ស.ស.យ.ក រៀបចំ «ពិព័រណ៍ព្រះបរមឆាយាល័ក្ខណ៍» ដើម្បីសាទរខួបទី២០នៃព្រះរាជពិធីឡើងគ្រងព្រះបរមរាជសម្បត្តិ

ភ្នំពេញ ៖ សហភាពសហព័ន្ធយុវជនកម្ពុជា បានរៀបចំ «ពិព័រណ៍ព្រះបរមឆាយាល័ក្ខណ៍» នៅពីមុខព្រះបរមរាជវាំង ដើម្បីអបអរសាទរ គម្រប់ខួបលើកទី ២០ នៃ នៃព្រះរាជពិធីឡើងគ្រងព្រះបរមរាជសម្បត្តិ ព្រះករុណាជាអម្ចាស់ ជិវិតលើត្បូងព្រះមហាក្សត្រ នៃព្រះរាជាណាចក្រកម្ពុជា។

​សហភាពសហព័ន្ធយុវជនកម្ពុជា ក្រោមការដឹកនាំដោយ ឯកឧត្តម ហ៊ុន ម៉ានី ជាប្រធាន ព្រមទាំងសមាជិក សមាជិកា ជាច្រើនរូប បានជួបជុំគ្នានៅព្រឹកថ្ងៃអាទិត្យ ទី២៧ ខែតុលា នេះ ដើម្បីរៀបចំការបើក «ពិព័រណ៍ព្រះបរមឆាយាល័ក្ខណ៍»។ ពិព័រណ៍នេះ មានការដាក់បង្ហាញនូវ ព្រះបរមឆាយាល័ក្ខណ៍ ជាច្រើនបង្ហាញពីព្រះរាជជីវប្រវត្តិ ព្រះរាជកាតព្វកិច្ច ស្នាព្រះហស្ថ និងព្រះរាជសកម្មភាពសប្បុរសធម៌ របស់ព្រះករុណជាអម្ចាស់ ជិវិតលើត្បូងព្រះមហាក្សត្រ នៃព្រះរាជាណាចក្រកម្ពុជា។

ពិព័រណ៍ព្រះបរមឆាយាល័ក្ខណ៍ នេះ ជាពិព័រណ៍បើកទូលាយសម្រាប់សាធារណជន ដែលរៀបចំឡើងនៅបរិវេណសួនច្បារព្រះរាជបណ្ដាំ ខាងមុខព្រះបរមរាជវាំង។ ពិព័រណ៍ រៀបចំឡើងសម្រាប់រយៈពេល ២២ថ្ងៃ ចាប់ពីថ្ងៃទី ២៧ ខែតុលា រហូតដល់ថ្ងៃទី ១៧ ខែវិច្ឆិកា ឆ្នាំ ២០២៤។

ក្នុងការបើកពិព័រណ៍នាព្រឹកនេះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកើងថា សហភាពសហព័ន្ធយុវជនកម្ពុជា មានក្ដីរីករាយជាទីបំផុត ដែលទទួលបានព្រះបរមរាជានុញ្ញាតដ៏ខ្ពង់ខ្ពស់បំផុត រៀបចំពិព័រណ៍ព្រះបរមឆាយាល័ក្ខណ៍ ដើម្បីថ្វាយព្រះពរអបអរសាទរខួបទី ២០ព្រះវស្សា នៃព្រះរាជពិធីគ្រងព្រះបរមរាជសម្បត្តិ របស់ករុណា ព្រះបាទសម្ដេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា។

ឯកឧត្តម ហ៊ុន ម៉ានី បានមានប្រសាសន៍បន្ថែមថា ពិព័រណ៍នេះត្រូវបានរៀបចំឡើងក្នុងគោលបំណងបង្ហាញ ពីការដឹងគុណ ចំពោះព្រះគុណូបការៈ ព្រះគំរូវីរៈភាព និងព្រះរាជបូជនីយកិច្ច ដ៏ឧដុង្គឧត្តម របស់ព្រះករុណា ជាអម្ចាស់ ដែលទ្រង់បានបំពេញ ព្រះរាជតួនាទី របស់ព្រះអង្គយ៉ាងខ្ជាប់ខ្ជួនស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា។

ព្រះអង្គតែងតែ គង្សជាម្លប់ដ៏ត្រជាក់ត្រជុំ និងមានព្រះទ័យសណ្ដោសប្រណី យកចិត្តទុកដាក់ចំពោះប្រជានុរាស្ត្រ របស់ព្រះអង្គ នៅគ្រប់កាលៈទេសៈទាំងអស់៕

អត្ថបទ៖គឹមហុក