លោកជំទាវសាស្រ្តាចារ្យ អ៊ឹម សិទ្ធិការ្យ៖ កម្ពុជា បានបោះជំហានយ៉ាងសំខាន់​ក្នុងការលើក​កម្ពស់​សុខភាពមាតា និងទារក

លោកជំទាវសាស្ត្រាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល និងជាប្រធានសមាគម​គ្រូ​​ពេទ្យ​ទារកកម្ពុជា បានអៈអាងថា ព្រះរាជាណាចក្រកម្ពុជា បានបោះជំហាន​យ៉ាង​សំខាន់​ក្នុង​ការ​លើក​កម្ពស់សុខភាពមាតា និងទារក ក្នុងប៉ុន្មានឆ្នាំថ្មីៗនេះ។

ការថ្លែងរបស់​លោកជំទាវសាស្រ្តាចារ្យ អ៊ឹម សិទិ្ធការ្យ យ៉ាងដូច្នេះ នាឱកាសដោយ​ទទួល​បាន​ការ​អនុញ្ញាត​ដ៏​ខ្ពង់ខ្ពស់ពីឯកឧត្តមសាស្ត្រាចារ្យ ឈាង រ៉ា រដ្ឋមន្ត្រី ក្រសួងសុខាភិបាល បានអញ្ជើញ​ចូល​រួម​ជាធិបតីក្នុងពិធីបើកសន្និសីទសមាគមគ្រូពេទ្យទារកកម្ពុជា លើកទី៧ រយៈពេល២ថ្ងៃ ចាប់​ពី​ថ្ងៃទី២៥-២៦ ខែតុលា ឆ្នាំ២០២៤។ ក្នុងនោះសន្និសីទសមាគមគ្រូពេទ្យទារកកម្ពុជា នៅថ្ងៃ​ទី១ ក្រោមប្រធានបទ “START4NEWBORN ការសង្គ្រោះទារកទើបនឹងកើត” និងសន្និសីទសមាគមគ្រូពេទ្យទារកកម្ពុជា នៅថ្ងៃទី២ ក្រោមប្រធានបទ”Antenatal And Perinatal Update ដើម្បីូលរួមពន្លឿនការកាត់បន្ថយអត្រា មរណៈភាពមាតា និងទារក” ដោយមានការចូលរួមពីឯកឧត្តម លោកជំទាវថ្នាក់ដឹកនាំក្រសួងសុខាភិបាល និងឯកឧត្តមអគ្គនាយករងមន្ទីរពេទ្យកាល់ម៉ែត ប្រធានមន្ទីរសុខាភិបាលរាជធានី-ខេត្តទាំង២៥ ប្រធានមន្ទីរពេទ្យថ្នាក់ជាតិ ប្រធានគណៈគ្រូពេទ្យកម្ពុជា ប្រធានគណៈឆ្មប គណៈគិលានុបដ្ឋាក មន្ទីរពេទ្យខេត្ត និងថ្នាក់ក្រោមជាតិដទៃទៀត ភ្ញៀវជាតិ និងអន្តរជាតិសរុបចូលផ្ទាល់ ចំនួន ៣០៦រូប និងតាមប្រព័ន្ធ Zoom ចំនួន២២៣០រូប។

លោកជំទាវសាស្រ្តាចារ្យ អ៊ឹម សិទិ្ធការ្យ បានបន្តទៀតថា យោងតាមរបាយការណ៍សូចនករស្នូលនៃការអង្កេតប្រជាសាស្ត្រ និង សុខភាពនៅកម្ពុជាឆ្នាំ២០២១-២០២២ បានបង្ហាញឱ្យឃើញថា អត្រាមរណភាពទារកនៅ ប្រទេសកម្ពុជាមានការថយចុះគួឱ្យកត់សំគាល់ពី ៣៧នាក់ក្នុងចំណោម១០០០កំណើតរស់ក្នុងឆ្នាំ២០០០ មកត្រឹមតែ ៨នាក់ក្នុងចំណោម ១០០០ កំណើតរស់ក្នុងឆ្នាំ ២០២១-២០២២។ អត្រាមរណភាពមាតា បានថយចុះពី១៧០ ក្នុង១សែនកំណើតរស់នៅឆ្នាំ២០១៤ មកនៅ១៥៤ ក្នុង១សែនកំណើតរស់ឆ្នាំ២០២១។ អត្រាមរណភាពកុមារ ក្រោម៥ឆ្នាំចុះពី៣៥ក្នុង១ពាន់ កំណើតរស់ឆ្នាំ២០១៤ មកនៅ១៦ ក្នុង១ពាន់នាក់នៅឆ្នាំ២០២១។ អត្រាស្ត្រីមានផ្ទៃពោះមកទទួលពិនិត្យលើកទីមួយ បាន៩៩% អត្រាពិនិត្យផ្ទៃពោះលើកទីបួន បាន៨៦% អត្រាពិនិត្យ ក្រោយសម្រាលមាន៨៥% សម្រាលកូនដោយឆ្មបជំនាញ ៩៩% និងសម្រាលកូននៅមូលដ្ឋាន សុខាភិបាលមាន៩៧%។ នេះជាសមិទ្ធផលយ៉ាងធំធេងរបស់ក្រសួងសុខាភិបាល ក៏ដូចជារាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងបន្តមករាជរដ្ឋាភិបាលនីតិកាលទី៧ ដែលមានសម្តេចមហាបវរធិបតី ហ៊ុន ម៉ាណែត។

លោកជំទាវសាស្ត្រាចារ្យរដ្ឋលេខាធិការ ក៏បានផ្តល់អនុសាសន៍ជូនអង្គពិធីទាំងមូលជា ពិសេសថ្នាក់ជាតិ និងថ្នាក់ក្រោមជាតិ (១) រៀបចំពិនិត្យមើលសម្ភារចាំបាច់សម្រាប់ ជួយសង្គ្រោះទារក (២)រៀបចំបណ្តុះបណ្តាលពីជំនាញសង្គ្រោះទារកដល់គ្រូពេទ្យ ឆ្មប និងគិលានុបដ្ឋាក ដើម្បីធានាថាមានសមត្ថភាពគ្រប់គ្រាន់ក្នុងការផ្តល់សេវាដែលមានគុណភាព និងសុវត្ថិភាពដល់មាតា ទារក និងកុមារ និង (៣) ថ្នាក់ក្រោមជាតិ មណ្ឌលសុខភាព មន្ទីរពេទ្យបង្អែក មន្ទីរពេទ្យឯកជន សូមធ្វើការបញ្ជូនស្ត្រីមានផ្ទៃពោះមានបញ្ហាប្រឈម និងទារក ដែលមានបញ្ហាសុខភាពឱ្យបានទាន់ពេលវេលា និងមានប្រសិទ្ធភាព។

បើតាមលោកវេជ្ជបណ្ឌិត លាក់ ពន្លឺ អគ្គលេខាសមាគមគ្រូពេទ្យទារកកម្ពុជា បានឲ្យដឹងថា សន្និសីទ និងសិក្ខាសាលា មានគោលបំណងផ្តល់នូវចំណេះដឹងថ្មីបន្ថែមដល់មន្ត្រីសុខាភិបាល ជាគ្រូពេទ្យ គិលានុបដ្ឋាក និងឆ្មបពីការថែទាំ និងព្យាបាលម្តាយ ទារកទើបកើត និងកុមារ ដូចជាសង្គ្រោះទារកក្រោយសម្រាល ការតាមដានការលូតលាស់មិនប្រក្រតីរបស់ទារកក្នុងផ្ទៃ ការពិនិត្យស្វែងរកជំងឺពីកំណើតដោយការជុះកែងជើងទារក ជំងឺកាមរោគ និងបទពិសោធន៍ផ្សេងៗទៀតដែលមានការចែករំលែកពីវាគ្មិនជាតិ និងអន្តរជាតិ៕ អត្ថបទ រដ្ឋា