អ៊ីស្រាអែល ថាខ្លួនបានសម្លាប់មេបញ្ជាការក្រុមហាម៉ាស ដែលជាបុគ្គលិកជំនួយ UNRWA

យោធាអ៊ីស្រាអែល បាននិយាយកាលពីថ្ងៃព្រហស្បតិ៍ (២៤ តុលា) ថា ខ្លួនបានសម្លាប់មេបញ្ជាការក្រុមហាម៉ាសម្នាក់ ដែលបានចូលរួមក្នុងការវាយប្រហារកាលពីថ្ងៃទី០៧ ខែតុលា ឆ្នាំ២០២៣ ទៅលើភាគខាងត្បូងអ៊ីស្រាអែល ហើយថែមទាំងធ្វើការឱ្យទីភ្នាក់ងារជំនួយរបស់អង្គការសហប្រជាជាតិនៅតំបន់ហ្កាហ្សាស្ទ្រីប ផងដែរ។

ទីភ្នាក់ងារជំនួយ UNRWA ត្រូវបានអ៊ីស្រាអែលចោទប្រកាន់ថា មានបុគ្គលិកជាច្រើនដែលធ្វើជាសមាជិកក្រុមហាម៉ាស និងក្រុមប្រដាប់អាវុធផ្សេងទៀត។ អង្គការសហប្រជាជាតិ បន្ទាប់ពីការស៊ើបអង្កេតមួយ បាននិយាយកាលពីខែសីហាថា បុគ្គលិក UNRWA ប្រាំបួននាក់ អាចជាប់ពាក់ព័ន្ធក្នុងការវាយប្រហារកាលពីថ្ងៃទី០៧ ខែតុលា ហើយបានបណ្តេញពួកគេចេញពីការងារ។

យោធាអ៊ីស្រាអែលបាននិយាយថា បុរសម្នាក់ឈ្មោះ ម៉ូហាម៉េដ អាប៊ូ អ៊ីទីវី (Mohammad Abu Itiwi) ត្រូវបានសម្លាប់កាលពីថ្ងៃពុធ ហើយគឺជាមេបញ្ជាការក្រុមហាម៉ាស និងបានជាប់ពាក់ព័ន្ធក្នុងការសម្លាប់ និងការចាប់្លួនជនស៊ីវិលអ៊ីស្រាអែល។ យោធាបន្ថែមថា បុរសនោះត្រូវបាន UNRWA ជួលធ្វើជាបុគ្គលិកចាប់តាំងពីខែកក្កដា ឆ្នាំ២០២២ ហើយថាឈ្មោះរបស់គេត្រូវបានដាក់ក្នុងបញ្ជីនៃបុគ្គលិករបស់ទីភ្នាក់ងារនេះ។

UNRWA បានបញ្ជាក់ថា លោក Itiwi គឺជាបុគ្គលិកម្នាក់ ហើយត្រូវបានសម្លាប់កាលពីថ្ងៃពុធ ដោយបន្ថែមថា ឈ្មោះរបស់ Itiwi ត្រូវបានដាក់បញ្ចូលក្នុងលិខិតដែល UNRWA ទទួលបានពីអ៊ីស្រាអែល កាលពីខែកក្កដា ដែលបានដាក់ឈ្មោះបុគ្គលិកចំនួន ១០០នាក់ ដែលត្រូវចោទថាជាសមាជិកនៃក្រុមប្រដាប់អាវុធ រួមទាំងក្រុមហាម៉ាសផងដែរ៕