សហរដ្ឋអាមេរិកប្រកាសបន្ថែមជំនួយទឹកប្រាក់ចំនួនជាង ៣៨លានដុល្លារ មកកាន់ប្រទេសកម្ពុជា

ភ្នំពេញ៖ នាយិកានៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិសាកលលោក (USAID) បានប្រកាសកម្មវិធីថ្មីៗ និងថវិកាបន្ថែមចំនួនជាង ៣៨លានដុល្លារ ដល់ប្រទេសកម្ពុជា និងបានចាត់ទុកកម្ពុជាថា នៅតែជាដៃគូដ៏សំខាន់មួយ ក្នុងការសម្រេចបាននូវចក្ខុវិស័យរួមមួយសម្រាប់តំបន់ឥណូ-ប៉ាស៊ីហ្វិក ដែលមានសេរីភាព និងបើកចំហរ រុងរឿង និងមានសុវត្ថិភាព។

នៅក្នុងសន្និសីទសារព័ត៌មាន នាល្ងាចថ្ងៃទី២៣ ខែតុលា ឆ្នាំ២០២៤នេះ លោកស្រីនាយិកា បានលើកឡើងអំពីការវិនិយោគថ្មី និងការគាំទ្រថ្មីមួយចំនួនសម្រាប់ប្រជាជនកម្ពុជា តាមរយៈការពង្រីកសកម្មភាពការងារថ្មីៗរបស់សហរដ្ឋអាមេរិក ក្នុងវិស័យសន្តិសុខស្បៀង បរិស្ថាន សង្គមស៊ីវិល ប្រព័ន្ធផ្សព្វផ្សាយ និងវិស័យការងារ។ លោកស្រី បានបន្តថា នេះជាផ្នែកមួយនៃការប្តេជ្ញាចិត្តរបស់រដ្ឋាភិបាលអាមេរិក ដើម្បីពង្រឹងវិស័យកសិកម្ម និងប្រព័ន្ធចំណីអាហារ។

លោកស្រី Samantha Power បានគូសបញ្ជាក់នូវមូលនិធិថ្មីមរាប់កម្មវិធីស្បៀងអាហារ ដែលមានទឹកប្រាក់ជាង ២៩លានដុល្លារ ពីក្រសួងកសិកម្មនៃសហរដ្ឋអាមេរិក (USAID)។ ជំនួយនេះ នឹងជួយប្រទេសកម្ពុជាកែលម្អនូវការអនុវត្ត និងអភិវឌ្ឍបទបញ្ញត្តិសុវត្ថិភាពចំណីអាហារ ដោយកែលម្អប្រព័ន្ធគ្រប់គ្រងក្រោយការប្រមូលផលនៃសណ្ដែកសៀង បង្កើនការទទួលយកបច្ចេកវិទ្យាឆ្លាតវៃនៃអាកាសធាតុ ផ្តល់ការបណ្តុះបណ្តាលស្តីពីការអនុវត្តសុវត្ថិភាពចំណីអាហារល្អបំផុត និងពង្រឹងទំនាក់ទំនងទីផ្សារ។

ក្រោមកម្មវិធីភាពជា ដៃគូមេគង្គ-សហរដ្ឋអាមេរិក លោកស្រីនាយិកា ក៏បានប្រកាសអំពីកិច្ចខិតខំថ្មីៗដើម្បីអភិរក្សជីវចម្រុះដ៏សម្បូរបែបនៃតំបន់ទន្លេមេគង្គខាងក្រោម ដែលជាជម្រកមច្ឆជាតិជាង ១,០០០ប្រភេទ ប៉ុន្តែត្រូវបានគំរាមកំហែងកាន់តែខ្លាំងដោយផលប៉ះពាល់នៃការប្រែប្រួលអាកាសធាតុ និងការអភិវឌ្ឍហេដ្ឋារចនាសម្ព័ន្ធ។ ដោយបញ្ជាក់ពីការប្តេជ្ញាចិត្តដ៏រឹងមាំរបស់សហរដ្ឋអាមេរិកក្នុងការការពារជីវចម្រុះ USAID នឹងពង្រីក និងពង្រឹងការងាររបស់ខ្លួនជាមួយរដ្ឋាភិបាល និងសហគមន៍ក្នុងស្រុកនៅកម្ពុជាអំឡុងពេល ៥ឆ្នាំខាងមុខនេះ ដើម្បីអភិរក្សនឹងធ្វើឲ្យមានចីរភាពដ៏អស្ចារ្យភាពនៃទន្លេមេគង្គ ព្រមទាំងធ្វើការជាមួយ ប្រទេសផ្សេងទៀតនៅតំបន់ទន្លេមេគង្គខាងក្រោម។

ក្រៅពីនេះ សហរដ្ឋអាម៉េរិក ក៏បានប្រកាសពីជំនួយជាង ៦លានដុល្លារ ចំពោះសង្គមស៊ីវិល ប្រព័ន្ធផ្សព្វផ្សាយ និងវិស័យការងារដើម្បីជួយដល់ការ ប្តេជ្ញាចិត្តរបស់ប្រទេសកម្ពុជា ចំពោះការគ្រប់គ្រងតាមលទ្ធិប្រជាធិបតេយ្យ គោរពសិទ្ធិមនុស្ស និងការគាំ ទ្រដល់សង្គមស៊ីវិល។ លើសពីថែមនេះ ក្រសួងការងារសហរដ្ឋអាមេរិក បានបញ្ជាក់អំពីមូលនិធិចំនួន ៣លានដុល្លារ ដើម្បីបង្កើនកិច្ចសហប្រតិបត្តិការ នឹងភាពជាដៃគូរវាង និងក្នុងចំណោមជន៍មានពិការភាពនៅកម្ពុជា៕