ទូក«ង» ឃុំកោះថ្កូវ ស្រុកជលគីរី កំពុងជួសជុលត្រៀមបញ្ជូនចូលរួមក្នុងពិធីប្រណាំងទូក​នៅភ្នំពេញ​នាពេលខាងមុខ

កំពង់ឆ្នាំង៖ ទូកងជាច្រើនគ្រឿងក្នុងឃុំកោះថ្កូវ ស្រុកជលគីរី ខេត្តកំពង់ឆ្នាំង កំពុងជួសជុល និង​កសាងថ្មី ដើម្បីចូលរួមក្នុងពិធីប្រណាំងទូកនៅរាជធានីភ្នំពេញនាពេលខាងមុខ ជាពិសេស​គ្រប់​កីឡាករ​កីឡាការនីទាំងអស់ ក៏កំពុងហាត់សមយ៉ាងយកចិត្តទុកដាក់ សាមគ្គីភាពតែមួយ ក្នុង​គោល​បំ​ណងយកជ័យជម្នះក្នុងការប្រណាំងនេះ។

លោក ប៊ិន សុផាន មេឃុំកោះថ្កូវ បានអោយដឹងថា៖ ទូកប្រណាំងក្នុងឃុំកោះថ្កូវ ស្រុកជលគីរីនេះ មានទាំងអស់ចំនួន៨ទូក ទូកចែវចំនួន៧ និងទូកខ្នាតអន្តរជាតិចំនួន១។ ឃុំកោះថ្កូវ ជាឃុំដែល​មាន​ទូក​ច្រើនជាងគេបង្អស់ក្នុងស្រុកទាំង៨ក្រុងស្រុកនៃខេត្តកំពង់ឆ្នាំង។ ទូកប្រណាំងទាំង៨នោះ សុទ្ធ​តែមានប្រវត្តិតាំងពីយូរលង់ និងមានអ្នកថែរក្សារៀងៗខ្លួន ។ ទូក៤បានកសាងថ្មី ទូល​៤​ទៀត​ជា​ទូកចាស់ ក្នុងនោះមានទូក១ឈ្មោះ ពេជ្ររស្មីសេរីសោភ័ណ្ឌ ក៏បានកំពុងកសាងថ្មី និង​មាន​គណៈកម្មាការទូក កីឡាករ អាជ្ញាធរឃុំ រួមនិងប្រជាពលរដ្ឋ ចូលរួមលាបពណ៌ រចនាក្បាច់​ក្បូ​យ៉ាង​ស្រស់ស្អា​ត​សម្រាប់ពិធីប្រណាំងទូកងនៅរាជធានីភ្នំពេញផងដែរ។ ទូកពេជ្ររស្មីសេរីសោភ័ណ្ឌនេះ ធ្លាប់បានទទួលជ័យជម្នះលើគូប្រកួតជាច្រើន និងមានឈ្មោះ​ល្បី​ក្នុង​ខេត្ត ក៏ដូចជាក្នុងប្រទេស ហើយទូកនេះបានកើតឡើងក្នុងឆ្នាំ១៩៥៣ ដែលគិត​មក​ដល់​ឆ្នាំ​២០២៣​នេះ​មានអាយុកាល៧២ឆ្នាំហើយ ដោយឡែកសំបក​ទូក​ចាស់​ក៏​បាន​ផ្លាស់​ប្តូរ​មក​ជា​សំបក​ទូក​ថ្មី។

លោក ម៉ៅ តារា នាយករដ្ឋបាលខេត្តកំពង់ឆ្នាំងបានអោយដឹងថា ក្នុងព្រះរាជពិធីបុណ្យ អុំទូក​បណ្តែត​ប្រទីប អកអំបុក និងសំពះព្រះខែឆ្នាំ២០២៤នេះ រដ្ឋបាលខេត្តកំពង់ឆ្នាំង បានត្រៀម​បញ្ជូន​ទូក ង ចំនួន២៦គ្រឿងចូលរួមផងដែរ ។ ក្នុងនោះមានទូកអុំ ទូកចែវ ក្នុងនោះទូក​ចែវ​បុរស​មាន​១៥ទូក ទូកចែវនារីមាន១ទូក ទូកអុំបុរសខ្នាតវែងមានចំនួន១ និងទូកអុំ​បុរស​ខ្នាត​អន្តរជាតិ​មាន​ចំនួន​៨ទូក និងមានកីឡាករ កីឡាការនីសរុបចំនួន១៥១៦នាក់ ក្នុងនោះស្រី​ចំនួន​១១៥​នាក់​ផង​ដែរ៕ កាំង ហុងវាស្នា