ពលរដ្ឋ៖ ខួប២០ឆ្នាំការយាងគ្រងរាជសម្បត្តិ​សម្តេចព្រះបរមនាថ​មានព្រះរាជសកម្មភាព មនុស្សធម៌ជាច្រើន

នៅថ្ងៃទី២៩ ខែតុលាស្អែកនេះ គឺថ្ងៃដ៏វិសេសវិសាលខួប២០ឆ្នាំ នៃការយាង​ឡើងគ្រង​ព្រះ​បរម​សិរី​រាជ​សម្បត្តិ របស់ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី។ ប្រជានុរាស្ត្រ ក្នុង​ចំណោមយុវជនស្ម័គ្រចិត្តកាកបាទក្រហមកម្ពុជា និងពលរដ្ឋនានា​ទៀត​បាន​សម្តែង​ការ​អបអរ​សាទរ​ជា​ខ្លាំង និងបានមើលឃើញ​ព្រះរាជ​សកម្មភាព​មនុស្ស​ធម៌​ជា​ច្រើន​ជួយ​សង្គ្រោះ​ប្រជានុរាស្ត្រ​ជួប​គ្រោះ​មហន្តរាយនានា។

បណ្តាយុវជនស្ម័គ្រចិត្តកាកបាទក្រហមកម្ពុជានិង ប្រជានុរាស្ត្រចាស់ក្មេងនានា បានថ្លែងប្រាប់ BTV នៅថ្ងៃទី២៨ ខែតុលានេះថា ប្រជានុរាស្ត្ររបស់ព្រះអង្គទាំងអស់គ្នា សូមថ្វាយព្រះពរ និង​អបអរ​សាទរជាពន់ពេក ដែលរួមរស់ក្រោមម្លប់ដ៏ត្រជាក់ នៅក្នុងព្រះរាជាណាចក្រកម្ពុជា និងបាន​មើល​ឃើញ​អំពីព្រះរាជសកម្មភាពរបស់ព្រះអង្គជាច្រើន ក្នុងរយៈពេល២០ឆ្នាំកន្លងមក ជាពិសេស​ក្រៅ​ពី​ព្រះរាជសកម្មភាពគាំទ្រ ិងំរុញការដឹកនាំប្រទេសមានការអភិវឌ្ឍ រីកចម្រើន​និង​ភាព​សំបូរ​សប្បាយ​រុងរឿងនេះ ព្រះអង្គក៏បានធ្វើសកម្មភាពមនុស្សធម៌ ប្រទានព្រះរាជអំណោយ​ជួយ​កាក​បាទ​ក្រហមកម្ពុជា និងដូចយាងចុះជួបសួរសុខទុក្ខផ្ទាល់ជួយដល់ប្រជានុរាស្ត្រជួបការខ្វះខាត រង​គ្រោះនានាដោយគ្រោះធម្មជាតិ ទឹកជំនន់ និងខ្យល់ព្យុះជាដើម។

សូមបញ្ជាក់ថា ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី បានយាង​គ្រង​ព្រះ​បរម​សិរី​រាជសម្បត្តិ នៅថ្ងៃទី២៩ ខែតុលា ឆ្នាំ២០០៤ រហូតមកដល់ថ្ងៃទី២៩ ខែតុលា ឆ្នាំ២០២៤​នេះ គឺមានរយៈពេល២០ឆ្នាំ។

ក្នុងអំឡុងរយៈពេល២០ឆ្នាំនេះ នៃការយាងគ្រងព្រះបរមសិរីរាជសម្បត្តិ ព្រះមហាក្សត្រ បាន​ប្រកាន់​ខ្ជាប់​នូវព្រះរាជតួនាទី និងព្រះរាជកិច្ចរបស់ព្រះអង្គតាមការចែងនៅក្នុងរដ្ឋធម្មនុញ្ញ ក្នុង​ការ​បម្រើ​វិស័យសាសនា វិស័យមនុស្សធម៌ វិស័យអប់រំ សង្គមកិច្ច សុខមាលភាព និងជីវភាព​រស់​នៅ​របស់​ប្រជា​រាស្ត្រនៅទូទាំងប្រទេស និងបាននាំមកនូវសុខសុភមង្គលសម្រាប់ជាតិ និងប្រជារាស្ត្រ​ខ្មែរ​។

ក្រៅពីនេះ ព្រះអង្គ បានចាត់ទុកបញ្ហារបស់ប្រជានុរាស្រ្ត ក៏ដូចជាបញ្ហារបស់ទ្រង់ផ្ទាល់ដែរ។ អាស្រ័យ​ហេតុនេះហើយ ទើបព្រះអង្គតែងតែ​ចូល​រួម​ចំណែក​បរិច្ចាគ​ថវិកា​ផ្ទាល់​របស់​ព្រះអង្គ​ជួយ​សាង​សង់​អគារមន្ទីរពេទ្យ សាលារៀន ប្រឡាយទឹកជាដើម ដើម្បីជាប្រយោជន៍​ក្នុងការ​រស់​នៅ​របស់​ប្រជានុរាស្រ្ត ជាពិសេសតែង​បាន​ប្រទាន​ថវិ​កា​ជារៀង​រាល់​ខែ​ជួយ​ទ្រទ្រង់​ដល់​សកម្មភាព​របស់​កាក​បាទក្រហមកម្ពុជា។ បន្ថែមលើនេះព្រះអង្គក៏តែងតែយាង​ចុះជួបប្រជា​នុរាស្រ្តនៅ​តាម​មូលដ្ឋាន​ដាច់​ស្រយ៉ាល ដោយ​ផ្ដល់​ជា​គ្រឿងឧបភោគ និងថវិកា ដើម្បីដោះស្រាយបញ្ហាជីវភាព៕ អត្ថបទ ស៊ុម សុខជា