កម្ពុជាគាំទ្រការពង្រាងឯកសារឱ្យប្រសើរឡើងនៃការធ្វើហិរញ្ញប្បទានសុខាភិបាលក្នុងកិច្ចប្រជុំលើកទី៧៥ របស់ WHO

ក្នុងកិច្ចប្រជុំលើកទី៧៥ របស់អង្គការសុខភាពពិភពលោក សម្រាប់តំបន់ប៉ាស៊ីហ្វិកខាងលិច នៅទីក្រុងម៉ានីល និងជាចំនុចសំខាន់ដែលកម្ពុជា កំពុងតែធ្វើ ហើយ​តំបន់បាន​លើក​យក​មក​ជជែក​ពិភាក្សាក្នុងបច្ចុប្បន្នភាព គឺហិរញ្ញប្បទានសុខាភិបាល ហើយកម្ពុជា បានស្វាគមន៍​គាំទ្រលើ​ប្រធាន​បទ​នេះ​ខ្លាំងណាស់ ដែលកម្ពុជា កំពុងតែមានអាទិភាព​ពង្រឹង​ឲ្យបា​ន​រីក​ចម្រើន​គួរ​ជា​ទីពេញ​ចិត្ត។

ការថ្លែងរបស់ឯកឧត្តមសាស្រ្តាចារ្យ ឈាង រ៉ា រដ្ឋមន្រី្តក្រសួងសុខាភិបាល បែបនេះ នាឱកាស​អញ្ជើញ​​ធ្វើ​មាតុភូមិនិវត្តប្រកបដោយសុវត្ថិភាព និងជោគជ័យ បន្ទាប់ពីឯកឧត្តមសាស្ត្រាចារ្យ និង​គណៈប្រតិភូបានចូលរួមកិច្ចប្រជុំលើកទី៧៥ របស់អង្គការសុខភាពពិភពលោក សម្រាប់​តំបន់​ប៉ាស៊ីហ្វិក​ខាងលិច នៅទីក្រុងម៉ានីល សាធារណរដ្ឋហ្វីលីពីន ចាប់ពីថ្ងៃទី២១ ដល់២៥ ខែតុលា ឆ្នាំ២០២៤។

ឯកឧត្តមសាស្រ្តាចារ្យ បានថ្លែងថា កម្ពុជាបានគាំទ្រនូវពង្រាងឯកសារ ឲ្យប្រសើរ​ឡើង​នៃ​ការ​ធ្វើ​ហិរញ្ញប្បទាន​សុខាភិបាល ដែលស្របជាមួយនឹងដំណើររបស់កម្ពុជា ក្នុងការឈាន​ទៅ​រក​ការ​ប្រើ​ប្រាស់​ផែន​ទីបង្ហាញផ្លូវ និងឈានទៅរកការគ្របដណ្តប់សុខភាពជាសកលនៅឆ្នាំ២០៣៥។

ឯកឧត្តមសាស្រ្តាចារ្យ បានបញ្ជាក់ទៀតថា តុល្យភាពរវាងការព្យាបាល និងការការពារ កម្ពុជា បាន​ធើ្វទន្ទឹមគ្នា ហើយខិតខំធ្វើយ៉ាងណាឲ្យដំណើរការទាំងពីរនេះ មានតុល្យភាពគ្នា ដើម្បីនឹ​ង​ទទួល​បាននូវផលទាំងពីរ (ទាំងការព្យាបាល និងការការពារ) ពិព្រោះថាការការពារនេះ មានផល​ចំណេញ​ជា​សេដ្ឋកិច្ចធំ ហើយក្នុងរយៈពេលវែងឆ្ងាយ៕ អត្ថបទ រដ្ឋា