ព័ត៌មាន

សមាគម និងអង្គការជិត២០០ កំពុងបំពេញសកម្មភាពការងារលើវិស័យសង្គមកិច្ចនៅកម្ពុជា

គិតត្រឹមឆ្នាំ២០២៤នេះ មានសមាគម និងអង្គការជាតិ-អន្តរជាតិ ចំនួនជិត ២០០ កំពុងបំពេញការងារលើវិស័យសង្គមកិច្ច ដើម្បីជួយដល់ប្រជាពលរដ្ឋដៅនៅកម្ពុជា។ នេះបើតាមការលើកឡើងរបស់ ឯកឧត្តម ស៊ូនី វង្សវិសិដ្ឋ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងឱកាសដែលឯកឧត្តម ចូលរួមក្នុងការចុះកិច្ចព្រមព្រៀងគម្រោង រវាងក្រសួងសង្គមកិច្ច និងសមាគម អង្គការចំនួន ១០ នៅថ្ងៃទី ២៥ ខែតុលា ឆ្នាំ ២០២៤នេះ។

សម្រាប់ការចុះហត្ថលេខាលើកិច្ចព្រមព្រៀងជាមួយសមាគម និងអង្គការចំនួន ១០ នៅថ្ងៃនេះដែរ គឺមានទាំងសមាគម អង្គការ ដែលធ្លាប់បំពេញសកម្មភាពកន្លងទៅនៅកម្ពុជា ហើយក៏មានសមាគម អង្គការថ្មី ផងដែរ។ ក្រុមសមាគម អង្គការថ្មីទាំង ១០នេះ នឹងត្រូវបំពេញសកម្មភាពការងារលើការងារ កិច្ចការគ្រួសារ ការងារជួយដល់មនុស្សចាស់ជរា កិច្ចការពារកុមារ ការគាំពារជនរងគ្រោះ ក៏ដូចជា ការងារជួយដល់ជនមានពិការភាព។ សមាគម អង្គការដែលទើបទទួលបានការចុះកិច្ចព្រមព្រៀងនៅថ្ងៃនេះ នឹងបំពេញសកម្មភាពករងារជួយដល់ក្រុមគោលដៅ នៅតំបន់ ខេត្ត មួយចំនួន ពុំគ្របដណ្ដប់លើផ្ទៃប្រទេសនោះទេ។

ឯកឧត្តម ស៊ូនី វង្សវិសិដ្ឋ រដ្ឋលេខាធិការក្រសួងសង្គមកិច្ច ក៏បានបង្ហាញការស្វាគមន៍ចំពោះវត្តមានសមាគម អង្គការ ដែលបានចូលរួមជាមួយរាជរដ្ឋាភិបាលកម្ពុជា លើការងារសង្គមកិច្ច កន្លងមកនេះ ក៏ដូចជាការបន្តសកម្មភាពការងារទៅថ្ងៃអនាគត។

ឯកឧត្តមលើកឡើងដែរថា ក្នុងនាមក្រសួងសង្គមកិច្ច ក៏សូមផ្ដាំផ្ញើទៅកាន់គ្រប់សមាគម អង្គការដែលទទួលបានកិច្ចព្រមព្រៀងជាមួយក្រសួងសង្គមកិច្ច ត្រូវតែអនុវត្តឱ្យបានខ្ជាប់ខ្ជួនត្រឹមត្រូវ ទៅតាមកិច្ចព្រមព្រៀងគ្រប់ចំណុច។ លើសពីនេះ សមាគម អង្គការទាំងអស់ ត្រូវតែបំពេញការងារ លើគោលដៅមនុស្សធម៌ ដោយមិនត្រូវពាក់ព័ន្ធ លើការងារនានា ដូចជាបម្រើគោលដៅនយោបាយ ឬគោលដៅផ្សេងនោះឡើយ។ កំឡុងពេលបំពេញការងាររបស់សមាគម អង្គការនីមួយៗ គឺនឹងមានក្រុមការងារជំនាញក្រសួងសង្គមកិច្ច ចុះទៅពិនិត្យវាយតម្លៃពីភាពជាក់ស្ដែងផងដែរ។ ក្នុងនាមក្រសួងសង្គមកិច្ច ក៏ចង់ឃើញសមាគម អង្គការទាំងអស់ ពង្រឹង និងពង្រីកសកម្មភាពការងាររបស់ខ្លួន ជួយដល់ក្រុមគោលដៅឱ្យកាន់តែមានវិសាលភាព និងប្រសិទ្ធភាពផងដែរ៕ អត្ថបទ៖ គឹម ហុក