មន្ត្រីគិលានសង្គ្រោះពីបណ្តាពេទ្យរដ្ឋចុះសិក្សាប្រព័ន្ធគ្រប់គ្រងរថយន្តគិលានសង្គ្រោះ នៅពេទ្យមិត្តភាពខ្មែរ-សូវៀត

មន្ត្រីផ្នែករថយន្តគិលានសង្គ្រោះពីបណ្តាមន្ទីរពេទ្យរដ្ឋទាំង៨ ទូទាំងប្រទេសកម្ពុជា មកធ្វើ​ទស្សន​កិច្ច​សិក្សា អំពីប្រព័ន្ធគ្រប់គ្រងរថយន្តគិលានសង្គ្រោះ (Ambulance & SAMU) នៅមន្ទីរពេទ្យ​មិត្ត​ភាព​ខ្មែរ-សូវៀត នាព្រឹកថ្ងៃទី២៥ ខែតុលា ឆ្នាំ២០២៤នេះ។

ឯកឧត្តមសាស្ត្រាចារ្យ ងី ម៉េង នាយកមន្ទីរពេទ្យមិត្តភាពខ្មែរ-សូវៀតលើកឡើងថា ថ្ងៃនេះ​ជា​លើក​ដំបូង និងជាលើកទី១ ដែលមន្ទីរមិត្តភាពខ្មែរ-សូវៀត បានរៀបចំ​ការ​ទទួល​ដំណើរ​ទស្សន​កិច្ច​សិក្សា​អំពី​ប្រព័ន្ធគ្រប់គ្រងរថយន្តគិលានសង្គ្រោះរបស់ថ្នាក់ដឹកនាំក្រសួងសុខាភិបាល និងប្រធាន​អនុ​ប្រធាន​មន្ទីរពេទ្យ ព្រមទាំងមន្ត្រីផ្នែករថយន្តគិលានសង្គ្រោះពីបណ្តាមន្ទីរពេទ្យរដ្ឋទាំង៨។

ឯកឧត្តម​សាស្ត្រាចារ្យបន្តថា នេះជាឱកាស​ដ៏​វិសេស​វិសាល​ដើម្បី​អាច​មាន​ឱកាស​ក្នុង​ការ​ចែក​រំលែក​ទៅ​វិញទៅមកនូវចំណេះដឹង បទពិសោធន៍ល្អៗ ក្នុងការងារបម្រើ​សេវា​សុខាភិបាល​ពិសេស​ការងារ​បម្រើសេ​វាសង្គ្រោះ បន្ទាន់ជូនប្រជាពលរដ្ឋឲ្យកាន់តែមានប្រសិទ្ធភាពខ្ពស់ និងទាន់ពេល​វេលា ក៏ដូចជាការដំណើរនៃការគ្រប់គ្រងប្រព័ន្ធការងារទទួល និងបញ្ជូន​អ្នក​ជំងឺ​ការ​គ្រប់​គ្រង​បុគ្គលិក ថែរក្សា និងការថែទាំសម្ភារៈ និងរថយន្ត ហើយជាពិសេស​ចែក​រំលែក​នូវ​ការ​គ្រប់​គ្រង​ និង​ដោះ​ស្រាយ​បញ្ហាពេល គ្រោះមហន្តរាយ និងគ្រោះអាសន្នផ្សេងៗ។

ឯកឧត្តមវេជ្ជបណ្ឌិត ង៉ូវ កាង រដ្ឋលេខាធិការនិងជាប្រធាន ក្រុមការងារសម្រ​បសម្រួល​ការ​គ្រប់​គ្រង​រថយន្ត​គិលានសង្គ្រោះមន្ទីរពេទ្យថ្លែងថា គ្រប់ផ្នែកនៃវិស័យសុខាភិបាលគឺសំខាន់ទាំងអស់ ផ្នែក​មួយណាក៏សុទ្ធតែសំខាន់ ក៏ប៉ុន្តែអ្វីដែលជារឿងរសើប អ្វីដែលជាការងាយមើលឃើញ គឺ​ប្រព័ន្ធ​សង្រ្គោះបន្ទាន់ ដែលក្នុងនោះរថយន្តគិលានសង្រ្គោះ ជាផ្នែក​មួយ​ដែល​ចេញ​ទៅ​ធ្វើ​សកម្មភាព​នៅ​ទីសាធារណៈ។

ឯកឧត្តមវេជ្ជបណ្ឌិតបញ្ជាក់ថា ទស្សកិច្ចនេះជាលើកដំបូង ក្នុងអាណតិ្តទី៧នេះ ដែលឯកឧត្តម​សាស្រ្តាចារ្យ​រដ្ឋមន្រី្តក្រសួងសុខាភិបាលបានបង្កើតជាគំនិតនវានុវត្តន៍ថ្មី ក្នុងការចែករំលែក និង​រំលឹក​បង្ហាញអំពីឥរិយាបថណាមួយដោយអចេតនា ដោយការមិន​បាន​គិត​ដល់​របស់​បុគ្គលិក​សុខាភិបាល​នៅលើរថយន្តសង្រ្គោះបន្ទាន់ ឬក៏ទីសាធារណៈនោះ ដោយនេះជាកិតិ្តយស និង​ជា​សេចកី្ត​ថ្លៃ​ថ្នូរបស់សុខាភិបាលជាតិ។ ដូច្នេះ រថយន្តសង្រ្គោះបន្ទាន់​គឺ​ជានិ​មិត្ត​សញ្ញា​របស់​វិស័យ​សុខាភិបាល​៕ អត្ថបទ រដ្ឋា