អ្នកស្លាប់ឡើងដល់ ៨៧នាក់ ខណៈក្រុមជួយសង្គ្រោះប្រឹងប្រែងទៅឲ្យដល់អ្នកជាប់​ក្នុងតំបន់​ទឹកជំនន់ នៅហ្វីលីពីន

ក្រុមអ្នកជួយសង្រ្គោះនៅភាគខាងជើងប្រទេសហ្វីលីពីន នាថ្ងៃសៅរ៍ (ទី២៦ ខែតុលា) នេះ បាន​ប្រឹងប្រែងធ្វើការដោយឥតសម្រាក ដើម្បី​ទៅដល់ប្រជាជនជាប់ទៅណាមិនរួច​នៅក្នុងតំបន់​ដែល​មិន​អាចចូលទៅដល់បានដោយសារទឹកជំនន់កើតឡើងពីឥទ្ធិពលព្យុះត្រូពិក Trami ជាគ្រោះ​ធម្មជាតិ​ដែលបានធ្វើឲ្យមានការជម្លៀសមនុស្សជិតកន្លះលាននាក់ និងយ៉ាងហោចណាស់ ៨៧នាក់ បានបាត់បង់ជីវិត។

ក្រុមមន្ត្រីបានប្រាប់សារព័ត៌មាន AFP ថា នៅតំបន់ Bicol ដែលរងគ្រោះខ្លាំង អ្នកស្រុក​ដែលជាប់​នៅលើដំបូល និងជាន់ខាងលើនៃផ្ទះសម្បែងរបស់ពួកគេ នៅតែកំពុងរង់ចាំជំនួយ​យ៉ាងអន្ទះ​អន្ទែង។

ស្នងការនគរបាលប្រចាំតំបន់ លោក Andre Dizon បានប្រាប់សារព័ត៌មាន AFP ថា «ទឹកជំនន់មិនទាន់ស្រកនៅឡើយទេ។ ការអំពាវនាវសុំជំនួយនៅតែមានយ៉ាងច្រើនស្ធឹកសន្ធាប់នៅទីនេះ។ យើងត្រូវជួយសង្គ្រោះពួកគេឲ្យបានឆាប់តាមដែលអាចធ្វើទៅបាន ព្រោះគម្លានអាចជាបញ្ហា។ ហើយយើងបានឮុពីសេចក្ដីរាយការណ៍ដែលថា ក្មេងៗកំពុងធ្លាក់ខ្លួនហើយ»។ លោកបានបន្ថែមថា នៅក្នុងខេត្ត Camarines Sur របស់តំបន់នេះ អាហារ និងទឹកស្អាតកំពុងខ្វះខាតខ្លាំងឡើងៗ ដោយសារតំបន់មួយចំនួន នៅតែលិចទឹកទាំងស្រុង និងពិបាកចូលទៅដល់។

ប្រធានាធិបតីហ្វីលីពីន លោក Ferdinand Marcos បានធ្វើដំណើរទៅតំបន់នោះ នៅថ្ងៃទី២៦ ខែតុលា ដើម្បីពិនិត្យមើលការខូចខាត មុនពេលជួបជាមួយមន្ត្រីខេត្ត។

ជាមួយគ្នានេះ ទីភ្នាក់ងារគ្រោះមហន្តរាយជាតិហ្វីលីពីន បានផ្ដល់របាយការណ៍នៅថ្ងៃទី២៦ ខែតុលានេះថា មនុស្សប្រហែល ៤៩៥.០០០នាក់ ត្រូវបានផ្លាស់ទីលំនៅដោយសារទឹកជំនន់ដែលបានលិចលង់ភូមិរាប់រយ នៅផ្នែកភាគខាងជើងនៃប្រទេសហ្វីលីពីន។

គួរបញ្ជាក់ថា ព្យុះធំៗ និងព្យុះទីហ្វុងប្រហែល ២០ បានបក់បោកលើប្រទេសប្រជុំកោះមួយនេះ ឬដែនទឹកជុំវិញរបស់ប្រទេសនេះជារៀងរាល់ឆ្នាំ ដោយបានបំផ្លិចបំផ្លាញផ្ទះសម្បែង និងហេដ្ឋារចនាសម្ព័ន្ធ ហើយនិងបានឆក់យកជីវិតមនុស្សរាប់សិបនាក់៕