈត ប៊ុនថង អ្នកជំនាញទស្សនវិជ្ជា និងកិច្ចការសង្គម នៃរា​ជ​បណ្ឌិត្យ​សភា​កម្ពុជា ថាការចោទប្រកាន់របស់ក្រុមប្រឆាំងទាំងនេះ គឺជារឿងដដែលៗ ហើយ​មាន​ជា​រៀង​រាល់​ឆ្នាំ។

លោកបណ្ឌិតបានលើកឡើងថា “រៀងរាល់ឆ្នាំតែងតែមានការលើកឡើងពីមុំ ពីជ្រុង​នយោបាយ​ពី​ទស្សនៈ​នយោបាយផ្សេងៗទៅលើកិច្ចព្រមព្រៀងសន្តិភាពទីក្រុងប៉ារីសនឹង”។

លោក​បាន​បន្តថា ការលើកឡើងទាក់ទងនឹងការអនុវត្តកិច្ចព្រមព្រៀងទីក្រុងប៉ារីស គឺជួយឱ្យរ​ដ្ឋា​ភិបាល​កាន់​តែយកចិត្តទុកដាក់ ពិនិត្យ និងបំពេញបន្ថែមចន្លោះខ្វះខាតរបស់ខ្លួន ដែលក្នុង​នោះ​ការ​លើក​ឡើង​​នានាគួរភ្ជាប់ជាមួយភស្តុតាង និងហេតុផលច្បាស់លាស់ក្នុងន័យកែលំអរ កុំបំប៉ោង​បំផ្លើស​ពី​ការពិតជាក់ស្តែង។

ទោះយ៉ាង លោកបានសង្កត់ធ្ងន់ថា “ប្រជាពលរដ្ឋកុំចេះតែជឿដោយគ្មានហេតុផល ប្រជា​ពលរដ្ឋ​ត្រូវ​ចេះ​បង្កើនចំណេះដឹង បង្កើនការទទួលបានព័ត៌មាន តាមដានហេតុការណ៍ហើយចេះវិភាគ ចេះ​ពិចារណា ចេះវាយតម្លៃ ប្រសិនជាបងប្អូនប្រជាពលរដ្ឋយើងក្លាយទៅជាអ្នកមានចំណេះដឹង យល់​ពី​ល្បិច​នយោបាយ ចេះវិភាគ ចេះទទួលបានព័ត៌មានអីច្រើន អ៊ីចឹងអ្នកខំបំផ្លើសខំបំប៉ោង ខំ​ធ្វើ​នយោបាយប្រជាភិថុតិអ្វីជាដើម អ្នកនោះនឹងបាត់តម្លៃដោយខ្លួនឯង”។

គួរបញ្ជាក់ថា កិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ គឺជាកិច្ចព្រមព្រៀងគ្នា ដែល​ធ្វើ​ឡើង​នៅទីក្រុងប៉ារីស ប្រទេសប៉ារាំង ដែលមានការចុះហត្ថលេខាពីភាគីជម្លោះកម្ពុជា ៤ និង​មាន​សាក្សីមកពី ១៨ប្រទេស រួមទាំងអគ្គលេខាធិការអង្គការសហប្រជាជាតិ (UN) ផងដែរ ក្នុង​គោលបំណងបញ្ចប់សង្គ្រាមស៊ីវិលនៅកម្ពុជា។ កិច្ចព្រមព្រៀងនេះ បានផ្តល់កម្ពុជានូវ ការ​កសាង​សង្គម​ប្រជាធិបតេយ្យ តាមរយៈការបោះឆ្នោត ការបង្កើតរដ្ឋធម្មនុញ្ញ ជាពិសេស​គឺ​ការ​យាង​ព្រះ​មហា​ក្សត្រខ្មែរ ព្រះករុណា ព្រះបាទសម្តេចព្រះ នរោត្តម សីហនុ ចូលមកកាន់មាតុកម្ពុជាវិញ និង​បង្កើតព្រះរាជាណាចក្រកម្ពុជាទី២ គឺជារបបរាជាធិបតេយ្យ អាស្រ័យរដ្ឋធម្មនុញ្ញ ហើយ​ស្មារតី​នៃ​កិច្ច​ព្រម​ព្រៀង ២៣ តុលា ត្រូវបានបញ្ចូលក្នុងរដ្ឋធម្មនុញ្ញ នៃព្រះរាជាណាចក្រកម្ពុជា ដែល​កំពុង​ប្រើ​ប្រាស់សព្វថ្ងៃនេះដែរ៕