សម្ដេចធិបតី បន្តអំពាវនាវពលរដ្ឋដែលមិនទាន់ស្គាល់ អញ្ជើញទៅទស្សនាស្វែងយល់ពីការអភិវឌ្ឍខេត្តភូមិភាគឦសានរបស់កម្ពុជា

ក្នុងឱកាសអញ្ជើញជាអធិបតី ពិធីសម្ពោធដាក់ឲ្យប្រើប្រាស់ជាផ្លូវការ ទំនប់អូរតេធិបតី ទំនប់សែនសុខដុម និងទំនប់សែនមនោរម្យ ខេត្តមណ្ឌលគិរី នៅព្រឹកថ្ងៃទី២៤ ខែតុលា ឆ្នាំ២០២៤នេះដែរសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបន្តអំពាវនាវពលរដ្ឋដែលមិនធ្លាប់ស្គាល់ អញ្ជើញទៅទស្សនាស្វែងយល់អំពីការអភិវឌ្ឍ និងការតភ្ជាប់ខេត្តភូមិភាគឦសានរបស់កម្ពុជា។

សម្ដេចធិបតី នាយករដ្ឋមន្រ្ដីមានប្រសាសន៍បញ្ជាក់ថា រាជរដ្ឋាភិបាលបានដាក់ចេញនូវគោលនយោបាយច្បាស់លាស់ ហើយអាណត្តិទី៧នេះ ក៏បន្តអនុវត្តនូវយុទ្ធសាស្រ្ដបញ្ចកោណ ដំណាក់កាលទី១ ដើម្បីអភិវឌ្ឍន៍រួមនៅទូទាំងប្រទេស រួមទាំងខេត្តនៅភូមិភាគឦសានរបស់កម្ពុជាផងដែរ។

សម្ដេចធិបតី មានប្រសាសន៍ា គោលនយោបាយអាិភាពសំខាន់ៗដែលរាជរដ្ឋាភិបាលបានដាក់ចេញលើគ្រប់វិស័យ គឺផ្ដោតសំខាន់ទៅលើប្រជាពលរដ្ឋ ផ្ដល់ផលប្រយោជន៍ជូនប្រជាពលរដ្ឋ ក្នុងនោះ គឺដើម្បីឱ្យប្រជាពលរដ្ឋមានចំណេះដឹង សមត្ថភាព, មានសុខភាពល្អ តាមរយៈការរស់នៅស្អាត មានផាសុកភាពល្អ, និងខិតខំកសាងហេដ្ឋារចនាសម្ព័ន្ធ ផ្លូវថ្នល់ ស្ពាន ព្រលានយន្តហោះជាដើម ដើម្បីផ្ដល់ភាពងាយស្រួលទាងការរស់នៅ ការប្រកបអាជីវកម្មរបស់បងប្អូនប្រជាពលរដ្ឋ និងវិនិយោគិនជាដើម។

ក្នុងឱកាសនោះសម្ដេចធិបតី នាយករដ្ឋមន្រ្ដីបានបង្ហាញក្ដីសោមនស្សរីករាយដែល​បានឃើញ​ប្រជាពលរដ្ឋ បានទៅលេងកម្សាន្តទៅខេត្តភូមិភាគឦសាន ​ដោយក្ដីសប្បាយរីករាយ និងបង្ហាញ​ការពិតពីការអភិវឌ្ឍ និងការថែរក្សាអធិបតេយ្យភាព និងបូរណភាពទឹកដីរបស់កម្ពុជា ផ្ទុយ​ពីក្រុមជ្រុលនិយម​នៅក្រៅស្រុកមួយក្ដាប់តូចដែលញុះញង់​លាបពណ៌​មកលើរាជរដ្ឋាភិបាលពាក់ព័ន្ធនឹងការអភិវឌ្ឍខេត្តភូមិភាគឦសានរបស់កម្ពុជានេះ។

សូមជម្រាបថា សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានផ្ដល់គោលការណ៍​ឱ្យ​ក្រុមការងាររាជរដ្ឋាភិបាលជូនពលរដ្ឋទៅទស្សនាខេត្តភូមិភាគឦសាន​របស់កម្ពុជានៅរៀងរាល់​ថ្ងៃចុងសប្ដាហ៍ (សៅរ៍-អាទិត្យ) ដោយឥតគិតប្រាក់រហូតដល់បំណាច់ឆ្នាំ២០២៤នេះ។ បើប្រជាពលរដ្ឋមានចំណាប់អារម្មណ៍ចង់ទៅទស្សនាអាចចុះឈ្មោះទៅទស្សនាបានជាមួយក្រុមការងាររបស់រាជរដ្ឋាភិបាលបាន៕ អត្ថបទ៖ វ៉ន ដារ៉ា