ក្រសួងសាធារណការ រៀបចំសិក្ខាសាលាស្ដីពី បច្ចេកទេសថ្មី និងការប្រើប្រាស់ផលិតផល​កៅស៊ូក្រាលថ្នល់

ក្រសួងសាធារណការ និងដឹកជញ្ជូន នៅថ្ងៃទី២៥ ខែតុលា ម្សិលម៉ិញនេះ បានសហការ​ជាមួយ​ក្រុមហ៊ុន ធីបកូ អេសហ្វស(ខេមបូឌា) ខមភេនី លីមីធីត – Tipco Asphalt (Cambodia) Company Limited ក្នុងការរៀបចំសិក្ខាសាលាស្ដីពី “បច្ចេកទេសថ្មី និងការប្រើ​ប្រាស់ផ​លិត​ផល​កៅ​ស៊ូ​ក្រាលថ្នល់(Asphalt)-Latest Improvement and Applications of Asphalt Products”។

សិក្ខាសាលាស្តីពី “បច្ចេកទេសថ្មី និងការប្រើប្រាស់ផលិតផលកៅស៊ូក្រាលថ្នល់(Asphalt)-Latest Improvement and Applications of Asphalt Products” ជាសិក្ខាសាលាថ្មីមួយ ដែល​រៀបចំឡើងក្រោមកិច្ចសហការរវាងក្រសួងសាធារណការ និងវិស័យឯកជន។ សិក្ខាសាលា រៀបចំ​ឡើង​ក្រោមការដឹកនាំ ដោយ ឯកឧត្តម យិត បុណ្ណា រដ្ឋលេខាធិការក្រសួងសាធារណការ និង​ដឹកជញ្ជូន តំណាង ឯកឧត្តមរដ្ឋមន្រ្តីក្រសួងសាធារណការ និងដឹកជញ្ជូនរួមទាំងវត្តមាន ឯកឧត្ដម​អនុរដ្ឋលេខាធិការ ឯកឧត្ដមអគ្គនាយក លោកអគ្គនាយករង ប្រធាននាយកដ្ឋាន មន្រ្តី​បច្ចេក​ទេស​របស់នាយកដ្ឋាន និងមន្ទីរក្រោមឱវាទក្រសួង ព្រមទាំងសិក្ខាកាម​ជំនាញ​​មក​ពី​វិស័យ​ឯក​ជន​ជា​ច្រើនរូប។

សិក្ខាសាលានេះ រៀបចំឡើងក្នុងគោលបំណង ដើម្បីចែករំលែកចំណេះដឹ បទពិសោធន៍ និង​ផ្ដល់​ឱកាស​ដល់មន្រ្តីបច្ចេកទេស និងសិក្ខាកាមជំនាញក្នុងវិស័យឯកជន ស្វែងយល់បន្ថែម​អំពី​បច្ចេក​ទេសថ្មីៗក្នុងការប្រើប្រាស់ផលិតផលកៅស៊ូ Asphalt សម្រាប់ជាគុណ​ប្រយោជន៍​ដល់​ការ​អនុវត្ត​ការងារស្ថាបនាហេដ្ឋារចនាសម្ព័ន្ធផ្លូវថ្នល់-ស្ពាន ក្នុងព្រះរាជាណាចក្រកម្ពុជា សំដៅ​ធានា​បាន​នូវគុណភាពខ្ពស់ មានភាពធន់ទៅនឹងបម្រែបម្រួលអាកាសធាតុ ព្រមទាំងសន្សំសំចៃធនធាន និងថវិកា ប្រកបដោយប្រសិទ្ធភាពសេដ្ឋកិច្ច។

ក្រុមហ៊ុនបានបង្ហាញអំពី Performance Grade-(PG Grade) ដែលជា​ចំណាត់​ថ្នាក់​កៅស៊ូ​ថ្មី​ជំ​នួ​ស​ឱ្យ Penetration Grade ជាមួយនឹងរបកគំហើញថ្មីនៃប្រភេទកៅស៊ូ Bitumen(40-50) និង កៅស៊ូ​ EcoPrime ដែលមានគុណភាពល្អ អាចទប់ទល់ទៅនឹងទម្ងន់ចរាចរណ៍ច្រើនលើសលប់ និង​ទប់ទល់ជាមួយអាកាសធាតុក្ដៅខ្លាំង បានល្អប្រសើរជាងប្រភេទកៅស៊ូ AC(60-70) ដែល​មាន​អត្ថ​ប្រយោជន៍ដូចជា អាយុកាលគុណភាពផ្លូវវែង កាត់បន្ថយចំណាយក្នុងការជួសជុល និងថែទាំ និងកាត់បន្ថយកម្រាស់កៅស៊ូ ដោយរក្សាបាននូវគុណភាពល្អជាង។ ជាក់ស្ដែង​នៅ​ក្នុង​ព្រះរាជា​ណាចក្រកម្ពុជា ការប្រើប្រាស់ប្រភេទកៅស៊ូ Bitumen(40-50) នៅលើគម្រោង​មួយ​ចំនួន​ដូចជា ផ្លូវក្នុងព្រលានយន្ដហោះអន្ដរជាតិភ្នំពេញ ព្រលានយន្ដហោះព្រះសីហនុ និងផ្លូវជាតិលេខ៧១C ជាដើម៕ អត្ថបទ៖ គឹមហុក