ក្រសួងសុខាភិបាល មានឆន្ទៈមុតមាំសហការជាមួយក្រសួងមុខងារសាធារណៈ ដើម្បីកែទម្រង់រដ្ឋបាលសាធារណៈ

ក្រសួងមុខងារសាធារណៈ នៅព្រឹកថ្ងៃទី ២៣ ខែតុលា ឆ្នាំ ២០២៤ បាន សហការ​ជាមួយ​ក្រសួង​សុខាភិបាល រៀបចំសិក្ខាសាលា ស្តីពី«ការពិនិត្យឡើងវិញ និងការវិភាគមុខងារ និងរចនា​សម្ព័ន្ធ​នៃ​ក្រសួង​សុខាភិបាល» ក្រោមអធិបតីភាពដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រី​ក្រសួងមុខងារសាធារណៈ រួមទាំងវត្តមាន ឯកឧត្តម ឈាង រ៉ា រដ្ឋមន្ត្រីក្រសួង​សុខាភិបាល​។ ក្នុងការចាប់ផ្ដើមសិក្ខាសាលានេះ ឯកឧត្តម ឈាង រ៉ា ក្នុងនាមជារដ្ឋមន្ត្រីក្រសួងសុខាភិបាល បាន​បង្ហាញនូវឆន្ទៈយ៉ាងមុតមាំ ក្នុងការសហការជាមួយក្រសួងមុខងារសាធារណៈ ដើម្បីកែទម្រង់​រដ្ឋបាល​សាធារណៈ។

ក្នុងមតិស្វាគមន៍ចាប់ផ្ដើមសិក្ខាសាលា ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួង​សុខាភិបាល បានបង្ហាញ​ការតាំងចិត្តយ៉ាងមុតមាំក្នុងការចូលរួមអនុវត្តកម្មវិធី​កែទម្រង់​រដ្ឋ​បាល​សាធារណៈ របស់រាជរដ្ឋាភិបាល ជាមួយក្រសួងមុខងារសាធារណៈ។ ឯកឧត្តម​សាស្ត្រាចារ្យ​បាន​លើក​ឡើង​ថា “ការផ្តួចផ្តើមរៀបចំសិក្ខាសាលានាពេលនេះ ជាការគិតគូរយ៉ាង​សមស្រប​ក្នុង​ការ​ទទួល​ព័៌មាន ការពិភាក្សាផ្លាស់ប្តូរយោបល់ និងទទួលការណែនាំពីឯកឧត្តមឧបនាយករដ្ឋមន្ត្រី ក្រសួង​មុខងារសាធារណៈ ដើម្បីពង្រឹងការសហការគ្នាលើការកែទម្រង់រដ្ឋបាលសាធារណៈ នៅ​ក្រសួងសុខាភិបាល ឱ្យបានកាន់តែល្អប្រសើរបន្ថែមទៀត។

ឯកឧត្តមសាស្តាចារ្យ បានបន្ថែមថា “ដើម្បីចូលរួមក្នុងការកែទម្រង់រដ្ឋបាលសាធារណៈ របស់​រាជ​រដ្ឋាភិបាល តាមរយៈការសហការការងារយ៉ាងជិតស្និតជាមួយក្រសួងមុខងារសាធារណៈ ក្រសួង​សុខាភិបាល បានបង្កើតក្រុមការងារចំនួន៣ រួមមាន៖ ក្រុមការងារកែទម្រង់រដ្ឋបាលសាធារណៈ ក្រុម​ការងារពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួងសុខាភិបាល និងក្រុម​ការងារ​ការ​ធ្វើ​បច្ចុប្បន្នភាពរចនាសម្ព័ន្ធ និងទិន្នន័យមន្ត្រីសុខាភិបាល”។

សិក្ខាសាលានេះ ជាផ្នែកមួយនៃការចុះជួបតាមបណ្តាក្រសួង ស្ថាប័ន ចំនួន៩ រួមមាន៖ ក្រសួងមហាផ្ទៃ, ក្រសួងអប់រំ យុវជន និងកីឡា, ក្រសួងសេដ្ឋកិច្ច និងហិរញ្ញវត្ថុ, ក្រសួងសង្គមកិច្ច អតីតយុទ្ធជន និងយុវនីតិ សម្បទា, ក្រសួងការងារ និងបណ្តុះបណ្តាលវិជ្ជាជីវៈ, ក្រសួងយុត្តិធម៌, ក្រសួងសុខាភិបាល, ទីស្តីការគណៈ រដ្ឋមន្ត្រី, និងក្រសួងរៀបចំដែនដី នគរូបនីយកម្ម និងសំណង់​។ ជំនួបនីមួយៗត្រូវបានរៀបចំឡើងដោយមាន បញ្ចូលបទបង្ហាញរបស់ថ្នាក់ដឹកនាំ​ក្រសួង​មុខងារ​សាធារណៈ​ចំ​នួនពីរ រួមជាមួយការរៀបចំវេទិកាសម្រាប់កិច្ច ពិភាក្សា សួរសំណួរ និងផ្លាស់ប្តូរ​យោបល់។

បទបង្ហាញរបស់ថ្នាក់ដឹកនាំក្រសួងមុខងារសាធារណៈចំនួនពីរ រួមមាន៖ ការ​បង្ហាញ​វឌ្ឍនភា​ព​ការងារ​បឋម នៃការពិនិត្យឡើងវិញ និងការវិភាគមុខងារ និងរចនាសម្ព័ន្ធ របស់ក្រសួង ស្ថាប័ន និងការរៀបចំ និងការអនុវត្តការងាររួមគ្នា ក្នុងក្របខណ្ឌការកែទម្រង់ និងពង្រឹងអភិបាលកិច្ច៕ អត្ថបទ៖ គឹម ហុក