កម្ពុជាគ្រោងបញ្ជូនយុវជនទៅចូលរួមប្រកួតប្រជែងជំនាញអាស៊ាននៅប្រទេសហ្វីលីពីន នាឆ្នាំក្រោយ

ខណៈការប្រកួតប្រជែងជំនាញថ្នាក់ជាតិកម្ពុជា លើកទី៩ ឆ្នាំ២០២៤ បានកំពុងដំណើរការយ៉ាង​រលូ​ន។ ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ចំពោះបេក្ខជនដែលជាប់​ចំណាត់​ថ្នាក់ នឹងត្រូវជ្រើសរើសតំណាងឲ្យកម្ពុជា ចេញទៅចូលរួមប្រកួតប្រជែងជំនាញអាស៊ាន នៅប្រទេសហ្វីលីពីន នាឆ្នាំ២០២៥ និងអន្តរជាតិផ្សេងៗនាពេលខាងមុខ។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ប្រាប់ព័ត៌មាន ប៊ីធីវី នៅរសៀលថ្ងៃទី២៤ ខែតុលានេះថា កម្មវិធីប្រកួតប្រជែងជំនាញថ្នាក់ជាតិកម្ពុជា លើកទី៩ ឆ្នាំ២០២៤ មានបេក្ខជនសរុបចំនួន ៩៣រូប មកពីគ្រឹះស្ថានសិក្សាចំនួន១៦ ចូលរួមប្រកួតប្រជែងលើជំនាញ៖ ជំនាញតបណ្តាញអគ្គិសនី ជំនាញរៀបឥដ្ឋ, ជំនាញផ្សារ, ជំនាញសរសេរកម្មវិធីកុំព្យូទ័រធុរកិច្ច, ជំនាញរចនាគេហទំព័រ, ជំនាញរចនាក្រាហ្វិក, ជំនាញរៀបការូ, ជំនាញម៉ា៊ីនស្វ័យប្រវត្តិកម្ម, ជំនាញ Information Network Cabling (Demo)។

ឯកឧត្តម បានបន្តថា តាមរយៈកម្មវិធីនេះ នឹងជំរុញយ៉ាងណាឲ្យសិស្សនិស្សិតក្លាយជាម្ចាស់ជ័យលាភី ដែលមានទេពកោសល្យ និងសមត្ថភាពខ្ពស់ ដើម្បីជាបេក្ខជនតំណាងប្រទេសកម្ពុជាទៅចូលរួមប្រកួតប្រជែងជំនាញអាស៊ាន លើកទី១៤ ឆ្នាំ២០២៥ នៅប្រទេសហ្វីលីពីន និងអន្តរជាតិផ្សេងៗនាពេលខាងមុខ ដើម្បីជាកិត្តិយសខ្លួនឯង គ្រួសារ និងប្រទេសជាតិទាំងមូល។

យុវជន ទី មានវិឡា មានស្រុកកំណើតមកពីខេត្តតាកែវ បច្ចុប្បន្នជានិស្សិតឆ្នាំទី១ ជំនាញផ្នែកថែទាំអគារ នៃវិទ្យាស្ថាន ប៉េអេសអឺ (PSE) ដែលបានចូលរួមប្រកួតប្រជែងកម្មវិធីថ្នាក់ជាតិនេះ បានលើកឡើងថា កម្មវិធីប្រកួតប្រជែងនេះ ពិតជាល្អនិងមានសារៈសំខាន់ណាស់ ជាពិសេសសម្រាប់យុវជនដែលកំពុងសិក្សាជំនាញ ដើម្បីអាចបញ្ចេញសមត្ថភាពដែលបានខិតខំសិក្សានាពេលកន្លងមក។

ស្រដៀងគ្នានេះ យុវជន នន់ វិជ្ជា និស្សិតឆ្នាំ៤ ជំនាញផ្នែកតបណ្តាញអគ្គិសនី នៃវិទ្យាស្ថានជាតិបណ្តុះបណ្តាលបច្ចេកទេស (NTTI) បានលើកឡើងថា ការប្រកួតប្រជែងនេះ គឺមានសង្ឃឹមរហូត ៨០% ដោយសារជាជំនាញដែលគាត់ស្រលាញ់ ពេញចិត្ត និងអាចធ្វើបានច្រើនក្នុងអំឡុងពេលប្រឡង។

កម្មវិធីប្រកួតប្រជែងជំនាញថ្នាក់ជាតិកម្ពុជា លើកទី៩ មានរយៈពេល ៥ថ្ងៃ ចាប់ពីថ្ងៃទី២១ ដល់២៥ ខែតុលា ឆ្នាំ២០២៤ នៅក្នុងសួនអប់រំបណ្តុះបណ្តាលបច្ចេកទេស និងវិជ្ជាជីវៈរាជធានីភ្នំពេញ។ ការប្រកួតប្រជែងជំនាញនេះ ធ្វើឡើងជារៀងរាល់ពីរឆ្នាំម្តង ដែលជាព្រឹត្តិការណ៍សម្រាប់សិស្ស និស្សិតឆ្នើម និងអ្នកជំនាញវ័យក្មេងមកពីបណ្តាសហគ្រាសគ្រឹះស្ថាន ដើម្បីបង្ហាញពីទេពកោសល្យ ភាពច្នៃប្រឌិត និងចំណង់ចំណូលចិត្តក្នុងអាជីពរៀងៗខ្លួន។ សូមជម្រាបជូនទៀតថា សម្រាប់បេក្ខជន ដែលជាប់ចំណាត់ថ្នាក់ទទួលបានមេដាយ នឹងត្រូវទទួលបានរង្វាន់លើកទឹកចិត្តពីរាជរដ្ឋាភិបាលដូចជា មេដាយមាស ទទួលបានប្រាក់រង្វាន់ចំនួន ៣លានរៀល, មេដាយប្រាក់ ទទួលបានប្រាក់រង្វាន់ ២លានរៀល និងមេដាយសំរឹទ្ធិ ទទួលបានរង្វាន់ ១លានរៀល៕ អត្ថបទ ឈិត បូរ៉ា