ព្រះរាជអាជ្ញា ចុះសួរសុខទុក្ខស្ត្រីជរាពិការភាព គ្មានកូនចៅ និងទីទ័លក្រ ក្នុងឃុំត្រងិល ស្រុកកំពង់លែង

កំពង់ឆ្នាំង៖ ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្ត និងលោកស្រី ស្រ៊ឹម ស៊ាងភាជ ព្រះរាជអាជ្ញារង នៅថ្ងៃទី២៥ ខែតុលា ឆ្នាំ២០២៤នេះ បានចុះសួរសុខទុក្ខស្ត្រីជរាពិការភ្នែក និងទីទ័លក្រ មិនមានកូនចៅ រស់នៅជាមួយបងប្អូន២នាក់ ក្នុងឃុំត្រងិល ស្រុកកំពង់លែង ខេត្តកំពង់ឆ្នាំង ដោយមានអាជ្ញាធរភូមិឃុំចូលរួមផងដែរ ។

ក្នុងពេលជួបជាមួយស្ត្រីជរាភ្នែកមានពិការភាព និងទីទ័លក្រ ឯកឧត្តម ឯក ស៊ុនរស្មី បានសុំអោយអាជ្ញាធរភូមិឃុំជួយមើលពួកគាត់ទាំង២នាក់ផង ដោយសារអាជ្ញាធរភូមិឃុំជាអ្នកនៅកៀកកិត អាចដឹងសុខសទុក្ខពួកគាត់គ្រប់ពេល ធ្វើយ៉ាងណាកុំទុកពួកគាត់ចោល។ អាជ្ញាធរភូមិឃុំ ត្រូវជួយពិនិត្យមើលដំបូលផ្ទះគាត់ដែលកំពុងធ្លុះធ្លាយនោះ ធ្វើយ៉ាងណាដើម្បីដោះស្រាយប្រក់ដំបូលនោះអោយជិតមកវិញ ដើម្បីអោយពួកគាត់រស់នៅបានស្រួល។ ក្នុងពេលចុះជួបនោះ ឯកឧត្តម និងក្រុមការងារបានជូនថវិការ និងគ្រឿងឧបភោគបរិភោគមួយចំនួនផងដែរ និងបានពាំនាំនូវអនុសាសន៍ផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន ប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម សម្តេចធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវ ជូនចំពោះបងប្អូនប្រជាពលរដ្ឋគ្រប់រូបដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ជាពិសេសសម្តេច តែងតែយកចិត្តទុកដាក់គិតគូរពីសុខទុក្ខប្រជាពលរដ្ឋរងគ្រោះ និងងាយរងគ្រោះ ចាស់ជរា ស្រ្តីមេម៉ាយ កុមារកំព្រា ជនមានពិការភាព ជាពិសេសលោកតែងឆ្លើយតប និងជួយសង្គ្រោះ ចំពោះគ្រោះមហន្តរាយផ្សេងៗ។

ឯកឧត្តម បានអោយលោកយាយភ្នែកមានពិការភាព ត្រូវថែររក្សាសុខភាព អនាម័យជាប់ជាប្រចាំ ដើម្បីសុខភាពរឹងមាំបន្តទៀត ៕ កាំង ហុងវាស្នា