ក្រុមការងារសមាគមសិស្សនិស្សិត​បញ្ញវន្ត​ក្មេងវត្តខេត្តឧត្តរមានជ័យ នាំយកអំណោយចែកជូនដល់ពលរដ្ឋចាស់ជរា ជួបការលំបាក

ឧត្តរមានជ័យ៖ លោក រិន សាគរ ប្រធានសាខាសមាគមសិស្សនិស្សិតបញ្ញវន្តក្មេងវត្តសាខាខេត្តឧត្តរមានជ័យ និងព្រះគ្រូឥន្ទជោតិ ឌុជ សាគុណ ព្រះសមុហ៍គណខេត្ត តំណាងព្រះឧត្តរមុនី ពេជ្រ បួយ ព្រះមេគណខេត្ត និងជាព្រះអនុបរធានកិត្តិយសសាខាសមាគមសិស្សនិស្សិតបញ្ញវន្ត ក្មេងវត្តខេត្តឧត្តរមានជ័យ បានដឹកនាំក្រុមការងារ នាំយកអំណោយមនុស្សធម៌ ចែកជូនដល់លោកយាយ លោកតា ដែលមានវ័យចាស់ជរា គ្មានទីពឹង និងមានជីវភាពខ្វះខាតជាច្រើន​គ្រួសារ រស់នៅចំណុចភូមិខ្ទុំ និងភូមិថ្នល់បត់ ស្ថិតក្នុងសង្កាត់កូនគ្រៀល ក្រុងសំរោង ខេត្តឧត្តរមានជ័យ នាថ្ងៃទី២៥ តុលាឆ្នាំ២០២៤នេះ។

លោក រិន សាគរ ប្រធានសមាគមសិស្សនិស្សិតបញ្ញវន្តក្មេងវត្តសាខាខេត្តឧត្តរមានជ័យ​ បានលើកឡើងថា ដើម្បីជួយសម្រួលរាល់បញ្ហាប្រឈមទៅ និងការខ្វះខាត​និងតម្រូវការចាំបាច់​របស់​បងប្អូនប្រជាពលរដ្ឋ ដែលមានជីវភាពខ្វះខាត សមាគមសិស្សនិស្សិតបញ្ញវន្តក្មេងវត្ត តែងតែ​យកចិត្តទុកដាក់គិតគូរគ្រប់ពេលវេលា ក្នុងការចូលរួមចំណែកជាមួយអាជ្ញាធរមូលដ្ឋាន ដើម្បីផ្តល់នៅសម្ភារគ្រឿង​ឧបត្ថម្ភ​បរិភោគ​មួយចំនួនចែក ជូនដល់ពួកគាត់ដែលមានជីវភាព​ខ្វះខាតផងដែរ។

លោក បានបន្តទៀតថា អំណោយទាំងអស់នេះ ពិតតែមិនបានជួយដល់បងប្អូន​លោកយាយ លោកតា និងប្រជាពលរដ្ឋមានចំនួនតិចតូចយ៉ាង​ណាក្តី ប៉ុន្តែវាអាចជួយសម្រួល​ដល់​ការខ្វះខាតស្រៀង​របស់​បងប្អូនបានមួយគ្រាៗ ​ផងដែរ។ ក្នុងនោះ អំណោយរួមមាន៖ អង្ករ ១ការ៉ុង (៥០គីឡូក្រាម) មី១កេស ទឹកត្រី ១យួរ ទឹកស៊ីអីវ ១យួរនិងថវិកា មួយចំនួន​ផងដែរ៕