សម្ដេចធិបតី ណែនាំឱ្យចុះសិក្សាសាងសង់ស្ពានបាឡេជូនពលរដ្ឋចំនួន២ឃុំ នៅស្រុកលំផាត់ កំពុងជួបការលំបាកឆ្លងទឹកទៅមក

ក្នុងឱកាសអញ្ជើញជាអធិបតីពិធីសម្ពោធដាក់ឲ្យប្រើប្រាស់ជាផ្លូវការ ទំនប់អូរតេធិបតី ទំនប់សែនសុខដុម និងទំនប់សែនមនោរម្យ ខេត្តមណ្ឌលគិរី នៅព្រឹកថ្ងៃទី២៤ ខែតុលា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏បានណែនាំដល់មន្រ្ដីជំនាញ និងក្រសួងពាក់ព័ន្ធឱ្យចុះសិក្សា ដើម្បីសាងសង់ស្ពានបាឡេជូនពលរដ្ឋចំនួន២ឃុំនៅស្រុកលំផាត់ ខេត្តរតនគិរី ដែលកំពុងជួបការលំបាកឆ្លងទឹកទៅមកក្នុងនោះសិស្សសាលាត្រូវឆ្លងទូកដទៅរៀនផងដែរ។

សម្ដេចធិបតី នាយករដ្ឋមន្រ្ដី បានមានប្រសាសន៍ថា ក្នុងអាណត្តិទី៧នេះ រាជរដ្ឋាភិបាលកំពុងបន្ត យកចិត្តទុកដាក់ធ្វើការអភិវឌ្ឍខេត្តភូមិភាគឦសានឱ្យមានការរីកចម្រើន ក្លាយទៅជាប៉ូលសេដ្ឋកិច្ច​ពិសេស​មួយទៀតរបស់កម្ពុជា។ ប៉ុន្ដែក្នុងពេលជាមួយគ្នានេះ ការគិតគូរទៅលើការកសាង​ហេដ្ឋារចនាសម្ព័ន្ធ ផ្លូវ ស្ពាន ជូនប្រជាពលរដ្ឋ ក៏កំពុងបន្តធ្វើជាបន្តបន្ទាប់ផងដែរ។

សម្ដេចធិបតី បញ្ជាក់ថា កាលពីពេលថ្មីៗនេះ សម្ដេចបានទទួលព័ត៌មានមក គឺមានឃុំចំនួន២ ស្ថិតនៅក្នុងស្រុកលំផាត់ នៃខេត្តរតនគិរី ដែលមានប្រជាពលរដ្ឋជាង ១ម៉ឺននាក់កំពុងរស់នៅ គឺកំពុងជួបការលំបាកក្នុងការឆ្លងទឹកទៅមក ​ដូច្នេះជាយន្តការដោះស្រាយបឋមនេះ សម្ដេច បានបញ្ជាឱ្យមន្រ្ដីជំនាញ និងក្រសួងពាក់ប័ន្ធទៅចុះទៅសិក្សាលម្អិតដើម្បីឈានទៅសាងសង់​ស្ពានបាឡេ​ជូនដល់ប្រជាពលរដ្ឋប្រើប្រាស់។

សូមជម្រាបថា រាជរដ្ឋាភិបាលអាណត្តិទី៧នេះ កំពុងបន្តយកចិត្តទុកដាក់អភិវឌ្ឍខេត្តជាប់ព្រំដែន ជាពិសេសខេត្តភូមិភាគឦសានរបស់កម្ពុជា ខណៈតាមរយៈ «មូលនិធិកសាងហេដ្ឋា​រចនាសម្ព័ន្ធ​តាមព្រំដែន» ដោយមានការចូលរួមពី ព្រះសង្ឃ និងប្រជាពលរដ្ឋខ្មែរគ្រប់មជ្ឈដ្ឋានទាំងក្នុង និងក្រៅប្រទេស ដែលគិតត្រឹមព្រឹកថ្ងៃទី២០ ខែតុលា ​ឆ្នាំ២០២៤ នេះ មានបងប្អូនជនរួមជាតិ​ប្រមាណជិត៧០ម៉ឺនអង្គ/នាក់ បានចូលរួមបរិច្ចាគវិភាគទានស្ម័គ្រចិត្តយ៉ាងផុលផុស​ដោយ​សរុបជាទឹកប្រាក់ ចំនួន USD26,332,883.00 (ម្ភៃប្រាំមួយលានសាមសិបបីម៉ឺនពីរពាន់ប្រាំបីរយប៉ែតសិបបីដុល្លារអាមេរិក)។ ហើយវិភាគទានស្ម័គ្រចិត្តដែលទទួលបាននេះ នឹងត្រូវយកទៅប្រើប្រាស់ក្នុងការកសាងហេដ្ឋា​រចនា​សម្ព័ន្ធ​តាមព្រំដែនដោយផ្តោតលើការកសាងផ្លូវក្រវាត់ព្រំដែនផងដែរ៕អត្ថបទ៖ វ៉ន ដារ៉ា