រដ្ឋមន្ត្រីទួរគី៖ អ្នកវាយប្រហារសម្លាប់មនុស្ស៥នាក់នៅមូលដ្ឋានអាកាសចរណ៍ទួរគី ទំនងជាក្រុមសកម្មប្រយុទ្ធឃឺដ

កាលពីថ្ងៃពុធ អ្នកវាយប្រហារពីរនាក់បានសម្លាប់មនុស្ស៥នាក់ និងបណ្តាលឲ្យមនុស្ស២២នាក់ផ្សេងទៀតរងរបួស ជាអ្វីដែលទីក្រុងអង់ការ៉ាចាត់ទុកថា ជាការវាយប្រហារភេរវកម្មនៅឯទីស្នាក់ការកណ្តាលឧស្សាហកម្មអាកាសចរណ៍របស់ប្រទេសទួរគី។

រដ្ឋមន្ត្រីក្រសួងមហាផ្ទៃ លោក Ali Yerlikaya បាននិយាយថា អាជ្ញាធរជឿថា ក្រុមសកម្មប្រយុទ្ធគណបក្សពលករឃឺដ (PKK) ជាអ្នកទទួលខុសត្រូវចំពោះការវាយប្រហារនេះ។ លោក បានបញ្ជាក់ថា អ្នកវាយប្រហារពីរនាក់ ត្រូវបានសម្លាប់បន្ទាប់ពីការវាយប្រហារនេះ ហើយក្នុងចំណោមអ្នករងរបួសពីរនាក់ស្ថិតក្នុងស្ថានភាពធ្ងន់ធ្ងរ។

លោក Yerlikaya និយាយថា អ្នកវាយប្រហារទំនងជាសមាជិករបស់គណបក្សពលករឃឺដ (PKK) ក្រៅច្បាប់។

ជាមួយគ្នានេះ ប្រធានាធិបតីទួរគី លោក Tayyip Erdogan រួមជាមួយលោក Vladimir Putin ប្រធានាធិបតីរុស្ស៊ីនៅក្នុងសន្ិសីទារព័ត៌មានរបស់ក្រុមប្រទេសប្រ៊ីក(BRICS) នៅក្នុងទីក្រុង Kazan របស់រុស្ស៊ី បានថ្កោលទោសការវាយប្រហារនេះ ហើយអង្គការណាតូ សហរដ្ឋអាមេរិក និងសហភាពអឺរ៉ុប ក៏បានថ្កោលទោសការវាយប្រហារនេះ ផងដែរ។

សាក្សី បានប្រាប់សារព័ត៌មានរ៉យទ័រថា បុគ្គលិកនៅខាងក្នុងអគារត្រូវបានអាជ្ញាធរនាំទៅកាន់ទីតាំងសុវត្ថិភាព ហើយគ្មាននរណាម្នាក់ត្រូវបានអនុញ្ញាតឱ្យចាកចេញនោះទេក្នុងរយៈពេលពីរទៅបីម៉ោង។ ពួកគេនិយាយថា ការផ្ទុះដែលពួកគេបានឮ ប្រហែលជាបានកើតឡើងនៅច្រកទ្វារចេញផ្សេងៗគ្នា ខណៈបុគ្គលិកកំពុងចាកចេញពីកន្លែងធ្វើការ។